दक्षिण कोरियाको सर्तअनुसार कामदार पठाइँदै, अबदेखि यूबीटीबाट भाषा परीक्षा

A+ A A-

कोरोना महामारीका दक्षिण कोरिया जान नपाएका कामदारलाई पठाउने तयारी भएको छ ।

कोरियाको मानव संशाधन विकास बोर्ड (एचआरडी) ले राखेको सर्तअनुसार नै कामदार पठाउने गरी तयारी भैरहेको वैदेशिक रोजगार विभाग अन्तर्गतको ईपीएस शाखाले जानकारी दिएको छ ।

यसअघि एचआरडीको सर्तअनुसार पठाउँदा लागत खर्च बढेको भन्दै कामदार पठाइएको थिएन । सो सर्त अनुसार नेपालबाट जाने कामदारको कोभिड बीमा हुनुपर्ने, सिधा हवाई उडान हुनुपर्ने र १४ दिन होटल क्वारेन्टिनको खर्च कामदार स्वयंले व्यहोर्नुपर्ने छ । हाल भने ती सर्तअनुसार नै कामदार पठाउने गरी तयारी भएको हो ।

दक्षिण कोरिया जाने कामदारको बीमा गर्न विभागले अजोड, प्रिमियर, शिखर, एनएलजी, प्रभु र आईएमई इन्स्योरेन्स कम्पनी छनोट गरेको छ । यी कम्पनीले कोरिया जाने कामदारको ५ हजार अमेरिकी डलरसम्मको कोरोना बीमा गर्नुपर्ने छ । कोरियाका लागि सिधा उडान गर्नका लागि टेण्डर समेत आह्वान भैसकेको छ ।

‘सिधा उडानको लागि गत महिना नै टेण्डर आह्वान भएको छ । अक्टोबरमा सिधा उडानको सम्झौतापछि नियमित उडान हुन्छ, अनि कामदार पठाउन सुरु गरिन्छ,’ ईपीएस शाखाका निर्देशक सुरेश राउतले भने, ‘कोरिया सरकारले राखेको सर्तअनुसार कोरियाली भाषा उत्तीर्ण गरेका कामदार रोजगारीमा जान इच्छुक देखिए । त्यहीअनुसार तयारी गरिएको हो ।’

कोरोना बीमा र सिधा उडानको सम्झौतापछि कामदार कोरिया पठाउने प्रक्रिया सुरु हुने उनले बताए ।

एचआरडी र ईपीएस शाखाले दक्षिण कोरिया कामदार पठाउने मिति नतोके पनि नोभेम्बर अन्तिमदेखि कामदार पठाउने तयारी भैरहेको छ ।

विभागका अनुसार भाषा परीक्षा उत्तीर्ण गरेका करिब १२ हजार कामदार रोकिएका छन् । नियमित भाषा परीक्षा पास गरेर ‘लेबर कन्ट्रयाक्ट’ आइसकेका करिब ५ हजार र कोरियाबाट प्रतिबद्ध कामदारका रूपमा फर्किएका ३ हजार श्रमिक प्रक्रिया पुगे पनि रोकिएको ईपीएस कोरिया शाखाले जानकारी दिएको छ ।

एचआरडी कोरियाका नेपाल निर्देशक किम उन डकले सबै प्रक्रिया पूरा गरेर नेपालबाट कामदार लैजाने तयारी भैरहेको र चाँडै कोरोनाको विश्वव्यापी मापदण्ड पूरा गरी नेपाली श्रमिक लिने बताउँदै आएका छन् ।

कोरोनाका कारण कोरिया जाने प्रक्रिया रोकिएपछि धेरै कामदारको श्रम सम्झौतालगायत प्रक्रियाको म्याद सकिएको छ ।

उनीहरूको श्रम सम्झौता तथा भिसा प्रक्रियामा रहेको म्याद स्वतः थपिने एचआरडीले जनाएको छ । कोरोनाका कारण दुई वर्षयता कोरियाको रोजगारी ठप्प छ । २०७६ फागुनको पहिलो सातादेखि नै ईपीएस प्रणालीमार्फत नेपाली श्रमिक कोरिया जान पाएका छैनन् ।

परीक्षाको तयारी

कोरोना संक्रमण घट्न थालेसँगै नयाँ प्रविधिबाट कोरियन भाषा परीक्षा सञ्चालन गर्ने विषयमा पनि छलफल सुरु भएको छ । तीन वर्षदेखि ईपीएसमार्फत कोरियन भाषा परीक्षा हुन सकेको छैन । परीक्षा गराउनका लागि भैँसेपाटीमा भवन तथा आवश्यक सामग्रीहरू तयार भइसकेको राउतले बताए ।

पहिलो चरणमा कोरियाबाट फर्किएकाहरूको विशेष कम्प्युटर बेस्ड टेस्ट गराइने र कोरोना जोखिम कम भएपछि यूबीटी (संयुक्त परिक्षण बेस नयाँ परीक्षा प्रणाली) प्रक्रियाबाट कोरियन भाषाको परीक्षा गराउने तयारी भइरहेको शाखाले जनाएको छ ।

यूबीटी परीक्षामा एउटा निश्चित अंक छुट्याइने र त्यसभन्दा बढी अंक ल्याउने परीक्षार्थीलाई त्यही दिन सीप परिक्षणसँगै शारीरिक परीक्षण सक्ने तयारी भैरहेको छ । शारीरिक परीक्षणको रूपमा कलर ब्लाइन्ड टेस्ट गराइने छ ।

कोरियाले नेपालबाहेक कम्बोडिया, म्यानमार, बंगलादेश, चीन, भियतना र लाओसलगायत १६ वटा देशबाट ईपीएस प्रणालीमार्फत कामदार लिँदै आएको छ । कोरोना महामारीमा पनि कोरियाले नेपालबाहेकका देशबाट कामदार आपूर्ति गरिरहेको छ ।

कोरियाले नेपाल सरकारसँग सन् २००८ मा श्रम सम्झौता गरेर कामदार लैजान थालेको थियो । ईपीएस कोरियन भाषा उत्तीर्ण गरेका ६५ हजार कामदार रोजगारीका लागि कोरिया पुगेको विभागको तथ्यांक छ ।

प्रकाशित मिति: सोमबार, असोज ४, २०७८ १८:०८