चितवनका निजी अस्पतालले बढाए ओपीडी शुल्क, उपचार खर्च बढ्दा बिरामी मर्कामा

A+ A A-

भरतपुर महानगरपालिका–८ गौरीगञ्जकी बिञ्जु महतो मंगलबार भरतपुर सामुदायिक अस्पतालमा बहिनीलाई जचाउनका लागि आइन् ।

गर्भवती बहिनीलाई जचाउन आएकी उनले ओपीडी शुल्क सात सय रुपैयाँ तिरिन् । यसअघि सोही अस्पतालमा उनले ओपीडी शुल्क पाँच सय मात्र तिरेकी थिइन् । तर यो पटक भने अस्पतालले उनीसँग अतिरिक्त दुई सय लियो।

एक्कासी दुई सय रुपैयाँ शुल्क बढ्दा आफूलाई मर्का परेको उनको भनाइ छ। ‘ओपीडीको मात्रै यति तिर्नुपर्छ, रगत जाँच्न पर्‍यो । एक्सरे गर्दा थप खर्च लाग्छ’, उनले गुनासो गरिन्, ‘कोरोनाको कारण रोकिएको काम पनि बल्ल सुरु हुँदैछ । खर्च बढ्दा गाह्रो हुन्छ नि ।’

सरकारी अस्पतालमा उपचार गराउने चाहना भए पनि समयमै पालो नपाइने भएकाले निजी अस्पतालमा आउन बाध्य भएको उनको भनाइ छ ।

सोही अस्पतालमा हेटौँडाकी नेबिका नेगीले एक महिनाको अन्तरमा दुई सय रुपैयाँ बढी शुल्क तिर्नुपर्‍यो । गत भदौमा पायल्सको शल्यक्रिया गरेर मंगलबार फलोअपमा आएकी उनले यति छोटो अवधिमा ओपीडीको शुल्क बढी तिरेकी हुन् ।

यो मूल्य वृद्धिलाई अस्वाभाविक बताउँदै उनले भनिन्, ‘एक महिनाअगाडि आउँदा पाँच सय थियो । अहिले त दुई सय बढेर सात सय भएछ ।'

'महँगो शुल्क सक्नेले त तिर्छन्, नसक्नेले के गर्ने ?’, उनको प्रश्न छ ।

चितवनका सबै निजी अस्पतालले पछिल्लो समय एकैपटक करिब ४० प्रतिशत ओपीडी शुल्क बढाएका छन् ।

भरतपुरको नारायणी सामुदायिक अस्पतालमा मंगलबार पतिको उपचार गराउन आएकी भरतपुर–४ मा बस्ने प्रमिला ठाकुरले त्यस्तै बढी शुल्क तिर्नुपर्‍यो । उनले पनि शुल्क बढ्दा असर परेको बताइन्। सोही अस्पतालमा उपचार गराउन आएकी पटिहानीकी सिर्जना अधिकारी सरकारी अस्पतालमा भनेजस्तो सुविधा नहुँदा निजी अस्पतालको मनपरी बढेको बताउँछिन् ।

रत्ननगरबाट पत्नीको उपचारका लागि नारायणी सामुदायिक अस्पतालमै आएका नवीन अधिकारी पहिले आउँदा साढे चार सय मात्रै तिरेपनि अहिले डेढ सय बढी तिरेको सुनाए । सरकारी अस्पातलमा बढी समय लाग्ने हुँदा स्वास्थ्य बीमा भएपनि निजी अस्पताल जानुपर्ने बाध्यता रहेको अधिकारीको भनाइ छ । ‘सरकारी अस्पतालमा बढी समय लाग्छ । मैले स्वास्थ्य बीमा गरेको छु, सरकारीम अस्पतालमा जाँदा पैसा लाग्दैन्थ्यो । तर पनि समय नभएकाले महँगो तिरेर यहाँ आएको छु', उनले भने ।

चितवनमा हाल २० वटा निजी अस्पताल रहेका छन् । निजी अस्पताल समन्वय समिति चितवनका सचिव विक्रम अधिकारीले मूल्य संयोजनका आधारमा शुल्क बढाएको दाबी गरे । चिकित्सा संघले शुल्क बढाउने निर्णय गरे अनुसार नै निजी अस्पतालले शुल्क वृद्धि गरेको उनको भनाइ छ ।

‘दुईदुई वर्षमा हुने मूल्य समायोजन २०७२ सालदेखि भएको थिएन । त्यही आधारमा चिकित्सक संघले जारी गरेको परिपत्रका आधारमा हामीले कार्यान्वयन गरेका हौँ’, उनले भने ।

निजी अस्पतालले सुविधाअनुसार ६ सयदेखि एक हजारसम्म ओपीडी शुल्क असुल्ने गरेका छन् । ‘संघले आठ सयसम्म लिन पाउने परिपत्रमा उल्लेख भए पनि हामीले कमभन्दा कम रुपमा अहिले सात सय रुपैयाँसम्म ओपीडी शुल्क लिने निर्णय गरेका छौँ’ अधिकारी भन्छन्, ‘कोभिडका बेलामा राम्रो मेसेज जाँदैन भनेर हामीले न्यूनतम मूल्य बढाएका हौं। २०७२ सालदेखि नै हेर्ने हो भने चारपटक बढ्ने बेला भएको हो ।’

चिकित्सक संघ चितवनका अध्यक्ष डा. लोकबहादुर सेढाइँ पनि गत फागुनमै मूल्य बढाउने निर्णय भएपनि हाल मात्र कार्यान्वयनमा आएको बताउँछन् । ‘शुल्क नबढेको धेरै वर्ष भएको थियो । अहिले तोकेको भन्दा पनि न्यूनतम शुल्क मात्रै बढाएका छौं’, उनले भने ।

प्रकाशित मिति: बुधबार, असोज २०, २०७८ २१:४९