कांग्रेस अधिवेशन: चितवनका सातै पालिकाले पाए नयाँ नेतृत्व, पौडेल समूह हावी

A+ A A-

नेपाली कांग्रेस चितवनका सातवटै पालिकामा नयाँ नेतृत्व चयन भएको छ । भरतपुर महानगरपालिकासहित सातवटै पालिकामा निर्वाचनमार्फत नेतृत्व चयन गरिएको हो । चितवनमा वरिष्ठ नेता रामचन्द्र पौडेल पक्ष बलियो छ ।

भरतपुर महानगरपालिका, माडी नगरपालिका, खैरहनी नगरपालिका, कालिका नगरपालिका र इच्छाकामना गाउँपालिका वरिष्ठ नेता रामचन्द्र पौडेल पक्षले जित हासिल गरेको छ भने रत्ननगर नगरपालिका र राप्ती नगरपालिकामा सभापति शेरबहादुर देउवा समूहका उम्मेदवार विजयी भएका छन् ।

भरतपुर महानगरमा अधिकारी निर्वाचित

नेपाली कांग्रेसको चितवनको भरतपुर महानगरपालिकाको सभापतिमा चित्रसेन अधिकारी निर्वाचित भएका छन् ।

सोमबार बिहान सकिएको मतगणना अनुसार प्रत्यासी भरत अधिकारीलाई पराजित गर्दै चित्रसेन सभापतिमा निर्वाचित भएका हुन् । सभापतिमा निर्वाचित चित्रसेनले ६ सय ४९ मत प्राप्त गर्दा निकटतम प्रतिद्वन्द्वी भरत अधिकारीले ५४६ मत पाए । सभापतिमा निर्वाचित चित्रसेन र पराजित भएका भरत दुवै वरिष्ठ नेता पौडेल समूहका हुन् ।

उपसभापतिमा बुद्धिकान्त न्यौपाने र विजय घले निर्वाचित भएका छन् । न्यौपानेले ६ सय ६१ र घलेले ५ सय ५६ मत प्राप्त गरे । महानगर सचिवमा प्रनिशा गुरुङ र कृष्ण बगाले निर्वाचित भए । गुरुङले ५ सय ४६ र बगालेले ४ सय ५६ मत प्राप्त गरे ।

यस्तै, सह-सचिवमा उपेन्द्र पण्डित र कल्पना खड्का पौडेल विजयी भएका छन् । पण्डितले ५ सय १३ र पौडेलले ४ सय २० मत प्राप्त गरे । आइतबार भएको निर्वाचनमा १ हजार ४ सय ६६ मत खसेको थियो ।

खैरहनी नगरमा श्रेष्ठ निर्वाचित

खैरहनी नगर सभापतिमा गुणराज श्रेष्ठ विजय भएका छन् । श्रेष्ठ शशी खनियाँलाई पराजित गर्दै सभापतिमा निर्वाचित भएका हुन् । श्रेष्ठ वरिष्ठ नेता पौडेल समूहका हुन् । श्रेष्ठले १४५ प्राप्त गरे भने उनका निकटतम प्रतिस्पर्धी खनियाँले १४२ मत पाए । यस्तै, उपसभापतिमा प्रेमप्रसाद रेग्मी १४२ मत र विक्रम पञ्जियार महतो १३५ मतका साथ विजयी भएका छन् । यस्तै, सचिवमा अनुप अधिकारी र टीकादत्त इटनी निर्वाचित भएका छन् ।

कालिकामा केसी निर्वाचित

कालिका नगरपालिकाको सभापतिमा दीपेश्वर केसी निर्वाचित भएका छन् । सभापतिमा निर्वाचित केसीले ११२ मत प्राप्त गर्दा उनका निकटम प्रतिद्वन्द्वी लिलाबहादुर गुरुङले १०९ प्राप्त गरे । केसी पनि पौडेल समूहकै हुन् । नगर सभापतिका लागि शिवप्रसाद शर्मा पौडेलले उम्मेद्वारी फिर्ता लिएपछि दीपेश्वर केसी र लीलाबहादुर गुरुङबीच प्रतिस्पर्धा भएको थियो ।

माडीमा भुसाल निर्वाचित

माडी नगर सभापतिमा कोमलनाथ भुसाल निर्वाचित भएका छन् । भुसाल खेम महतोलाई पराजित गर्दै सभापतिमा निर्वाचित भएका हुन् । भुसालले ७४ मत प्राप्त गर्दा उनका निकटम प्रतिद्वन्द्वी महतोले ७१ मत पाए । भुसाल पनि वरिष्ठ नेता पौडेलनिकट मानिन्छन् । उपसभापतिमा गणेश पौडेल र मायानाथ अधिकारी निर्वाचित भएका छन् । नगर सचिवमा भने कपिल अधिकारी र लोकनाथ लामिछाने सर्वसम्मत चयन भएका छन् । त्यस्तै सह-सचिवमा इन्द्रप्रसाद चापागाई र दीक्षा भट्टराई निर्वाचित भए ।

इच्छाकामना श्रेष्ठ निर्वाचित

इच्छाकामना गाउँपालिकाको सभापतिमा कीर्तिकुमार श्रेष्ठ निर्वाचित भएका छन् । श्रेष्ठ विष्णुकुमार कुँवरलाई चार मतले पराजित गर्दै सभापतिमा निर्वाचित भएका हुन् । श्रेष्ठ पनि वरिष्ठ नेता पौडेल समूहकै हुन् । सभापतिमा निर्वाचित श्रेष्ठले ६६ मत प्राप्त गर्दा कुँवरले ६२ मत पाए । उपसभापतिमा देवलाल गुरुङ र दीपक खनाल निर्वाचित भएका छन् । त्यस्तै, सचिवमा तुलबहादुर गुरुङ र हीरा गुरुङ विजयी भएका छन् ।

रत्ननगरमा सापकोटा निर्वाचित

रत्ननगर नगर सभापतिमा प्रह्लाद सापकोटा निर्वाचित भएका छन् । सोमबार बिहान सकिएको मतगणनाअनुसार रुपनराज घिमिरेलाई पराजित गर्दै सापकोटा सभापतिमा निर्वाचित भएका हुन् । सभापतिमा निर्वाचित सापकोटाले २ सय ४६ मत प्राप्त गरे भने घिमिरेले १ सय ६८ मत पाए । सापकोटा सभापति देउवा समूहका हुन् ।

राप्तीमा लामा निर्वाचित

राप्ती नगर कार्यसमितिको सभापतिमा देबेन्द्र लामा निर्वाचित भएका छन् । सभापतिमा निर्वाचित लामाले १२७ मत प्राप्त गरे भने उनका निकटम प्रतिद्वन्द्वी नारायण उप्रेतीले ८७ मत पाए । लामा सभापति देउवा समूहसँग निकट मानिन्छन् । उपसभापतिमा अनिता खरेल र कृष्णप्रसाद पाण्डे निर्वाचित भएका छन् । त्यस्तै, सचिवमा राजकुमार सिलवाल र लक्ष्मी कँडेल निर्वाचित भएका छन् ।

प्रकाशित मिति: सोमबार, असोज ११, २०७८ ११:५९