प्रवासी नेपालीकाे दसैँ : दिनभर काम, साँझ साथीभाइमाझ रमाइलाे अनि घरमा भिडियाे कल

प्रवासी नेपालीकाे दसैँ : दिनभर काम, साँझ साथीभाइमाझ रमाइलाे अनि घरमा भिडियाे कल

A+ A A-

मलेसिया, खाडीका देश, युरोप र अफ्रिकालगायतमा देशमा काम गर्ने धेरै नेपालीहरू दसैँ मनाउन स्वदेश फर्किने गरेका छन् । बिदामा आउन नपाएका नेपालीहरूले रोजगारी गरिरहेकाे देशमै साथी-भाइसँग मिलेर दसैँ मनाउँछन् ।

कम्पनीमा हुने कामको चाप र सम्बन्धित देशकाे फरक धर्मले गर्दा कतिपय देशमा नेपालीहरूले स्वदेशमा जस्ताे गरी दसैँ मनाउन पाउँदैनन् । खासगरी युरोप, अमेरिका, अस्ट्रेलिया, कोरिया र जापानमा दसैँ मनाउने फुर्सद नमिल्ने गरेकाे त्यहाँबाट नेपालीहरू बताउँछन् । यद्यपि, छाेटाे समय निकालेर वा कामबाट फर्केपछि भए पनि नेपालीहरूले आफ्नै तरिकाले दसैँ मनाउने गरेका छन् ।

नेपालमा आफन्तहरू भेला भएर दसैँ मनाउने परम्परा छ । तर, विदेशमा रहेका नेपालीले भने काम सकेपछि कुनै होटल अथवा कोठामा भेला भएर दसैँ मनाउँछन् ।

जापान बस्ने पाँचथरका सुमेश ओझाले उतै दसैँ मनाएकाे दुई वर्ष भयाे । उनका अनुसार जापानमा यही बेला कामको चाप बढी हुन्छ । त्यही भएर भनेजस्तो गरी दसैँ मनाउन नपाउने गरेकाे ओझा बताउँछन् ।

‘जति काम भए पनि बेलुका साथीसँग मिलेर होटलमा बसेर दसैँ मनाइन्छ । गत वर्ष त्यसरी नै मनाइयो । यो वर्ष पनि यसरी मनाउने हो’, उनले भने, ‘विदेशमा भए पनि दसैँमा मन गाउँमै हुन्छ । नेपालमा जस्तो अरूका देशमा दसैँ मनाए जस्तो हुँदैन । त्यही मन बुझाउन साथीभाइ मिलेर मनाउँछौँ ।’

त्यसबाहेक टीकाकाे दिन परिवारसँग सामजिक सञ्जालमार्फत गफ गरेर चित्त बुझाउने गरेकाे उनकाे भनाइ छ ।

काेरियामा पनि टीकाकाे दिन नेपालीहरू भेला भएर दसैँ मनाउने गरेकाे त्यहाँबाट झापाकी नानी योङहाङ बताउँछिन् । ‘सानैदेखि परिवारमा बसेर दसैँतिहार मनाउँदै आएकी थिएँ । केही वर्ष भयाे, परिवारसँग दसैँ सेलिब्रेट गर्न पाएकी छैन । यहाँ त एक दिन, त्याे पनि एकछिन मनाउँछाैँ दसैँ ।'

राेमानिया बसेर काम गर्ने पाँचथरका याेगेश सुनुवार पनि सहकर्मीसितै मिलेर दसैँ मनाउने गरेकाे बताउँछन् । ‘विदेशमा कार्यरत धेरै नेपालीहरूको साथमा नजिकका आफन्त नहुँदाको पीडा त छँदैछ । सबै नेपालीहरू एकै ठाउँमा भएर रमाइलो गर्ने अवसर पनि कमै मात्र मिल्छ’, उनले भने, ‘दसैँ, तिहार, छठ, लोसार, माधीजस्ता पर्वहरू विदेशमा पनि नेपालीबीच उत्तिकै महत्त्व दिएर मनाइन्छ । फरक यति मात्र हो, नेपालमा जस्तो हुँदैन ।’

पछिल्लो समय सामाजिक सञ्जालले दसैँमा परिवारसँग नै भएजस्तो महसुस गराएकाे उनको भनाइ छ । विदेशमै परिवार भएकाहरूले आफ्नो नेपाली भाषा, कला, संस्कृति मौलिक परम्पराअनुसार नै चाडपर्व मनाउने गरेका छन् । वैदेशिक रोजगारीमा करिब ४५ लाख नेपाली कार्यरत छन् । जसमा दसैँका बेला ५ लाखको हाराहारीमा स्वदेश आउने गरेका छन् ।

प्रकाशित मिति: बिहीबार, असोज २८, २०७८ ०८:४८