अवैधरुपमा मलेसिया बसिन्, बच्चा जन्माएर हत्या गरेकाे अभियाेगमा जेल परिन्

A+ A A-

मलेसियाको मालाका राज्यको आलोर गाजाहस्थित कम्पनीमा कार्यरत एक नेपाली महिलालाई मलेसियन प्रहरीले गत बुधबार पक्राउ गर्‍यो ।

२८ वर्षीया ती महिलाले बच्चा जन्माएर हत्या गरी कोठामै प्लास्टिकमा पोको पारेर राखेको सूचना मलेसियन प्रहरीले पाएलगत्तै उनलाई पक्राउ गरेको हो । आफू बसेको होस्टलकै ओछ्यानमा बच्चाको हत्या गरी प्लास्टिकमा पोको पारेकाे अवस्थामा ती महिला पक्राउ परेको प्रहरीले मलेसियास्थित नेपाली दूतावासलाई जानकारी गराएको छ ।

दूतावासका अनुसार ती महिला १० वर्षदेखि मलेसियामै अवैध रुपमा बसेर काम गदै आएकी थिइन् । सो अवधिमा उनले थुप्रै कम्पनीमा काम गरिसकेको प्रहरीलाई बयान दिएकी छिन् ।

पछिल्लो समय एक नेपालीभाषी भारतीय युवासँगकाे सम्बन्धले गर्भ बसेकाे उनले प्रहरीलाई बताएको दूतावासले जनाएकाे छ । ती महिलाले गर्भपतन गराएकी हुन् वा बच्चा जन्माएर हत्या गरेकी हुन् खुल्न नसकेकाे दूतावासका अधिकारीले बताएका छन् । प्रहरीले भने बच्चा जन्माएर दुई जना मिलेर हत्या गरेको आराेप लगाएकाे छ ।

प्रहरीले महिलाका प्रेमीलाई हालसम्म पक्राउ गर्न सकेको छैन । महिलालाई भने मलेसिया प्रहरीले गत बिहीबार नै अदालतमा उपस्थित गराइसकेको छ ।

ती महिला विगत १५ दिनदेखि काममा नगइ कोठामा आराम गरेर बसेकी थिइन् । शरीर, हातखुट्टा सुन्निएर बिरामी परेपछि उपचारका लागि अस्पताल जाँदा ती महिला सुत्केरी रहेकाे चिकित्सकले थाहा पाएका थिए । मलेसियामा अवैध गर्भधारण गर्नु र बच्चा जन्माउन कानुनी बन्देज छ । सोहीकारण अस्पतालले प्रहरीलाई ती महिलाबारे जानकारी गराएकाे थियाे ।

मलेसियन कानुनमा अवैध सम्बन्धबाट बच्चा जन्माउने महिलालाई जन्मकैद जेल र मृत्युदण्डसम्मको सजाय हुने व्यवस्था छ । अवैध रुपमा मलेसिया बसेकाले उनीमाथि थप सजाय हुनसक्छ ।

तर ती महिलाबारे कुनै सूचना नभएको दूतावासले जनाएको छ । अवैध तवरले बसेकाले ती महिलासँग पासपोर्ट लगायतका कुनै परिचयपत्र नभएको बताइएको छ । ती महिला सन् २०११ मै मलेसिया पुगेकाे प्रहरीसमक्ष बयान दिएकी छन् ।

‘मलेसियामा अवैध रूपमा पुगेका महिला गैरकानुनी गतिविधि र अन्य माध्यमबाट धेरै पैसा कमाउन खोज्दा कानुनी फन्दामा पर्ने गरेका छन् । उनी पनि सोही अनुसार समस्या परेकाे प्रारम्भिक सूचना छ । हामी कानुनी सहायता दिने काेसिस गरिरहेका छौं', दूतावासका एक कर्मचारीले भने ।

उनका अनुसार मलेसिया रोजगारीका लागि पुगेर भारतीय, बंगाली नागरिक, मलेसियाली, फिलिपिनी र चिनियाँ नागरिकसँग प्रेम सम्बन्ध राख्ने र यस्तै खाले समस्यामा फस्ने महिलाकाे संख्या बढिरहेकाे छ । केही वर्षयता याे ठूलै समस्याका बनेकाे ती कर्मचारीले बताए ।

मलेसियामा १ लाख ६० हजार नेपाली अवैध रुपमा बसिरहेको दूतावासकाे अनुमान छ । त्यसमा महिलाकाे संख्या पनि उल्लेख्य छ ।

अवैध रुपमा बस्ने नेपालीहरु बारम्बार समस्या पर्ने गरेको मलेसियाका लागि नेपालका राजदूत उदयराज पाण्डे बताउँछन् । अवैध रुपमा बसेका नेपालीहरु समस्यामा परे उद्धार गर्न, कागजात बनाउन र स्वदेश फर्काउन पनि समस्या हुनेगरेको उल्लेख गर्दै उनी भन्छन्, 'अवैध रूपमा मलेसिया आउने र पैसा कमाउने लोभले जतिसुकै जाेखिममा भए पनि स्वदेश नफर्किने प्रवृत्तिले समस्या भइरहेकाे छ ।'

रोजगारीको खोजीमा मलेसिया पुगेका १ सय १० जना नेपाली विभिन्न किसिमका आपराधिक क्रियाकलापमा संलग्न, करार अवधि सकिए पनि स्वदेश नफर्किएको तथा कम्पनीबाट भागेर अवैध बनि जेल परेकाे दूतावासले जनाएको छ ।

प्रकाशित मिति: मंगलबार, असोज १२, २०७८ २०:५६