वन अधिकृतकी श्रीमतीको हत्यारा १९ वर्षपछि पक्राउ

A+ A A-

८ असार २०५८ । हत्यास्थल भक्तपुरको कटुन्जे । मृतक ३३ वर्षीय विजयश्वरी प्रजापती । हत्याको कारण चोरी अभियोग र रिसइबी ।

१९ वर्षअघि भएको एउटा हत्या काण्डका फरार अभियुक्तलाई प्रहरीले पक्राउ गरी आज (सोमवार) सार्वजनिक गरेको छ । पक्राउ पर्ने कास्की बेगनास–५ का प्रकाश अधिकारी भन्ने देवीरमन अधिकारी हुन् ।

प्रहरीको केन्द्रीय अनुसन्धान ब्युरो (सीआईबी) को टोलीले रुपन्देहीको सिद्धार्थ नगरपालिका–१ बेलहियाबाट शनिबार नै उनलाई पक्राउ गरेको थियो ।

यसरी भएको थियो हत्या

हत्या गरिएकी विजयश्वरी प्रजापती तत्कालीन पर्सा जिल्ला वन अधिकृत तुल्सीभक्त प्रजापतीकी श्रीमती हुन् । प्रहरीका अनुसार तुल्सीभक्त प्रजापती वन अधिकृत हुँदा देवीरमन अधिकारी उनका सवारी चालक थिए ।

तुल्सीभक्त हेटौंडा सरुवा भएपछि उनका ड्राइभरलाई हटाइयो । ड्राइभर हेटौडा जान पाएनन् । तर तुल्सीभक्तले ड्राइभर देवीरमनलाई भक्तपुरको आफ्नो घरमा घरायसी कामका लागि भने राखे ।

अधिकारीले सात महिना घरेलु कामदारका रुपमा काम पनि गरे । त्यसपछि काम गर्ने छाडे । ७ महिना काम गरेको तलववापत ११ हजार रुपैयाँ तुल्सीभक्तकी श्रीमती विजयश्वरी प्रजापतीसँग मागे ।

तुल्सीभक्त हेटौंडामै थिए । अधिकारीले त्यसपछि काम छाडे र वारम्वार तलव माग्न थाले । ७ असारमा फेरि उनी तलव माग्न भक्तपुर कटुन्जेस्थित घरमै पुगे । घरमा विजयश्वरी थिइन् । उनले अधिकारीलाई काम गरेको तलब दिनुको साटो उल्टै ३ हजार चोरीको अभियोग लगाइन् । त्यसपछि अधिकारी त्यो दिन रित्तो हात घर फर्किए ।

रिसको पारो तातेका अधिकारी फेरि ८ असारमा तलव माग्न विजयश्वरीको घर पुगे । तर विजयश्वरी छोरी–छोरी स्कुल पुर्याउन गएका कारण घरमा भेटिइनन् ।

बिहान १० बजेको थियो । देवीरमन उनलाई कुरेरै बसे । छोराछोरी स्कुल पुर्याएर उनी १५ मिनेटपछि घर फर्किइन् ।

यसअघिझैं अधिकारीले ११ हजार रुपैयाँ विजयश्वरीसँग मागे । तर, उनले अधिकारीको कुरा सुनेको नसुने झैं गरिन् । त्यही रिसमा अधिकारीले घरेलु हतियार प्रयोग गरेर बिजयश्वरीको हत्या गरे । हत्यापछि उनीे विजयश्वरीले लगाएका गरगहना लिएर भागे ।

हत्या गरेकै दिन भारत

विजयश्वरीको हत्या भएको प्रहरीले सो दिन साँझ मात्र थाहा पायो । प्रहरीका अनुसार उनका छोराछोरी स्कुलबाट घर फर्केपछि हत्या भएको थाहा भयो । प्रहरीले घटना ढिलो थाहा पाउँदा अधिकारी त्यही दिन भारतको रक्सौल पुगेको सीआईबीका प्रमुख डीआईजी निरजबहादुर शाही बताउँछन् ।

हत्या गरेर भागेका देवीरमन गत शनिवारसम्म भारतको बनारस, पुर्णे, बुम्बईलगायतका स्थानमा बस्दै आएको प्रहरीको भनाइ छ । उनी नेपाल आएको सूचनाको आधारमा उनलाई पक्राउ गरिएको शाहीको भनाइ छ ।

उनलाई हत्या अभियोगमा भक्तपुर जिल्ला अदालतमा मुद्धा चलाउने तयारी भइरहेको प्रहरीले जनाएको छ ।

प्रकाशित मिति: मंगलबार, जेठ २८, २०७६ ०५:२५