फ्रेन्चाइजको भिडमा जन्मिएको माैलिक शो, जसले फ्रेन्चाइजहरुलाई नै उछिन्यो

A+ A A-

सम्पादकीय नाेटः

समाजमा कति धेरै नकारात्मक घटना भइरहन्छन्, जसलाइ पढ्दा सुन्दा हेर्दा हामी दिक्क भइरहेका हुन्छाैं । तर यही समाजमा सकारात्मक काम गर्नेहरू पनि छन् । उनीहरूकाे चर्चा खै त ?

तिनै सकारात्मक कामहरू बाहिर ल्याउने शिलापत्रकाे माैलिक प्रस्तुति हाे, आशाका आधारशिला । पाेहाेर ०७७ काे दसैंताका हामीले समाजमा उदाहरणीय प्रयास गर्ने पात्रहरूकाे छनाेट गरेर उनीहरूका याेगदानहरूलाइ सार्वजनिक चर्चामा ल्याएका थियाैं । अनि शिलापत्रकाे तेस्राे वार्षिकाेत्सव समाराेहमा आशाका आधारशिला अवार्ड समेत वितरण गरेका थियाैं ।

याे वर्ष पनि दसैंकाे छेकमा हामीले याे प्रस्तुतिलाइ निरन्तरता दिएका छाैं । कृपया हामीलाई सल्लाह सुझाव दिनुहाेला । दसैंकाे शुभकामना ।

प्रधान सम्पादक

अब विशाल भण्डारीको कथा ।

म्युजिक भिडियो निर्देशनमा गतिलो छाप बनाएका विशाल भण्डारीले 'कोहलपुर एक्सप्रेस' मार्फत फिल्म निर्देशनमा डेब्यु गरे । बिडम्बना, डेब्यु फिल्मबाट नै उनले आलोचना खेप्नुपर्‍यो ।

नखेपुन् पनि कसरी ? उनले बनाएको 'कोहलपुर एक्सप्रेस' बलिउड फिल्म 'मुम्बई एक्सप्रेस'को हुबहु कपी नै थियो ।

'चोरेर फिल्म बनायो' भन्ने चर्को आलोचना चलिरहँदा विशाल भने मौन बसे । न उनले समीक्षकलाई जवाफ फर्काए, न आलोचकलाई नै । बरु उनले आफ्नो कमजोरीलाई स्वीकारे । अनि आफैँसँग प्रण गरे, 'यो आलोचनाको जवाफ कामले नै दिनेछु ।'

करिब डेढ वर्षपछिको समय । नभन्दै विशालले कामबाट नै जवाफ फर्काए ।

'कपी'को आरोप खेपेका उनले अर्ग्यानिक रियालिटी शो 'कमेडी च्याम्पियन' सुरु गरे । कमेडी च्याम्‍पियन निकै लोकप्रिय बन्यो । युट्युबसँगै सामाजिक सञ्जालहरूमा च्याम्पियनका क्लिपहरू भाइरल बने ।

शोबाट निर्देशक विशालले निकै तारिफ बटुले । हिजो-आज उनी गर्वका साथ भन्छन्, 'मलाई लागेको दाग त मैले कामबाट नै मेटाउन सकेँ ।'

तर, कमेडी च्याम्पियन सजिलै हिट भएको कहाँ हो र ? शो हिट हुनुपूर्व विशाल र उनको टिमले गरेको संघर्ष र भोग्नुपरेको दुःख मन कुँड्याउने छ । शोबाट दर्शकलाई हँसाएका विशाल र उनको टिमले गरेको संघर्ष पीडादायक छ ।

विशाल त्यो दुःख सम्झिन्छन्, 'हामीले त झण्डै शो नै बन्द गर्नुपर्ने अवस्था आएको थियो ।'

सुरुका दिनमा कमेडी च्याम्पियनले ठूलै आर्थिक झमेला सहनुपर्‍यो । विज्ञापन थिएन, लगानी सबै ऋण खोजेर नै गर्नुपर्ने । कैयौँपटक सुटिङ सेटमा ताल्चा लाग्यो ।

आर्थिक मात्र होइन, शोका सुरुवाती भागहरू निकै फितलो देखिए । विभिन्न मिडियाहरूमा शो राम्रो नभएको समाचार पनि छापिए ।

एकातिर आर्थिक संकट । अर्कोतर्फ शोले राम्रो गति लिन नसक्नु ।

एउटा यस्तो फेज आइदियो, जहाँ कमेडी च्याम्पियन टिम नै आत्तिइसकेको थियो । जति लगानी भयो, त्यसलाई माया मारिदिऊँ भन्नेसम्मको सोच उनीहरूमा आएको थियो ।

कमेडी च्याम्पियन टिम : निर्माता केकी अधिकारी, निर्देशक विशाल भण्डारी र निर्माता तथा होस्ट रीमा विश्वकर्मा ।

निर्माता केकी अधिकारी, निर्माता तथा होस्ट रीमा विश्वकर्मा निकै डराएका थिए । विशाल पनि नडराएका होइनन् । तर, आफैँ लिडर भएकाले उनले त्यो डर देखाउन सकेनन् । बरु उल्टै टिमलाई सम्झाउँथे- 'नडराऊँ, केही एपिसोडपछि सबै ठीक हुन्छ ।'

विशाल भन्छन्, 'सुरुवाती दिनमा हामी लुक्समा केही कमजोर भएका थियौँ । त्यो कुरालाई बुझेर हामीले लुक्समा मिहिनेत गर्‍यौँ । अन्तत: हाम्रो मिहिनेत खेर गएन ।'

विशाल सुरुदेखि नै एउटा कुरामा विश्वस्त थिए- 'शो मध्य समयमा पुग्दा हिट हुन्छ' । आखिर त्यही भयो ।

प्रतियोगी सजन श्रेष्ठले 'एपिसोड– ९' मा पत्रकार ऋषि धमलामाथि गरेको रोस्ट पहिलो पटक सामाजिक सञ्जालमा भाइरल भयो । पछि वाइल्डकार्डको एपिसोडमा प्रतियोगी सुमन कोइरालाले प्रस्तुत गरेको 'दले दाइ'को प्रस्तुतिले शोलाई नयाँ उचाइ थियो ।

फाइनलसम्म आइपुग्दा शोले सँगसँगै प्रसारण भइरहेका फ्रेन्चाइज शोहरूलाई नै माथ खुवाइदियो ।

कमेडी च्याम्पियनको जन्म

नेपाली टेलिभिजनहरूमा रियालिटी शोको लोकप्रियता बढिरहेको थियो । अझ भन्ने हो भने फ्रेन्चाइज शोहरूले टीभीमा वर्चस्व नै जमाइरहेका थिए ।

विशालले दुई फ्रेन्चाइज शो 'नेपाल आइडल' र 'द भ्वाइस अफ नेपाल'को निर्देशकीय टोलीमा बसेर काम गरिसकेका थिए । उनलाई रियालिटी शोको विषयमा धेर-थोर ज्ञान थियो ।

दुई शोमा काम गरेपछि विशाल आफैँ रियालिटी शो सुरु गर्न सकिन्छ कि भन्ने विषयमा घोत्लिन थाले ।

विशाललाई चलिरहेको शोभन्दा फरक शो गर्नुपर्ने चुनौती त छँदै थियो, त्योभन्दा ठूलो चुनौती फिल्मबाट खेपेको आलोचनाको काम गरेर नै जवाफ फर्काउनु थियो । सुरुमा केही फ्रेन्चाइज शो गर्ने कि भन्ने सोच बनाएका विशालले पछि अर्ग्यानिक शो गर्ने निधो गरे ।

'अर्ग्यानिक त गर्ने तर, कुन विधाको गर्ने ?', उनको दिमागमा उब्जिएको अर्को प्रश्न यही थियो । गायनका लागि दुई फ्रेन्चाइज शो थिए, डान्सिङका लागि पनि फ्रेन्चाइज भित्रिइसकेको थियो ।

कमेडी जनराको फिल्म बनाएर कमेडीको रस चाखिसकेका विशालको ध्यान कमेडीमा पुग्यो- 'ए, कमेडी रियालिटी शो त छैन नि ।'

विशालले अध्ययन सुरु गरे । विभिन्न देशका विभिन्न कमेडी शो हेरे । त्यो मात्रै होइन, रियालिटी शो गर्दा आउने प्रतियोगीहरू छन् कि छैनन् भन्ने विषयमा पनि विशालले अध्ययन गरे ।

विशाल भन्छन्, ‘म त्यो समयमा विभिन्न रेस्टुरेन्टहरूमा पुगेर स्ट्याण्डअप कमेडीहरू हेर्ने गर्थें । यत्तिका कमेडियनहरू आए हाम्रो शो पनि उठ्छ र उनीहरूले पनि गतिलो प्लेटफर्म पाउँछन् भन्ने लागेपछि मैले कमेडी रियालिटी शो गर्ने निधो गरेको थिएँ ।’

विशालले सुरुमा 'कोहलपुर एक्सप्रेस'बाट सहकार्य गरेकी केकीसँग सल्लाह गरे । केकी केही अलमलमा परिन् । तर, विशालले केकीलाई भरोसा दिए । पछि रीमा विश्वकर्मालाई पनि टिममा विश्वास दिलाए ।

सबै टिम सकारात्मक भएपछि अन्तत: विशालले नै शोको नाम जुराए, ‘कमेडी च्याम्पियन’ ।

कमेडी च्याम्पियनको औपचारिक घोषणा कार्यक्रममा टिम ।

फ्रेन्चाइजको चेपुवाबाट निस्केर फ्रेन्चाइजलाई नै माथ

नेपालमा रियालिटी शो नबनेका थिएनन् । तर, यहीँ उत्पादन भएका रियालिटी शोहरूले खासै बजार पिट्न सकेका थिएनन् ।

जब नेपालमा फ्रेन्चाइज शो 'नेपाल आइडल' भित्रियो, तब रियालिटी शो जगतमा कायापलट नै भयो । दर्शकले त्यसको चर्चा गर्न थाले । यसैको सिको गर्दै विभिन्न रियालिटी शोहरू जन्मिए ।

फ्रेन्चाइज शो हुनेबित्तिकै टीभीदेखि विज्ञापन एजेन्सीसम्मले पत्याइदिन्थे । उनीहरू शोमा लाखौँ लगानी गर्न तयार हुन्थे । त्यसैले पनि धेरैको ध्यान फ्रेन्चाइजले तानिरहेको थियो ।

यहाँ बनेका शो नचल्ने र विदेशी शोहरूले दबदबा बनाइरहेको समयमा विशालले 'कमेडी च्याम्पियन'को दाउ मारेका थिए । सुरुवाती दिनमा न उनलाई विज्ञापन एजेन्सीले पत्यायो, न टीभीले नै । दुःख-सुख उनले शो सुरु गरे ।

विशाल भन्छन्, 'फ्रेन्चाइज शो छ भने नयाँ मान्छेले बनाउन लागेको भए पनि विज्ञापन एजेन्सीहरूको हारालुछ हुन्छ । तर, नयाँ गर्न खोज्दा कसैले साथ दिँदैनन् । त्यो हामीले भोग्यौँ ।'

विस्तारै शो हिट हुँदै गएपछि भने 'कमेडी च्याम्पियन'ले सँगै प्रसारण भइरहेको 'नेपाल आइडल' लाई नै माथ खुवाइदियो । युट्युबदेखि सामाजिक सञ्जालमा 'कमेडी च्याम्पियन'ले नै वर्चस्व जमायो । सुरुमा विज्ञापन नै नपाएको कमेडी च्याम्पियनले फाइनलसम्म आइपुग्दा आएको विज्ञापन पनि राख्ने ठाउँ पाएन ।

विशालले कमेडी च्याम्पियन सुरु गर्दा आफूलाई तेस्रो स्थानमा देख्न चाहन्थे । विशाल भन्छन्, 'नेपाल आइडल, द भ्वाइस अफ नेपाल अनि कमेडी च्याम्पियन होला भन्ने लाग्थ्यो । तर, चर्चाको हिसाबमा त हामी पहिलो सिजनबाट नै नम्बर १ भइदियौँ । सायद, हामीले गरेको मिहिनेतले नै हामीलाई पहिलो बनायो ।'

अहिले कमेडी च्याम्पियनमाथि धेरै विज्ञापन एजेन्सीहरूको आँखा छ । धेरै टीभीले आफ्‍नो प्रोडक्सन बनाउन मरिमेटिरहेका छन् । यत्तिका चासो देख्दा विशाल खुसी छन् ।

'अहिले सोच्दा सुरुमा विज्ञापन एजेन्सीले नपत्याएर ठीकै गरेछन्‌जस्तो लाग्छ । यदि त्यो बेला विज्ञापन एजेन्सीले पत्याएको थियो भने सफलताको जस बाँडिन्थ्यो होला । अहिले त सम्पूर्ण जस आफैँले लिन पाइएको छ नि', विशाल दंग छन् ।

हँसाउन पाउँदाको सन्तुष्टि

पहिलो सिजनमा घाटा बेहोरेका विशाल र उनको टिमले दोस्रो सिजनबाट राम्रै नाफा झिक्यो । आफ्नो मिहिनेत र संघर्षको कमाइ खान पाउँदा को सन्तुष्ट नहोला र ? तर, विशाल कमाइसँगै आफूले हँसाउन पाएकोमा सन्तुष्ट छन् ।

कमेडी च्याम्पियन युट्युबमा आएपछि नेपालसँगै विभिन्न देशमा रहेका नेपालीहरूले प्रतिक्रिया दिन्छन् । धेरैले दोहोर्‍याउने एउटै प्रतिक्रिया छ- 'मेरो दुःख भुलाउने बहाना बनेको छ कमेडी च्याम्पियन ।'

प्रतियोगीहरूसँग निर्देशक विशाल भण्डारी ।

कसैको दुःख भुलाउने बहाना बन्न पाउँदा विशाललाई पुण्यको काम गरेझैँ लाग्छ ।

उनी भन्छन्, 'नढाँटी भन्नुपर्दा हामीले शो बनाएको व्यापारका लागि हो । यसलाई म कलाको व्यापार भन्छु । व्यापारसँगै कसैलाई खुसी पार्न सकिन्छ वा कसैको दुःख भुलाउन सकिन्छ भने त्योभन्दा ठूलो सन्तुष्टि कहाँ होला र ?'

कमेडी च्याम्पियनले दर्शक मात्र हँसाएको छैन । राम्रो प्रतिभा भएका कमेडियनलाई राम्रो स्थान दिएको छ । गरिखान सक्ने बनाइदिएको छ ।

दोस्रो सिजनका विजेता भरतमणि पौडेलले गाडी पुरस्कार पाएपछि भनेका थिए, 'मजस्तो दूरदराजमा रहेको व्यक्तिलाई अवसर दिनुभयो । मलाई गाडी चढ्न सक्ने बनाइदिनुभयो । कमेडी च्याम्पियन परिवारलाई धेरैधेरै धन्यवाद ।'

प्रकाशित मिति: बुधबार, असोज २७, २०७८ १४:४७