स्थानीय पाठ्यपुस्तकमा आफ्नै विज्ञापन गर्दै जनप्रतिनिधि

A+ A A-

स्याङ्जाको कालीगण्डकी गाउँपालिकाको स्थानीय पाठ्यपुस्तकको कभरमा जनप्रतिनिधिले आफ्नै तस्वीर राखेका छन् । जनप्रतिनिधिकै तस्वीर राखिएको पाठ्यपुस्तकको कभर संविधान दिवसका अवसरमा ३ असोजमा विमोचन गरिएको हो ।

पुस्तकको कभरमा एमाले जिल्ला अध्यक्ष सूर्यप्रसाद गैरे, गाउँपालिका अध्यक्ष खिमबहादुर थापा, वडा तहका केही जनप्रतिनिधि, शिक्षा शाखा प्रमुख भीम श्रेष्ठलगायतको सामूहिक तस्वीर राखिएको छ ।गाउँपालिकाकी उपाध्यक्ष सावित्रा कोइरालाका अनुसार संविधान दिवसका दिन औपचारिक कार्यक्रम गरेर कभर विमोचन गरिएको हो । यद्यपि यसको हार्डकपी भने बजारमा आइनसकेको उनले बताइन् ।

पाठ्यक्रम विकास केन्द्रले तयार गरेको स्थानीय पाठ्यक्रम विकास तथा कार्यान्वयन मार्गदर्शन, २०७६ मा टेकेर स्थानीय तहले आफ्नो पाठ्यक्रम बनाउँछन् । उक्त निर्देशिकामा अधारभूत तहको कक्षा १ देखि ८ सम्म एक विषय स्थानीय भाषाको पाठ्यपुस्तक पाठनपाठन गराउनुपर्ने व्यवस्था गरिएको छ ।

हाल कक्षा ८ सम्म कूल सातवटा विषय पढाइन्छन्, जसमा ६ वटा विषय संघीय सरकारले तोकेबमोजिम पढाइए पनि सातौँ विषयचाहिँ स्थानीय तहले आफैँ तयार गर्नुपर्नेछ । रैथाने संस्कार, सम्पदा विद्यार्थीलाई चिनाउन संघीय सरकारले स्थानीय तहलाई यस्तो छुट दिएको थियो ।

तर, यही छुटको दुरुपयोग गर्दै कालीगण्डकीमा नेताहरूको तस्वीर राखेर कभर विमोजन गरियो । जबकि त्यस्ता पाठ्यक्रममा स्थानीय विषयवस्तुको प्रवर्द्धन गर्ने खालको सामग्री राख्नुपर्ने थियो । बाहिर चर्को आलोचना हुन थालेपछि मेयर खिमबहादुर थापा भने उक्त तस्वीर सच्याइने बताउँछन् । ‘बाहिर आलोचना भइरहेको छ । छापाखानाले ख्याल नगर्दा यस्तो फोटो छापियो । तर, कभर मात्र विमोचन भएको हो, हार्डकपी प्रिन्ट भइसकेको छैन । जेहोस्, अब हार्डकपी बाहिर आउँदा यस्तो गल्ती हुँदैन,' उनले भने ।

एमाले जिल्ला अध्यक्ष सूर्यप्रसाद गैरे भने आफूहरूलाई थाहै नदिई सो तस्वीर सार्वजनिक गरिएको बताउँछन् । उनका अनुसार केही समयअगाडि गुरुन्दी गाउँमा होमस्टे प्रवर्द्धन गर्ने कार्यक्रममा खिचिएको तस्वीर प्रयोग गरिएको हो । गुरुन्दी गाउँ कालीगण्डकी गाउँपालिकाको वडा नम्बर ४ र ६ मा पर्छ ।

‘मैले पनि विमोचन भइसकेपछि सामाजिक सञ्जालमार्फत थाहा पाएँ । स्थानीय कुरा प्रवर्द्धन गर्ने तस्वीर राख्नुपर्ने ठाउँमा हामी नेताको फोटो प्रयोग भएछ, ‘गैरेले शिलापत्रसँग भने, ‘यसले विद्यार्थीमा पनि राम्रो सन्देश जाँदैन । यो फोटो तुरुन्तै सच्याउनुपर्छ ।'

प्रकाशित मिति: बुधबार, असोज ६, २०७८ १२:२३