'कुवेतमा बस्ने साथीभाइले नेपाल टेकाए, परिवारलाई यी.. म नै उपहार भएँ'

A+ A A-

तीन वर्षअघि राेजगारीका लागि कतार गएका पर्साका दीपु यादव बुधबार राति काठमाडाैं ओर्लिए । अनि परिवारका सदस्य, आफन्त, साथीभाइलाई पालैपालो फोन गरी आफू नेपाल आइपुगेको जानकारी गराए ।

कतारकाे मिल्क डेरी कम्पनीमा काम गर्ने दीपु दसैँ मान्नकै लागि कम्पनीसँग दुई महिनाको छुट्टी लिएर आएको बताउँछन् । जहाजबाट उत्रेपछि बल्ल दसैँ मनाउन नेपाल फर्केजस्तो लागेको यादवले बताए । ‘कतारमा कामभन्दा ठूलो केही हुँदैन । तीन वर्षयता दसैँ मनाउन पाएको छैन । यो पटक परिवारसँग बसेर मज्जाले दसैँ मनाउने हो’, उनले सुनाए ।

रोल्पाका जीवन पुन श्रीमतीलाई फोन र छोरालाई ल्यापटप लिएर बुधबार राति नै यूएईबाट काठमाडाैं आपुगे । भारी लगेज लिएर ट्याक्सीतिर बढ्दै गरेका जीवनले एउटा ल्यापटप र तीन वटा मोबाइल, जाडाेका लागि ब्ल्याङ्केट ल्याएकाे बताए । 'बूढी र छोरालाई दसैँकाे गिफ्ट ल्याइदेकाे नि', उनी दङ्ग छन् ।

यूएईमा सुरक्षा गार्डको काम गर्ने जीवन दसैँ मान्न तीन महिनाको बिदा लिएर आएको बताउँछन् ।

जीवनले जस्तै घर फर्किँदा साथमा ल्यापटप, टिभी, मोबाइल फोन, ब्ल्याङ्केट, घडी, गरगहना, क्यामेरालगायतका सामाग्री अनि आफन्त, साथीभाइका लागि विभिन्न उपहार लिएर आउनेहरू विमानस्थलमा थुप्रै देख्न सकिन्छ । अर्थ मन्त्रालयको निजी, गुन्टा, झिटीसम्बन्धी प्रावधानअनुसार विदेशबाट आउनेले प्रयोग गरिरहेको फोनबाहेक दुई वटासम्म मोबाइल फोन ल्याउन पाइन्छ । यस्ताे जानकारी नहुँदा कतिपयले विमानस्थलमा दुःख पाउने गरेका छन् । यद्यपि, यसपल्ट तीन वटासम्म मोबाइल ल्याउँदा पनि भन्सार फाँटमा जाँचबुझ नभएकाे राेल्पाका जीवनले बताए ।

दसैँमा देश छोड्नेहरू...

कोरोनाका कारण विदेशमा रोजगारी गुमाएकाले कतिपय नेपालीहरूचाहिँ रित्तै फर्केका देखिन्थे । दीपु र जीवनकाे पछिपछि एउटा ह्याण्डक्यारी ब्याग लिएर बाँकेका भीष्म मगर विमानस्थलको आगमन कक्षबाट निस्कँदै थिए । कुवेतबाट फर्केका भीष्म काेराेनाका कारण राेजगारी गुमेपछि बेखर्ची भएकाे बताउँछन् । चार महिनादेखि काम नपाएपछि कम्पनीले बल्लतल्ल हवाई टिकट गरेर स्वदेश पठाएको उनले बताए । ‘घर फर्किन पनि कुवेतमा रहेका नेपालीहरूले सहयोग गरेर सम्भव भएकाे हाे । परिवारका लागि उपहार ल्याउन पैसा भएन । साथीहरूले सहयाेग गरेकाे केही पैसाले काठमाडाैंबाट श्रीमती र आमालाई लुगा किनेर लैजान्छु’, उनले भने, ‘धन्न नेपाल आउन पाएँ । बेखर्ची भएर फर्किन नपाएको भए यता परिवारले दसैँ मनाइरहेका बेला म कुवेतका सडकमा भाैतारिनुपर्थ्याे । साथीभाइ र कम्पनीले नेपाल टेकाए ।’ दसैँमा आफू नै परिवारका लागि उपहारजस्ताे भएको उनी बताउँछन् ।

विमानस्थलमा रोजगारीका लागि विदेशिनेभन्दा दसैँ मनाउन स्वदेश फर्किने नेपालीको संख्या बढी रहेको विमानस्थलकाे अध्यागमन कार्यालयले जनाएको छ । केही दिनयता वैदेशिक रोजगारीबाट दैनिक २ हजार ५ सयको हाराहारीमा नेपाली स्वदेश फर्किने गरेका छन् । यो संख्या अरू बेलाकाे भन्दा ४ गुणा बढी हाे ।

बाइ बाइ नेपाल (विमानस्थलमा लिइएका तस्वीरहरू)

हिजोआज विमानस्थलको प्रतीक्षा कक्ष विदेशबाट फर्किनेलाई लिन आउने आफन्तहरूले भरिभराउ छ । दसैँतिहार बाहेकको समयमा नेपाल फर्किने यस्ताे संख्या दैनिक तीन सयदेखि बढीमा सात सयसम्म मात्र हुन्थ्याे । रोजगारीको खोजीमा दैनिक करिब तीन सयको हाराहारीमा नेपालीहरू विदेशिइरहेका वैदेशिक रोजगार विभागले जनाएकाे छ ।

असोज लागेयता एक लाखभन्दा धेरै प्रवासी नेपाली स्वदेश फर्किएको अध्यागमन कार्यालयको अनुमान छ । सामान्य समयभन्दा चाडपर्वका बेला चार गुणा मान्छे स्वदेश फर्किने गरेका कार्यालयले जनाएको छ । अरू बेला मासिक २० हजारको हाराहारीमा नेपालीहरू स्वदेश फर्किने गरेका थिए ।

वैदेशिक रोजगारीका लागि नेपाली युवा सबैभन्दा धेरै खाडीका देश र मलेसिया जाने गरेका छन् । विदेशिएका कुल नेपालीमध्ये यी देशमा ८० प्रतिशतभन्दा धेरै छन् । स्वाभाविक हाे, चाडपर्वका बेला यिनै देशहरूबाट स्वदेश फर्किनेको संख्या धेरै छ ।

प्रकाशित मिति: बिहीबार, असोज २१, २०७८ ०८:४३