टिन्डरबाट उनले १५ जनालाई भेटिन्, गर्भनिराेधक चक्की धेरै खाइन्, अहिले डिप्रेसनमा छिन्

टिन्डरबाट उनले १५ जनालाई भेटिन्, गर्भनिराेधक चक्की धेरै खाइन्, अहिले डिप्रेसनमा छिन्

प्रतीकात्मक तस्वीर । स्रोत : आईएएनएस ।

A+ A A-

२८ वर्षीया निशा (परिवर्तित नाम) ले टिन्डर (डेटिङ एप) चलाउन थालेको चार वर्ष भयो । टिन्डरको माध्यमबाट नै उनले अहिलेसम्म १५ जनाभन्दा बढी केटाहरूसँग शारीरिक सम्बन्ध बनाइसकेकी छन् ।

अहिले आएर उनमा यौन विचलन देखिन थालेको छ । गर्भनिरोधक चक्कीको अत्यधिक सेवनले तौल असाधारण बढेको छ । हिजोआज उनलाई बाटोमा यत्तिकै हिँड्दा पनि टिन्डरबाट समय बिताएको मान्छे भेटिने हो कि भन्ने लाग्छ । ‘बिहे गर्ने मान्छे नै टिन्डरमा भेटेको मान्छे पर्‍याे भने ?’ हिजोआज उनलाई यही चिन्ताले सताउन थालेको छ । जसकारण, हाल निशामा चरम एन्जाइटी, डिप्रेसनजस्ता समस्या देखिएका छन् । अहिले उनी मनोपरामर्श लिइरहेकी छन् ।

निशाजस्तै काठमाडौंकै अर्की २७ वर्षीया युवती पनि सोही डेटिङ एपको चक्करमा डिप्रेसनको सिकार भएकी छन् । दर्जनौँ केटाहरूसँग एकैपटक डेट गरिरहेकी उनको अधिकांश समय नै यौनालाप र क्रियाकलापमा बित्न थाल्यो । ‘कहिले कसैलाई फकाउनुपर्ने, कसैलाई भेट्नुपर्ने, कसैलाई सम्झाउनुपर्ने, ...इत्यादि ! '

रमाइलोका लागि सुरु भएको सम्बन्ध विस्तारै बोझको रूपमा बदलिएसँगै उनमा एन्जाइटी देखिन थालेको हो । आफूले गरिरहेको यौनालाप र गतिविधिले आफू अस्वस्थ्य भइरहेको महसुस भएपछि हाल उनले टिन्डर नै ‘अनइन्स्टल’ गरेकी छन् । उनी पनि मनोपरामर्श लिइरहेकी छन् ।

मौलाएको ‘हुक अप कल्चर’

सम्बन्धलाई यौनको परिधिमा मात्रै बाँधेर हाल ‘टिन्डर’, ‘टनटन’ अनि ‘बम्बल’ जस्ता डेटिङ एपहरूको प्रयोगले युवामा ‘हुकअप कल्चर’ बढाएको छ । सम्बन्धलाई शारीरिक सन्तुष्टि र रमाइलोको बिन्दुमा मात्रै संकुचन गर्दै हाल युवाहरू केही क्षण (एक दिन, एक रात, एक बिहान, एक घण्टा) सँगै बिताउने ट्रेन्डमा देखिन्छन् । विडम्बनाको कुरा के छ भने केवल रमाइलो र अनुभवका लागि यौनको सिमानालाई भत्काउने युवापुस्तामा हाल यौन विचलन देखिन थालेको मनोविद्हरूको भनाइ छ ।

मनोविद् करुणा कुँवर भन्छिन्, ‘सेक्सुअल बाउन्ड्री नै नभएजस्तो देखिन्छ । जोसँग पनि गर्न मिल्छ भन्ने बुझाइ युवाहरूमा हाबी देखिन्छ ।’ यौनमा प्रयोगात्मक हुने नाममा अस्वस्थ मनोवृत्ति हाबी भएको कुँवर बताउँछिन् ।

झट्ट हेर्दा टिन्डर वा भनौँ धेरै शारीरिक सम्बन्ध हुनु नै समस्या होजस्तो देखिए पनि अन्तर्य केलाउँदै जाने हो भने यसले हाम्रो समाजको बदलिँदो मनोसामाजिक पक्षलाई उजागर गरिदिएको समाजशास्त्री चैतन्य मिश्र बताउँछन् । उनी भन्छन्, ‘यो सबै एक्लोपनको परिणाम हो ।’

कुँवर पनि यस्तै मत राख्छिन् । यस्तो समस्या लिएर आउने अधिकांश युवाको पारिवारिक, सामाजिक जीवनमा समस्या देखिने गरेको उनको विश्लेषण छ ।

एकातिर पारिवारिक, सामाजिक बन्धन नभएकाले युवाहरू एक्लोपनको सिकार हुनु र अर्कोतिर टिन्डरजस्ता डेटिङ एपले अपरिचित मान्छेसँग क्षणिक नै भए पनि नजिक हुने सुविधा उपलब्ध गरिदिनु; यसले युवाहरूको मनोसामाजिक जीवन र स्वास्थ्यलाई प्रहार गरेको मिश्रको भनाइ छ । हाल टिन्डरजस्ता डेटिङ एप युवाहरूमा एक्लोपन बिसाउने क्षणिक चौतारी बनेकाले खुसी, सन्तुष्ट हुनुको सट्टा ‘गिल्ट’, एन्जाइटी र डिप्रेसन समस्या बढेको मिश्रको बुझाइ छ ।

अस्वस्थ मनोसामाजिक स्वास्थ्य

बुखारेस्ट विश्वविद्यालयद्वारा प्रकाशित ‘सोसल इम्प्याक्ट अफ अनलाइन डेटिङ प्लेटफर्म : अ केस स्टडी अन टिन्डर’ अनुसन्धानले टिन्डरजस्ता डेटिङ एपले समाजको सामाजिक अन्तरघुलनका छिद्रहरूलाई उदाङ्गाे पारिदिएको उल्लेख छ ।

टिन्डरले सम्बन्धलाई मलजल गर्ने, प्रागाढ बनाउनेभन्दा पनि क्षणिक रूपमा जोडिने र छुट्ने ट्रेन्डलाई प्रोत्साहन गर्दै आएकाले, यसले युवाहरूमा भावनात्मक, संवेगात्मक विकास र दीर्घकालीन सम्बन्धको पारस्परिक विकासलाई स्थगित गरिदिएको निष्कर्ष अध्ययनकाे छ । साथै, टिन्डरले प्रोत्साहन गरेको शारीरिक सम्बन्धका कारण यौनजन्य रोगको समेत जोखिम बढेको बताइएको छ ।

टिन्डरले भेटघाट हुने र सामाजिक अन्तरघुलनको प्रक्रियामा कायापलट नै गरिदिएको ‘डेटिङ एप एन्ड दियर सोसियोडेमोग्राफिक एन्ड साइकोसोसल कोरिलेट्स : अ सिस्टमेटिक रिभ्यु’ नामक एक अध्ययनले जनाएको छ । तर, डेट गर्ने प्रयोजनका लागि बनेका यस्ता एपले सम्बन्धलाई केवल यौनमा सीमित गरिदिँदा यसले सामाजिक एवम् मनोसामाजिक जोखिमहरू निम्त्याउन सक्ने उक्त अध्ययनकाे चेतावनी छ ।

टिन्डर सन् २०१२ मा लन्च भएको एक डेटिङ एप हो, जसलाई २०० राष्ट्रका ५० मिलियन मानिसहरूले प्रयोग गर्दै आएका छन् । पछिल्लो समय कोभिडले गर्दा पनि अनलाइन डेट गर्नेको संख्या बढेको अनुसन्धानले देखाएको छ ।

प्रकाशित मिति: शुक्रबार, असोज ८, २०७८ ०७:५२