नाङ्लो बनाउने पेशामा रमाएका भूल दम्पती, मासिक ६० हजार कमाउँछन्

A+ A A-

परम्परागत पेशाबाट मनग्ये आम्दानी गर्न सकिन्छ, यसको एउटा ज्वलन्त उदाहरण हुन् देवबहादुर र कुमारीदेवी भूल ।

कैलाली मसुरियाको यो दम्पती अहिले मिलिजुली परम्परागत शैलीमा बाँसको सामान बनाउँछन्, अनि राम्रो रकम हात पार्छन् ।

उमेरले ४० वर्ष पुगेका देवबहादुरको बाबुबाजेको बिडो धान्दै बाँस र बेतका सामान बनाउने गरेका छन् । झापाली बाँस र बेतबाँसबाट उनीहरूले छिटुवा, डोको, डालो तथा नाङ्लो बनाउँदै आएका छन् । उनले बनाएको सामग्री बजारमा राम्रो मूल्यमा बिक्ने गरेको छ।

सानैदेखि जानेको यो काममा रमाएका उनलाई अहिले उनकी ३८ वर्षीया श्रीमती कुमारीदेवी भूलले पनि साथ दिएकी छन् । यो दम्पतीको संयुक्त मेहनतबाट मासिक ५०-६० हजारसम्म आम्दानी हुने गरेको बताउँछन् देवबहादुर । उनले बनाएको एउटै नाङ्लोको मूल्य ४ सय देखि ५ सयसम्म पर्छ, ग्राहक पनि खुशी भएर सो मोल तिर्छन् । उनी नाङ्लो मात्र होइन छिटुवा, डोको र डालो पनि बनाउँछन् ।

अहिले उनले बनाएको सामग्रीको माग धनगढी मात्र होइन, तराइका विभिन्न बजार तथा पहाडसम्म पुग्ने गरेको छ। आफ्नो पेशा फष्टाएकोमा सन्तुष्टि जनाउँदै देवबहादुर भन्छन्, ‘बनाएको सामान बिक्री गर्न समस्या छैन । घरबाटै पनि सामान बिक्री भइरहेका छन् । कतिपय सामान हामी धनगढीका बजारसम्म ल्याउँछौं ।’

तर अहिले कच्चा पदार्थको अभाव भएकाले उनी चिन्तित छन्। बाँस सहजै नपाउने, पाए पनि बढी मूल्य तिर्नुपर्दा सामानको लागत बढ्ने गरेको उनको गुनासो छ ।

देवबहादुर दम्पतीको यो पेशाले राम्रो आम्दानी दिए पनि उनीहरू यो काम ६ महिना मात्रै गर्छन् । ६ महिना भने खेतीपाती गर्ने गरेको उनी सुनाउँछन् । आफ्नो जमिनलाई पनि बाँझो राख्न नचाहेका उनले खेतीलाई निरन्तरता दिएका हुन् ।

श्रीमानको काममा साथ दिन पाउँदा कुमारीदेवी आनन्दित छन् । उनी पहिले चुलो चौकोमा मात्र सीमित भएपनि अहिले व्यवसायमा साथ दिन पाउँदा खुशी भएको बताउँछिन् । ‘पहिले घरको काममात्रै गर्थें, अहिले यी सामान पनि बनाउँछु ।घरको काम पनि हुने आम्दानी पनि हुने’, दंग पर्दै उनी सुनाउँछिन् ।

अहिले आफूले श्रीमानलाई साथ दिँदा धेरै सामग्री उत्पादन गर्न सकेको र आम्दानी बढेकोमा उनी खुशी व्यक्त गर्छिन् । यो काममा लागेपछि घरखर्च चलाउन सहज भएको र यही आम्दानीका कारण दुई छोरा एक छोरीलाई पढाइ रहेको उनले सुनाइन् ।

एउटैले मात्रै गर्नुभन्दा दुबै जनाले मिलेर काम गर्छौ दुबैले गरे घरखर्च चलाउन पनि सहज हुने कुमारीदेवीको भनाइ छ । परम्परागत रुपमा बनाउने यस्ता सामग्री बन्ने क्रम हराउँदै गएको भन्दै उनले यो कामलाई युवा पुस्ताले पनि निरन्तरता दिनु पर्ने बताउँछिन् ।

प्रकाशित मिति: शनिबार, असोज ९, २०७८ १४:५९