धनगढी बजारमा छैन कारोबार, दसैंको किनमेलले भारतीय बजारमा भ्याइनभ्याइ

A+ A A-

नेपालमा चाडपर्व सुरु हुँदा भारतीय बजारमा रौनक आउँछ । विगत वर्षको यो नियती यो वर्ष पनि दोहोरिएको छ ।

कैलाली र कञ्चपुरबाट नजिकै रहेका भारतीय बजार बनगाँउ, तिकुनीया, पलिया, सुडा तथा बनबाँसामा यस्तो रौनक आउने गरेको हो ।

नेपाली बजार भन्दा केही सस्तोमा सामान पाइने भन्दै धेरै उपभोक्ता भारतीय बजारसम्म पुग्ने गरेको बताउँछन् । चाडपर्व सुरु भएसँगै थुप्रै नेपालीहरू नजिकै रहेको भारतीय बजारमा जाने गरेका हुन् । गौरीफन्टानाका हुँदै उनीहरू भारतीयबजारमा खाद्यान्न, दाल, चिनी देखि लत्ताकपडा किन्न जाने गरेका हुन् ।

धनगढी मिलनचोककी आरती नेपालीले दसैंको समान किन्न वनगाउँ बजारबाट किनेको बताइन् । नेपालभन्दा भारतीय बजारमा सामान सस्तो पाइने भएकाले उतै जाने गरेको उनको भनाइ छ । ‘चिनी, दाल, कपडा धनगढी बजारको भन्दा सस्तो पाइन्छ’, उनले भनिन् ।

सधैं नआएपनि चाडपर्वका बेला वनगाउँ बजारसम्म पुग्ने गरेको उनको भनाइ छ ।

कोरोना संक्रमणका बेला बन्द भएका भारतीय बजार खुलेपछि फेरि नेपालीहरू उतै जान थालेका हुन् । पार्वती चौधरीले पनि दसैंमा बच्चाहरूका लागि तथा घरपरिवारको लागि लुगा किन्न बनगाउ बजार गएको बताइन् । ‘धनगढीमा एक हजार पर्ने सुटलाई चार, पाँच सय सम्म दिन्छन्’, उनले भनिन् ।

सस्तो कपडा पाइने भएपछि साथीहरूसँग वनगाउँ बजार आएको उनले बताइन् । धनगढी बजारमै सस्तोमा सामान पाइने भइदिए दुःख गरेर भारतीय बजार सम्म पुग्नु नपर्ने उनको भनाइ छ ।

दसैंमा मात्र होइन तिहार, छठ तथा विवाह भोजका लागि सामान किन्नु पर्ने भएमा धेरै नेपालीहरू भारतीय बजारमा जाने गरेका छन् । कोरोनाको जोखिम कायमै भएका बेला उनीहरू जोखिम मोलेरै भारतीय बजार जाने गरेका छन् । भारतीय बजारमा कैलालीर कञ्चनपुरबाट मात्रै नभएर सस्तो सामान पाउने भन्दै सुदूरपश्चिमका विभिन्न जिल्लाबाट नेपालीहरू भारतीय बजार जाने गरेका छन् ।

‘केही रुपैयाँ सस्तो सामान पाउने भन्दै नेपालीहरू भारतीय बजार जान्छन् । तर गुणस्तरमा ध्यान दिँदैनन्', किराना व्यवसायी संघ कैलालीका अध्यक्ष लक्षमण पन्तले बताए । ‘हामीले भन्सार कर तिरेर सामान ल्याउने हुँदा केही महङ्गो हुन्छ, तर धेरै ग्राहकलाई मार पर्ने गरी महङ्गो हुँदैन,’ उनले भने ।

नेपालमा पाइने सामान गुणस्तरीय हुने गरेको भएपनि तर नबुझेरै धेरै नेपालीहरू सस्तो पाउने भरमा भारतीय बजार सम्म पुग्ने गरेको पन्तको भनाइ छ । केही सामान नेपाली बजारमा महङ्गो हुने गरेको भएपनि तर गुणस्तरीय हुने गरेको उनले बताए ।

केही साना व्यापारीहरूले पनि फलफूल तथा तरकारीहरू भारतबाट ल्याउने गरेका छन् । यसरी भारतबाट आउने सामानमा गुणस्तरीय भने नहुने कैलाली उद्योग वाणिज्य संघ, कैलालीका अध्यक्ष पुष्पराज कुँवरले बताए । उनले खाद्यान्न तथा अन्य सामानहरूमा गुणस्तीयता भने नहुने बताए ।

‘धनगढी बजार छोडेर भारतीय बजार जाँदा नेपाली बजारमा पनि असर पर्छ’, उनले भने । यसका लागि भन्सार कार्यालय कैलालीले पनि कडाइ गर्नुपर्छ । भारतीय बजारमा नेपाली उपभोक्ता जाने गरेमा यसले नेपालको अर्थतन्त्रलाई पनि असर पर्ने बताए । भन्सारबाट यसरी भित्रिने सामानमा प्रशासनको ध्यान जानुपर्ने उनको भनाइ छ ।

प्रकाशित मिति: बिहीबार, असोज २८, २०७८ १९:२८