कार्यकर्ताको निष्कर्षः जागरण हामीलाई होइन नेतालाई

A+ A A-

नेपाली कांग्रेसले स्थानीय तहका कार्यकर्ता र शुभेच्छुकमा जागरण ल्याउने उद्देश्यले सुरु गरेको राष्ट्रिय जागरण अभियान आशा गरेबमोजिमको प्रभावकारी नभएको गुनसो आएको छ ।

पार्टी केन्द्रीय कार्य समितिको निर्णयमार्फत २५ वैशाखदेखि एक महिनासम्म हुने अभियानका क्रममा स्थानीय कार्यकर्ताले पार्टीका कार्यकर्तालाई भन्दा नेतालाई नै बढी जागरणको खाँचो भएको औंल्याए । अभियान शनिबारमा सकिँदै छ ।

केन्द्रीय प्रतिनिधि भएर धादिङ खटिएका केन्द्रीय सदस्य प्रदीप पौडेलले स्थानीय तहका संगठनात्मक संरचनालाई खाली गरेर कार्यकर्तामा जागरण नआउने बताए ।

उनले पार्टीको संरचना वडा, गाउँपालिका र नगरपालिकासम्म नभएको र भए पनि पूर्णता नपाएको र कतिपय तहमा विवादित भएको छ ।

नेविसंघ पूर्वउपाध्यक्ष मेदनीप्रसाद सिटौला जागरणको नाममा केन्द्रीय नेता गाउँ र जिल्ला जानुभन्दा सदस्यता विधानबमोजिम सदस्यता वितरणबाट महाधिवेशनको सुरुवात गर्नुपर्ने बताउँछन् ।

उनले भने, ‘स्थानीय गाउँ वा नगरपालिका संघीय संरचनामा गएपछि पार्टीको संगठनात्मक संरचना नै छैन । त्यसैले कुनै कार्यक्रमको आयोजना वा जिम्मेवारी कसले लिने भन्ने अन्योल छ ।’

हुन त पार्टी सभापति शेरबहादुर देउवाले पार्टीको विधानअनुसार दुई महिनाभित्र केन्द्रीय विभाग गठन गर्नुपर्ने व्यवस्था छ । तर, सभापति देउवाले महाधिवेशन भएको ३ वर्ष ३ महिना बितिसक्दा पनि ती विभाग गठन गरेका छैनन् ।

पुरानो विधान संघीय संरचनाबमोजिम नभएकोले ती विभाग र अन्य निकाय गठन नभएको तर्क गरेका सभापति शेरबहादुर देउवा र उनी निकटका नेताले गर्दै आएका छन् ।

तर, नयाँ विधान महासमिति बैठकबाट निर्माण गरेको चार महिना बिते पनि अझै ती विभाग गठन भएका छैनन् ।

सभपाति देउवाले विधानबमोजिम ३२ वटा विभाग मात्र होइन, केन्द्रीय कार्य सम्पादन समितिसमेत गठन गरेका छैनन् । पार्टीको विधान संघीय संरचनाअनुसार आएको छ ।

विधानबमोजिम सातवटा प्रदेश कार्य समिति, १ सय ६५ वटै संघीय निर्वाचन क्षेत्रमा क्षेत्रीय कार्य समिति, ३ सय २० प्रदेश निर्वाचन क्षेत्र कार्य समिति, ७ सय ५३ वटा स्थानीय तह र चार हजार बढी वडा कार्य समिति गठन गर्नुपर्ने हुन्छ ।

पार्टीको खाली रहेको संगठनात्मक संरचनालाई पूर्णता दिन बाँकी रहेको मात्र होइन, पार्टी कार्यकर्ताको बेर्ना उत्पादन गर्ने संगठनका रुपमा लिइएको नेपाल विद्यार्थी संघ गत २८ माघदेखि विघटन भएको छ । नेपाल तरुण दलको महाधिवेशन भएको अढाइ वर्ष भयो तर अध्यक्ष जितजंग बस्नेतसहित चार पदाधिकारीमै केन्द्रीय समिति सीमित भएको छ ।

विगत १० वर्षभन्दा बढी समयदेखि महाधिवेशन नभएका किसान संघ, आदिवासी जनजातिलगायतका एक दर्जन भ्रातृ संस्था निष्क्रिय छन् । निर्धारित समयमै महाधिवेशन भएको नेपाल महिला संघमा भने विवाद चर्किएर चार महिनादेखि केन्द्रीय समिति बैठक बस्न सकेको छैन ।

पार्टीको नयाँ विधानमा अन्तरिम व्यवस्थासमेत गरिएको छ । तर, विधानबमोजिम संगठनात्मक संरचनालाई पूर्णता दिँदा विरोध र असन्तुष्टि आउला भन्ने त्रासमा सभापति देउवा वैधानिक दायित्वबाट पन्छन खोजेको देखिन्छ ।

पार्टीभित्र देखिएका कमजोर संगठनको फाइदा पार्टी नेतृत्वमा मौलाएको गुटले लिएका छन् । पार्टी संस्थापनइत्तरको गुटको रुपमा पूर्वउपसभपाति रामचन्द्र पौडेल र पूर्वमहामन्त्री कृष्णप्रसाद सिटौला स्थापित भएका छन् ।
महामन्त्री डा. शशांक कोइराला र पूर्वमहामन्त्री प्रकाशमान सिंहले पनि उपगुट र शक्ति केन्द्रका रुपमा आफूहरुलाई स्थापित गराउने प्रयासमा छन् ।

जागरण अभियानमा जिल्लामा खटिएका केन्द्रीय प्रतिनिधिले स्याबासीभन्दा पनि गाली र गुनासोको फेहरिस्त सुन्ने गरेका छन्

संस्थापन पक्षमै उपसभापति विमलेन्द्र निधि बलियो उपगुटका रुपमा स्थापित भएका छन् भने स्वर्गीय खुमबहादुर खड्काले खडा गरेको पार्टीको गुट पनि त्यतिकै मजबुत छ । दुवै गुटलाई सभपाति देउवा पत्नी डा. आरजु राणा देउवाले टक्कर दिएकी छन् ।

पार्टीको केन्द्रीय कार्य समिति सदस्यबीच नै देखिएको यस्ता गुटगत रस्साकसी बन्द हुनुपर्ने पक्षमा कार्यकर्ता छन् । पार्टीभित्रको आन्तरिक कलह र गुनासोलाई टार्न सभापति देउवा सरकारविरुद्धको अभियानतर्फ सबैको ध्यान मोड्न चाहन्छन् ।

त्यसैले सभापति देउवाले स्थानीय, प्रदेश र संघीय निर्वाचनको समीक्षा गर्न आग्रह गर्ने नेता तथा कार्यकर्तालाई ठाडै हकार्ने गरेका छन् । उनले केपी शर्मा ओली नेतृत्वको सरकारले संघीयता र लोकतन्त्रविरोधी हर्कत गरिरहेको बेला उसकै विरोधमा लाग्न आग्रह गर्दै आएा छन् ।

देउवा विगतमा गिरिजाप्रसाद कोइराला र सुशील कोइरालाको विरोधमा चुइँक्क नबोल्नेहरु अहिले आफूलाई गाली गरेर र विरोध गर्न पाएर आन्तरिक लोकतन्त्रको भरपुर प्रयोग गरेको दाबी गर्छन् ।

देउवाले हिम्मत हुनेले आफूलाई गाली गर्नुभन्दा ओली सरकारले देश र जनताविरुद्ध गरेका क्रियाकलापको विरोधमा लाग्न आग्रह गर्छन् । आफू सभापति भए पनि निर्वाचनमा पराजित हुनेहरु आफ्नै कमजोरीले हारेका हुन भन्दै आफू सभापति भए पनि जिम्मेवारी एक्लै नलिने भन्दै आएका छन् ।

यसरी पार्टीभित्रको आन्तरिक कलहलाई सम्बोधन नगरी वा निकास नदिई कांग्रेसले गरेको जागरण अभियानमा जिल्लामा खटिएका केन्द्रीय प्रतिनिधिले स्याबासीभन्दा पनि गाली र गुनासोको फेहरिस्त सुन्ने गरेका छन् ।

तीन चरणमा गरिने भनिएको जागरण अभियानलाई साधारण र क्रियाशील सदस्यता वितरण गरेको भए उत्तम हुने सुझाव आउने गरेको नेविसंघ पूर्वउपसभापति मेदनी सिटौला बताउँछन् ।

पार्टी प्रवक्ता विश्वप्रकाश शर्माले भने पार्टीभित्र केही कमी कमजोरी वा गुनासा रहेछन् भने तलैबाट ग्रहण गरी पार्टीलाई अघि बढ्न मार्ग निर्देश गर्ने दाबी गर्छन् । उनी कांग्रेस जीवन्त पार्टी भएको र सबै कार्यकर्ताको भावनालाई समेट्ने भएकाले हरेकको सुझाव लिन पछि नपर्ने बताउँछन् ।

धेरै कार्यकर्ताले जागरण अभियानको क्रममा कार्यकर्ता र शुभेच्छुकलाई भन्दा पार्टीका केन्द्रीय नेतालाई नै जागरण अभियान खाँचो परेको सुझाव दिने गरेको केन्द्रीय सदस्य डा. शेखर कोइराला बताउँछन् ।

अभियानमा सदस्यता वितरण सुरु गर्न विधानबमोजिमका हरेक संगठनात्मक संरचना निर्माण गर्नुपर्ने, स्थानीय तहका संगठनलाई पूर्णता दिनुपर्ने, विभाग र अन्य समिति तत्काल गठन गरी नेतृत्व तहमा आपसी टकराव, कलह र व्यक्तिगत स्वार्थलाई त्याग गर्नुपर्ने सुझाव दिएका छन् ।

उनीहरूले १४ महाधिवेशनको प्रारम्भ नगरी कार्यकर्तामा जागरण नआउने गुनासो गरेका छन् । कार्यकर्ताले विगतमा जस्तो नेताको मात्र भाषण नसुनाई कार्यकर्ताको समेत सुझाव लिनु उपयुक्त भएको बताएका छन् ।

कांग्रेसले पार्टी पदाधिकारी, अनुशासन समितिका संयोजक र सदस्यबाहेक करिब ४० जना केन्द्रीय सदस्य र १० जना सांसदलाई मात्र केन्द्रीय प्रतिनिधिका रुपमा ७७ वटै जिल्लामा खटाएको छ ।

कांग्रेसले दोस्रो चरणको जागरण अभियान २४ भदौदेखि र तेस्रो चरणको जागरण अभियान १० पुसदेखि गर्ने जनाएको छ । पार्टी सभापति भएको तीन वर्ष तीन महिना बितिसकेकाले आगामी फागुन मसान्तभित्रै महाधिवेशन गर्न संस्थापनइत्तरका नेताले दबाब दिइरहेका छन् । तर, सभापति देउवा विधानबमोजिम एक वर्ष आफ्नो कार्यकाल थपेर ५ वर्ष पुर्याउने योजनामा छन् ।

प्रकाशित मिति: शनिबार, जेठ २५, २०७६ ०१:२३