नझुक्किनाेस् याे खाेला हाेइन, कपनकाे बाटाे हाे (भिडियाेसहित)

A+ A A-

ढलको उचित व्यवस्थापन नहुँदा काठमाडाैं कपनवासी बर्सेनि जनधनकाे क्षति बेहाेर्न बाध्य छन् । गत मंगलबार मात्र तेन्जिङ चाेकनजिकैकाे ढलमा खसेर ११ वर्षीय बालक बेपत्ता भएका थिए । उनकाे शव एक सातापछि ललितपुरकाे महाङ्काल गाउँपालिकास्थित बागमती नदी किनारमा भेटिएकाे छ ।

भारी वर्षा हुँदा बूढानीलकण्ठ नगरपालिकाकाे १० र १२ नम्बर वडा, काठमाडौं महानगरपालिका- ६ र आसपासका क्षेत्र डुबानमा पर्ने गरेका छन् । कपन मिलनचोक, गोपीकृष्ण हल, सरस्वतीनगरलगायत क्षेत्रका सडक हिजाे पनि जलमग्न थिए ।

पानी र हिलोले भरिएको खाल्डो नदेखिँदा साना केटाकेटी, ज्येष्ठ नागरिक, युवाहरू समेत खाल्डोमा चुर्लुम्म डुब्ने गरेका छन् । यो नियती कपनवासीले बारम्बार भोग्दै आएका छन् । मिलनचोक, साततले, कपन प्रहरी प्रभाग, आकाशे धारा हुँदै बालुवाखानी पुग्ने सडकको अवस्था पनि नाजुक छ । लामो समयदेखि खनिएको ढलको खाल्डो र यसैबाट बनेको हिलो र चिप्लोबाटो माथि बग्ने पानीको भेलले यहाँका बासिन्दा र व्यावसायी आजित छन् ।

याे क्षेत्र हुँदै पहिला यज्ञमती र चखुन्चा खाेला बग्थे । बस्ती बाक्लिँदै गएपछि ती खेलालाई ढल बग्ने गरी साँघुराे पारिएकाे थियाे । तर, त्यसबेला सडककाे सामान्य मापदण्डकाे बेवास्ता गरिएकाे थियाे । सडक किनाराबाट पानी पास नहुने हुँदा १० मिनेट मात्र पानी पर्दासमेत कपन क्षेत्र डुबानमा पर्ने गरेकाे छ ।

सडकको किनारबाट पानी जाने ठाउँ नहुनु, ढल व्यवस्थापनमा धेरै त्रुटि भएकाले वर्षैपिच्छे क्षति बेहाेर्नुपरेकाे स्थानीय बूढानीलकण्ठ-१० कपनका दिवाकर बाँस्काेटा बताउँछन् । चाबहिलस्थित गोपीकृष्ण हलनजिकैको ढल फुटेर सडकबाट पानीको भेल निस्कने गरेको छ । कालोपत्र गरिएको सडक पनि ढलको पानीले उप्काएकाले त्यहाँ ठूलाठूला खाल्डा बनेका छन् ।

मिलनचोकमा पानी परेपछि सडक र पसलको पेटीबाटै खोलो बग्ने गरेकाले स्थानीयवासी सडक पार गर्नसमेत सक्दैनन् । सडकमा भएका ठूल्ठूला खाल्डासमेत भरिएर आउने बाढीका कारण मोटरसाइकल, साइकल र स्कुटर चलाउनेले खाल्डो नदेख्दा दुर्घटनासमेत हुने गरेको बाँस्काेटाले बताए ।

कपनकाे सडकमा खाेला, स्थानीयकाे गुनासाे- भाेलि के हाेला ?

- आइतबार दिउँसो कपनको सडकमा देखिएको दृश्य pic.twitter.com/EX4Hxlihzl
— Shilapatra (@Shilapatra) September 27, 2021

'पानी परेका बेला घुँडासम्म आउँछ ढलको पानी । जुत्ताचप्पल खाेल्याे, हातमा बाेक्याे अनि हिँड्नुपर्छ', स्थानीय बाँस्काेटाले भने, 'हाम्राे याे समस्या वर्षौंदेखिकाे हाे । धेरैपटक हामीले सम्बन्धित निकाय तथा जनप्रतिनिधिसँग बाटो मर्मत तथा स्तरोन्नतिका लागि माग गरियाे तर काम भएकाे छैन ।'

बूढानिलकण्ठ- १२ का वडा अध्यक्ष शम्भू भट्टराई आफू स्वं यो समस्या भोगिरहेकाे बताउँछन् । 'एउटा ढल हालियो, पुगेन । अर्को थप्याैँ । तैपनि समस्या समाधान भएन', भन्छन् 'याे समस्याकाे दीर्घकालीन समाधानका लागि उपत्यका प्राधिकरणबाट काम हुँदैछ । टेन्डर परिसकेकाे छ । १०/१५ दिनपछि काम सुरु हुन्छ ।'

प्रकाशित मिति: सोमबार, असोज ११, २०७८ १२:१४