इजरायलमा तिहारअघि नै कामदार पठाइने, पहिलेजस्ताे समस्या नहुने विभागकाे दाबी

इजरायलमा तिहारअघि नै कामदार पठाइने, पहिलेजस्ताे समस्या नहुने विभागकाे दाबी

A+ A A-

इजरायल रोजगारीका लागि छनोट भएका १ हजार ६ सय जनामध्ये चिठ्ठा प्रक्रियाबाट छानिएका कामदार तिहारअघि नै पठाउने तयारी भइरहेको वैदेशिक रोजगार विभागले जानकारी दिएको छ ।

विभागले भाषा परीक्षा र अन्तर्वार्ताबाट छानिएकाहरूकाे सूची सोमबार सार्वजनिक गरेको थियो । नेपाल र इजरायल सरकारबीच भएको श्रम सहमतिअनुसार ७० प्रतिशत महिला कामदार र ३० प्रतिशत पुरुष कामदार छनोटमा परेका विभागले जनाएको छ ।

चिठ्ठाबाट छनोटमा परेका कामदारहरूको योग्यताक्रम सूची तयार पारी नेपालस्थित इजरायली राजदूतावासमार्फत पिआइबिएमा पठाइने विभागले जनाएको छ । अन्तिम सूचीमा परेका कामदारलाई चिठ्ठाबाट छनोट गर्ने काम इजरायलस्थित पपुलेसन इमिग्रेसन र बोर्डर अथोरिटी (पिआइबिए)ले गर्ने छ ।

पिआइबिएले चिठ्ठा प्रक्रियामार्फत नाम छानेर पठाएपछि नेपालबाट कामदार पठाउन सुरु हुनेछ । पिआइबिएले पहिलाे चरणमा कति जनाकाे नाम छनोट गरेर पठाउँछ सोहीअनुसार कामदार पठाउन थालिने वैदेशिक रोजगार विभागका महानिर्देशक दिपक काफ्लेले जानकारी दिए ।

तिहारअघि नै कामदार पठाउने गरी काम भइरहेको उनले बताए ।

विगतमा जस्तो समस्या हुँदैन

सरकारले नेपालबाट रोजगारीमा इजरायल कामदार पठाउन सन् २०१५ मै सुरु गरेको थियो । तर, इजरायल सरकारले प्रविधिक कारण देखाउँदै नेपालबाट सन् २०१८ बाट कामदार लिन छाडेको थियो ।

सन् २०१५ मा भएको श्रम सम्झौता अनुसार ३ वर्षमा तीन सय कामदार आपूर्ति गर्ने इजरायलसँग समझदारी भए पनि यो अवधिमा १ सय ६ जना मात्र इजरायल पुगेको विभागको तथ्यांक छ ।

त्यतिबेला इजरायल जानका लागि विभागले पहिलो चरणमा गरेको आवेदनमा ८ सय १८ जनाले दरखास्त दिएका थिए । त्यसबाट अन्तिम भाषा परीक्षामा १ सय जना सहभागीमध्ये ५९ जना मात्रै छनोट भएर राेजगारीका लागि इजरायल पुगेको विभागले जनाएको छ ।

दोस्रो वर्ष करिब १ हजार जनाले आवेदन दिएका थिए । जसमा ६० जना अन्तिम छनोटमा परे पनि अन्त्यमा ४७ जना मात्र इजरायल पुगेको विभागको तथ्यांक छ । तेस्रो वर्ष इजरायलले कामदारको माग नै गर्न छाडेको थियो ।

सन् २०१५ मा भएको श्रम सम्झौतालाई आधार मानेर दुई देशबीच गत वर्षको असोज महिनामा पुनः श्रम सम्झौता भएका कारणले पहिलाको जस्तो समस्या सिर्जना नहुने विभागका महानिर्देशक काफ्लेको दाबी छ ।

इजरायलको हेरचाह केन्द्रमा सहायक कामदारका लागि जाने नेपालीको उमेर २५ वर्ष पूरा भई ४५ वर्ष ननाघेको हुनुपर्ने उल्लेख छ । त्यस्तै उचाइ कम्तीमा १.५ मिटर र तौल कम्तीमा ४५ केजी हुनुपर्ने छ । इजरायल गएर फर्किएका कामदारले आवेदन दिन नपाउने प्रावधान राखिएकाे थियाे ।

इजरायल जाँदा हवाइ भाडा, स्वास्थ्य बीमा, अभिमुखिकरण, पासपोर्ट, पीसीआरसहितको स्वास्थ्य परीक्षण, कल्याणकारी कोषसहित एक लाख ६५ हजार ७ सय शुल्क कामदारले व्यहोर्नुपर्ने छ ।

नेपालबाट इजरायल रोजगारीमा जाने कामदारको मासिक कमाइ १ लाख ९० हजारसम्म हुनेछ ।

प्रकाशित मिति: मंगलबार, असोज १२, २०७८ ११:४८