सुदूरपश्चिममा कांग्रेसको अधिवेशनः को-को आए नेतृत्वमा ?

A+ A A-

सुदूरपश्चिम प्रदेशको अधिकांश जिल्लामा नेपाली कांग्रेसको गाउँ/नगर अधिवेशन सम्पन्न भएको छ ।

नेपाली कांग्रेसको १४औँ महाधिवेशन अन्तर्गत भएको गाउँ/नगर अधिवेशन सुदूरपश्चिम प्रदेशका ९ जिल्लामध्ये ८ जिल्लामा पूरा भएको हो । अधिवेशनबाट नयाँ नेतृत्व चयन गर्ने क्रममा केही ठाउँमा सहमति मै नेतृत्व चयन भएको छ भने केही स्थानमा चुनाव भएको छ ।

कैलालीमा भने क्रियाशील सदस्यता विवादका कारण वडा अधिवेशन हुन सकेको छैन । कैलालीबाहेक अन्य जिल्लाका अधिकांश स्थानीय तहको अधिवेशन सकिएको छ ।

कञ्चनपुर

कञ्चनपुरका ९ वटै स्थानीय तहको अधिवेशन सम्पन्न भएको छ । अधिवेशनबाट पुनर्वास नगर समितिमा शुकबहादुर तामाङ, बेलौरी नगर समितिमा पेपुराम चौधरी, लालझाँडीगाउँ समितिमा श्रीकृष्ण राना, बेलडाँडी गाउँसमितिमा गजबहादुर बिष्ट निर्वाचित भएका छन् ।

बिष्टले नातामा हजुरबुबा पर्ने पृतबहादुर बिष्टलाई हराएका हुन् ।

यस्तै वेदकोट नगर समितिमा तुलाराम साहु र भीमदत्तनगर समितिमा अच्युतराज कलौनी सभापतिमा निर्वाचित भएका छन् । त्यस्तै, कृष्णपुर नगर समितिमा विष्णु खड्का, शुक्लाफाँटनगर समितिमा दानबहादुर ऐर र दोधारा चाँदनीनगर समितिमा राजेन्द्र मल्ल निर्विरोध नगर सभापतिमा चुनिएका छन्।

डडेल्धुरा

डडेल्धुरामा विवादकै बीच कांग्रेसको गाउँ, नगर र वडा अधिवेशन सम्पन्न भएको छ। गाउँपालिका र नगरपालिकास्तरीय अधिवेशन एक पक्षको विरोधका बावजुद सम्पन्न भएको हो।

अमरगढी नगरपालिका र नवदुर्गा गाउँपालिकामा सर्वसम्मत रूपमा कार्यसमिति चयन भएको छ । बाँकी पाँच तहमा निर्वाचन प्रणालीबाट अधिवेशन सम्पन्न भएको छ।

अमरगढी नगरपालिकाको नगर सभापतिमा खेमराज भट्ट निर्वाचित भए । त्यस्तै, जिल्लाको नवदुर्गा गाउँपालिकामा भोजराज भट्ट गाउँपालिका सभापतिमा सर्वसम्मत निर्वाचित भएका छन् भने उनीसँगै पूरै कार्यसमिति सर्वसम्मत चयन भएको हो।

अजयमेरु गाउँपालिकामा टेकराज पाण्डेय सभापतिमा निर्वाचित भएका छन् । परशुराम नगरपालिकाको सभापतिमा भरत बडायर जोशी निर्वाचित भए ।

गन्यापधुरा गाउँपालिका सभापतिमा इन्द्र कार्की निर्वाचित भएका छन् भने आलितालमा चन्द्रदेव बोहरा गाउँपालिका सभापतिमा विजयी भएका छन् । भागेश्वर गाउँपालिका सभापतिमा डम्बरराज जोशी गाउँपालिका सभापतिमा निर्वाचित भएका हुन् ।

डोटी

डोटीका नौ स्थानीय तहमध्ये आठ स्थानीयतहमा कांग्रेसको पालिकास्तरीय समितिको नेतृत्व चयन गरेको छ । नेतृत्व चयनका क्रममा चार पालिकामा सहमति भयो ।

दिपायल सिलगढी नगरपालिकाको सभापतिमा गणेश मलासी चयन भएका छन् । सभापतिका आकांक्षीहरूबीच सहमति जुटेपछि मलासी निर्विरोध चयन भएका हुन्। उनी यसअघि पनि सोही पदमा थिए। आदर्श गाउँपालिकाको सभापतिमा चन्द्रनाथ ओझा छानिएका छन्।

यस्तै पूर्वीचौकी गाउँपालिकामा पनि सहमतिमा नेतृत्व चयन भएको छ । सभापतिमा बलबहादुर खड्का चयन भएका छन्।

केआईसिंह गाउँपालिका सभापतिमा अर्जुन बलाएर निर्विरोध चयन भएका छन् । शिखर नगरपालिकाको इकाइ समिति सभापतिमा हर्क बोगटी विजयी भएका छन्। अन्य पदहरूमा सहमति भएपनि सभापतिमा कुरो नमिलेपछि निर्वाचन गरिएको थियो । बोगटीले प्रतिस्पर्धी दीर्घबहादुर बलायरलाई २५ मतले पछाडि पार्दै सभापति भएका हुन्।

बोगटीले ९० मत प्राप्त गरे भने बलायरले ७५ मत प्राप्त गरेका छन् । सायल गाउँपालिका इकाइ समिति सभापतिका लागि भएको निर्वाचनमा तेजराज ओझाले ६१ मतप्राप्त गरी निर्वाचित भएका छन् । उनका प्रतिस्पर्धी रामबहादुर बोगटीले २५ मतप्राप्त गरे । जोरायल गाउँपालिकाको सभापतिमा मोहन मल्ल चयन भएका छन् । यसअघि पनि सोही जिम्मेवारीमा रहेका मल्लले निर्वाचनमा ५४ मत पाई विजयी भएका हुन्। उनका प्रतिस्पर्धी नरबहादुर बोहराले ३६ मत प्राप्त गरेका छन्।

बडीकेदार गाउँपालिकाको नेतृत्व चयनका लागि पनि निर्वाचन भएको छ। गाउँ इकाइ समिति सभापतिमा करुणाकर जोशीले ४१ मत प्राप्त गरी विजयी भएका छन्। उनका प्रतिस्पर्धी वीरेन्द्र कोटकेनीले ३५ मत प्राप्त गरे ।

दार्चुला

दार्चुलाका चार स्थानीय तहमा सर्वसम्मत रूपमा नेतृत्व चयन भएको छ । जिल्लाको मार्मा, मालिकार्जुन, अपिहिमाल र नौगाड गाउँपालिकामा सबै पदहरूमा सर्वसम्मत रूपमा नेतृत्व चयन भएपनि बाँकी पाँच स्थानीय तहमा नेतृत्व चयनका लागि छलफल जारी छ । मार्मा गाउँपालिकामा धनञ्जय जोशी, मालिकार्जुन गाउँपालिकामा किसन सिंह सामन्त, अपि हिमाल गाउँपालिकामा शोभन सिंह लोथ्याल र नौगाड गाउँपालिकामा प्रेम सिंह धामी गाउँपालिका सभापतिमा सर्वसम्मत चयन भएका छन् ।

बैतडी

बैतडीमा पनि कांग्रेसको अधिवेशन सम्पन्न भएको छ। अधिवेशनबाट सुर्नया गाउँपालिकामा प्रतापसिंह महराको नेतृत्वमा सर्वसम्मत समिति चयन भएको छ।

यसैगरी, शिवनाथ गाउँपालिकाको सभापतिमा हिरा चन्द चयन भएकी छन् । पञ्चेश्वर गाउँपालिकाको कार्यसमिति पनि सर्वसम्मतिमै चयन भएको छ। गाउँपालिकाको सभापतिमा रामबहादुर चन्द चयन भएका छन् । दशरथचन्द नगरपालिकाको कांग्रेस सभापतिमा भुवनराज भट्ट प्यानलसहित विजयी भएका छन् ।

त्यस्तै पुर्चौडी नगरपालिकाको कांग्रेस सभापतिमा गणेश सिंह गडाल निर्वाचित भएका छन् । जिल्लाको दोगडाकेदार गाउँपालिकाको सभापतिमा नन्दराज भट्ट प्यानलसहित विजयी भएका छन् भने मेलौली नगरपालिकाको सभापतिमा प्रमानन्द भट्ट निर्वाचित भएका छन् ।

जिल्लाको सिगास गाउँपालिकाको सभापतिमा कर्णबहादुर ऐर निर्वाचित भएका छन् । यस्तै, जिल्लाको डिलाशैनी गाउँपालिकाको सभापतिमा जयराज जोशी निर्वाचित भएका छन् ।

अछाम

अछामका १० स्थानीयतहमध्ये ६ वटा स्थानीयतहमा नयाँ नेतृत्व चयन गरिएको छ । बाँकी रहेका ४ पालिकामा सहमतिको प्रयास भैरहेको छ ।

जिल्लाको मंगलसेन नगरपालिकामा झपटबहादुर रावल, कमलबजार नगरपालिकामा पदमबहादुर भण्डारी, चौरपाटी गाउँपालिकामा धर्मबहादुर साउद, रामारोशन गाउँपालिकामा मानबहादुर साउद र ढकारी गाउँपालिकामा अध्यक्ष समेत रहेका धनबहादुर बुढाको नेतृत्वमा नयाँ कार्यसमिति चयन गरिएको छ।

बझाङ

बझाङ जिल्लामा दुई स्थानीयतहमा मात्रै कांग्रेसको गाउँ–नगर अधिवेशन सम्पन्न भएको छ। बाँकी रहेको १० स्थानीय तहमा निर्वाचनको तयारी भैरहेको छ। बझाङको बित्थडचिर गाउँपालिकामा चक्र अधिकारी नेपाली कांग्रेसको सभापति बनेका छन् । यस्तै सुर्मा गाउँपालिकामा अतित बोहराले सभापतिको जिम्मेवारी पाएका छन्।

बाजुरा
बाजुराका नौ स्थानीय तहमा चार स्थानीय तहमा मात्रै गाउँ–नगर अधिवेशन सकिएको छ । बाँकी ५ स्थानीय तहमा सर्वसम्मत नेतृत्व चयनको तयारी भैरहेको छ ।

बाजुरा जिल्ला सभापति कविराज पण्डितका अनुसार बूढीनन्दा नगरपालिका सभापतिमा मानबहादुर खड्का निर्वाचित भएका छन् ।

प्रकाशित मिति: आइतबार, असोज १०, २०७८ १९:३६