फिफाबाट प्रतिबन्धित गणेश थापालाई हेटौंडा उपमहानगरको २५ लाख, विवादबाट बच्‍न सुटुक्क सम्झौता

फिफाबाट प्रतिबन्धित गणेश थापालाई हेटौंडा उपमहानगरको २५ लाख, विवादबाट बच्‍न सुटुक्क सम्झौता

A+ A A-

भ्रष्टाचारको अभियोगमा फुटबलको सर्वोच्च निकाय विश्व फुटबल महासंघ (फिफा) को प्रतिबन्धमा परेका गणेश थापासँग हेटौंडा उपमहानगरपालिकाले २५ लाखको सम्झौता गरेको छ।

फिफाबाट भ्रष्टाचारजस्तो गम्भीर मुद्दामा १० वर्षका लागि प्रतिबन्धित पूर्व एन्फा अध्यक्ष गणेश थापालाई उपमहानगरपालिकाले एकेडेमी खोल्न २५ लाख रुपैयाँ दिनेगरी सम्झौता गरेको हो ।

थापालाई फिफाले गत कार्तिक २०७२ मा कुनै पनि फुटबल गतिविधिमा संलग्न हुन नपाउने गरी १० वर्षका लागि प्रतिबन्ध लगाएको थियो भने २१ लाख रुपैयाँ जरिवाना समेत गरेको थियो।

हेटौंडा उपमहानगरपालिकाले भने उनै गणेश थापा आवद्ध नेपाल स्पोर्टस अर्गनाइजेसनसँग उपमहानगरले मंगलबार जिल्लामा फुटबल एकेडेमी सञ्चालन गर्ने उद्देश्यले सो सम्झौता गरेको हो । यसअघि उपमहानगरले पत्रकार सम्मेलन गरेर सम्झौताबारे जानकारी दिने तयारी गरेपनि नगर प्रमुख हरिबहादुर महतले यो विषय विवादमा आउने थाहा पाएर सुटुक्क सम्झौता गरेका छन् ।

उपमहानगरले लुकाउन खोजेपनि थापाले भने आफ्नो फेसबुकबाट सम्झौता सार्वजनिक गरेका छन् ।

हेटौंडा उपमहानगरका प्रमुख प्रशासकीय अधिकृत शिवराज चौलागाईं र थापाले एकसाथ सम्झौता सार्वजनिक गरेको तस्वीर थापाले फेसबुकमा राखेका छन् । सो फेसबुक पोस्टमा थापाले नगर प्रमुख महत, उनलाई सहयोग गर्ने वडा अध्यक्षहरु र कार्यकारी प्रमुख चौलागाईंलाई धन्यवाद दिएका छन् ।

उनले सम्झौतालगायतका विषय पत्रकार सम्मेलन गरेर जानकारी दिने पनि उल्लेख गरेका छन् ।

तर यो खबर बाहिरिएसँगै उपमहानगरको आलोचना हुन सुरु भएको छ । आर्थिक अनियमितताको आरोपमा फिफाबाट प्रतिबन्धित थापासँग सम्झौता गरेको भन्दै आलोचना भएको हो ।

स्रोतका अनुसार एकेडेमी सञ्चालन गर्ने योजनासहित बजेटको प्रस्ताव थापाले नै ल्याएको बताइएको छ । एक कार्यपालिका सदस्यका अनुसार थापाको प्रस्तावमाथि कार्यपालिका बैठकमा छलफल पनि भएको बताइएको छ।

हेटौंडाकी उपप्रमुख मिनाकुमारी लामाले आफूलाई थापासँग भएको सम्झौताबारे थाहा नभएको बताइन् । ‘कार्यपालिका बैठकमा कुरा चाहिँ उठेको थियो । कार्यपालिकाबाट निर्णय नै भएको जस्तो पनि लाग्दैन । सम्झौता भएको भर्खरै थाहा पाउँदै छु’, लामाले भनिन् ।

यसअघि एकेडेमी सञ्चालनका लागि टेन्डर आह्वान गरेर प्रक्रिया अगाडि बढाउनेबारे छलफल पनि भएको लामाले बताइन् । सम्झौताबारे बुझ्न नगर प्रमुख महतलाई पटकपटक फोन सम्पर्क गर्न खोजेपनि सफल हुन सकेन ।

सम्झौताबारे उपमहानगरका प्रमुख प्रशासकीय अधिकृत चौलागाईंले धेरै खुलेर कुरा गर्न चाहेनन् । उनले नगर प्रमुखसँगै सबैकुरा गर्न आग्रह पनि गरे ।

‘नगरसभाबाट पनि पास भएको योजना र कार्यपालिका बैठकबाट पनि निर्णय भएकोले कार्यान्वयनका लागि सम्झौता गरिएको हो,’ चौलागाईंले भने, ‘सम्झौता भएको हो । सम्झौता के कसरी किन यसको बारेमा म धेरै भन्न सक्दिनँ । मेयर साहब आएपछि सबै कुरा हुन्छ ।’

प्रकाशित मिति: बुधबार, असोज १३, २०७८ १९:५१