अलबिदा सन्तोष र आयुष

A+ A A-

सहकर्मीहरु सन्तोष भण्डारी र आयुषराज पाण्डेको मोटरसाइकल दुर्घटनामा परी भएको निधनप्रति शिलापत्र परिवार मर्माहत भएको छ । काठमाडौंको माइतीघर मण्डलामा शुक्रबार राति साढे १० बजे बा७२प ९५७१ नम्बरको मोटरसाइकल बा१७च ४३८४ नम्बरको कारमा ठोक्किँदा पाण्डेको सोही दिन अस्पताल लैजाँदै गर्दा बाटोमै र भण्डारीको उपचारका क्रममा आइतबार राति निधन भएको हो । भण्डारीको अन्त्येष्टि सोमबार गरिएकाे छ भने आयुषको अन्त्येष्टि शनिबार नै गरिएको थियो ।

तेह्रथुम स्थायी घर भई काठमाडौंको बालाजु बस्दै आएका २२ वर्षीय भण्डारी शिलापत्र मिडियाको भगिनी संस्था मिडिया बैंकको मार्केटिङ डिपार्टमा कार्यरत थिए । यस्तै, काठमाडौं मध्यबानेश्वरका २३ वर्षीय पाण्डे पनि मिटिङ पोइन्टको मार्केटिङ डिपार्टमा कार्यरत थिए । संघर्षका पाइला चाल्दै गरेका र प्रशस्तै सम्भावना बोकेका युवाको अल्पायुमै भएको निधनप्रति हामी स्तब्ध छौं ।

एउटै छतभित्र रहेर शिलापत्रको टिमले सन्तोष र आयुषसँग गरेको कामका क्रममा उनीहरुको अथक मेहनत र मिलनसार स्वभावबाट निकै लाभान्वित हुने अवसर पाएको थियो । उनीहरुको निधनले हाम्रो संस्थालाई ठूलो क्षति भएको छ ।

दुवैजनाको असामयिक स्वर्गारोहणप्रति गहिरो दुःख एवं भावपूर्ण श्रद्धाञ्जली प्रकट गर्दछौं । यो दुःखद् घडीमा शोक सन्तप्त परिवारप्रति हार्दिक समवेदना प्रकट गर्दै बिछोडको पीडामा परिवार र सहकर्मीहरुलाई धैर्यधारण गर्ने शक्ति मिलोस् भनी कामना गर्दछौं ।

प्रकाशित मिति: मंगलबार, जेठ २८, २०७६ ०४:३०