भारतका ४७५ सांसद करोडपति, कुन पार्टीका कति ?

A+ A A-

भारतीय संसदको तल्लो सदन लोकसभामा दुई तिहाइभन्दा बढी सांसद करोडपति छन् । लोकसभा निर्वाचन जित्नेमा ५४२ मध्ये ४७५ जना करोडपति छन् ।

मध्य प्रदेशका मुख्यमन्त्री कमलनाथका छोरा नकुलनाथ छिन्दबाडाबाट सांसद बनेका छन् । उनी लोकसभाका सबैभन्दा धनी सांसद हुन् । उनको सम्पत्ति ६६० करोड बराबर छ । एसोसिएन अफ डेमोक्रेटिक रिफर्म नामको संस्थाले यो सूची तयार पारेर सार्वजनिक गरेको हो ।

भाजपाका २६५ र शिवसेनाका सबै सांसद करोडपति
लोकसभाका सबै सांसदबारे अध्ययनपछि यो सूची जारी गरिएको हो । १७औं लोकसभामा भाजपाका ३०३ सांसद निर्वाचित भएका छन् भने कांग्रेसका ५२ जना छन् ।

५४२ मध्ये भाजपाका २ र कांग्रेसका १ सांसदको विवरण प्राप्त नभएको बताइएको छ । भाजपाका ३०३ मध्ये २६५ अर्थात् ८८ प्रतिशत सांसद करोडपति छन् भने भाजपा नेतृत्वको एनडीएकै अर्को पार्टी शिवसेनाबाट निर्वाचित हुने सबै १८ जना सांसद करोडपति छन् । कांग्रेसका ५२ मध्ये ४३ सांसद करोडपति छन् ।

टीएमसीका ९१ र डीएमकेका ८६ प्रतिशत सांसद करोडपति
डीएमकेका २३ मध्ये २२ सांसद करोडपति रहेका छन् भने तृणमुल कांग्रेसका २२ मध्ये २० जनासँग करोडभन्दा बढी सम्पत्ति छ ।

वाइएसआर कांग्रेसका २२ मध्ये १९ जना करोडपति छन् । लोकसभामा निर्वाचितमध्ये शीर्ष तीन धनी सांसद कांग्रेसका छन् ।

सबैभन्दा धनी सांसद
सबैभन्दा बढी सम्पत्तिका मालिक कमलनाथका छोरा नकुलनाथ, वसन्तकुमार एच र डीके सुरेश रहेका छन् । उनीहरु तीन जना नै कंग्रेसका सांसद हुन् ।

मुस्लिम सांसदको संख्या बढ्यो
यसपटक मुस्लिम सांसदको संख्या २२ बाट बढेर २६ पुगेको छ । लोकसभाका कुल ५४३ मध्ये ५४२ सिटका लागि निर्वाचन भएको थियो । यो संख्यालाई हेर्ने हो भने अघिल्लोपटक भन्दा यसपटक मुस्लिम सांसदको संख्या बढेको छ ।

१५औं लोकसभामा भने मुस्लिम सांसदको संख्या ३३ थियो । लोकसभामा सबैभन्दा बढी मुस्लिम सांसद १९८० मा थिए । त्यतिबेला ४९ जना मुस्लिम समुदायका सांसद निर्वाचित भएका थिए ।

महिलाको संख्या १७ प्रतिशत
१७औं लोकसभामा विजयी महिलाको कुल संख्या ७८ छ । महिला सांसदको यो सबैभन्दा ठूलो सहभागिता हो । यो कुल ५४३ को १७ प्रतिशत हो । महिला सांसदको सबैभन्दा कम प्रतिनिधित्व नवाैं लोकसभामा २८ थियो ।

यसपटक सबैभन्दा बढी भाजपाबाट महिलाले जित हासिल गरेका छन् । भापजाका ३०३ मध्ये ४० जना महिला सांसद बनेका छन् । कंग्रेसबाट रायबरेलीबाट उम्मेदवार बनेकी सोनिया गान्धीले मात्रै जित हासिल गरेकी छन् ।

प्रकाशित मिति: मंगलबार, जेठ २८, २०७६ २३:३९