रामचन्द्र पौडेल समूह छोडेर भए पनि सभापतिमा लड्छु : प्रकाशमान सिंह (अन्तर्वार्ता)

रामचन्द्र पौडेल समूह छोडेर भए पनि सभापतिमा लड्छु : प्रकाशमान सिंह (अन्तर्वार्ता)

A+ A A-

नेपाली कांग्रेसको संस्थापनइतर समूहबाट वरिष्ठ नेता रामचन्द्र पौडेल, महामन्त्री डा. शशांक कोइराला र केन्द्रीय सदस्य डा. शेखर कोइरालासँगै पूर्वमहामन्त्री प्रकाशमान सिंहले सभापतिको दाबी गरिरहेका छन् । आसन्न १४औँ महाधिवेशनमा संस्थापनइतर समूहबाट सभापतिको साझा उम्मेदवार बनाउने विषयमा पनि उनीहरूबीच छलफल भइरहेको छ । तर, सभापतिको उम्मेदवार को हुने भन्नेबारे सहमति भने जुटिसकेको छैन ।

चारै जना प्रत्याशीले आफूलाई सभापतिको रेसमा अगाडि रहेको दाबी गर्दै आएका छन् । पूर्वमहामन्त्री समेत रहेका सिंहले अघिल्लो पटक त्याग गरेकाले यो पटक आफूलाई सबैले सभापतिमा सहयोग गर्नुपर्ने बताउँदै आएका छन् । सिंहले भनेका छन्,‘अघिल्लो पटक मैले टिमले नै जितोस् भनेर दाबी छोडेको हुँ । त्यसैले यो पटक मलाई सहयोग गर्नुपर्छ ।’

वडा अघिवेशनको पूर्वसन्ध्यामा पौडेलले समूहले पार्टी कार्यालय सानेपामा पत्रकार सम्मेलन गरी १४ औँ महाधिवेशनमा आफ्नो समूहबाट सभापतिको साझा उम्मेदवार हुने घोषणा गरेको थियो । उक्त पत्रकार सम्मेलनमा सभापतिका दावेदार सिंह पनि उपस्थिति थिए । तर, सिंहले आफू सभापतिको उम्मेदवार भएको र दाबी नछाड्ने बताएका छन् । पार्टीको १४औँ महाधिवेशनमा केन्द्रित रहेर शिलापत्रका लागि केशवराज जोशीले नेता प्रकाशमान सिंहसँग गरेको कुराकानी:

-संस्थापन इतर समूहमा रहेका तपाईंहरूले सभापतिको साझा उम्मेदवार घोषणा गर्ने कुरा त गर्नु भयो । तर, अहिलेसम्म साझा उम्मेदवार दिन सक्नु भएन नि ?

यो विषयमा साथीहरूबीच धेरै चरणमा कुराकानी भयो । अहिले पनि छलफल जारी नै छ । उम्मेदवारी दर्ता गर्ने अन्तिम मितिसम्म सहमति जुट्ला नि ।

-सबैलाई साझा उम्मेदवार चाहिएको छ । तर, दाबी छाड्न कोही तयार हुनुहुन्न । यस्तो अवस्थामा कसरी सहमति जुट्छ ?

मैले सबै नेताहरूलाई अहिलेको अवस्थालाई हेन्डिल गर्न सक्ने क्षमता ममा छ मलाई सहयोग गर्नुस् भनेर भनेको छु ।छलफल सकारात्मक भए पनि दाबी कसैले छोड्नु भएको छैन । अन्तिम समयसम्म सहमति जुट्यो भने ठीकै छ नत्र लोकतान्त्रिक पार्टीमा चुनाव लड्ने स्वतन्त्रता सबैलाई छँदैछ । त्यही अनुसार अगाडि बढौंला ।

- यो त तपाईंको दाबीको कुरा भयो । यदि तपाईंको नाममा सहमति जुटेन भने तपाईं आफ्नो विकल्पमा कसलाई अगाडि बढाउनुहुन्छ ?

अहिलेको परिस्थितिमा पार्टीले मेरै नेतृत्व खोजेको छ । आमकार्यकर्ताहरूले पनि मलाई नै सभापतिका रूपमा हेर्न चाहेका छन् । त्यसैले अहिले म मेरो विकल्पमा अरु कसैको नाम लिन सक्दिनँ । पार्टी सभापतिले विधि, विधान मिचेर पार्टीलाई जसरी भद्रगोल बनाउनु भएको छ, यसलाई फेरि सही बाटोमा ल्याउनुपर्नेछ । त्योसँगसँगै एमाले अध्यक्ष केपी ओलीले जुन प्रकारले लोकतन्त्रलाई सिध्याउने प्रयास गरिरहेका छन् त्यसबाट पनि मुलुकलाई बचाउनु पर्नेछ । यस्तो अवस्थामा सबैले मलाई नै उपयुक्त उम्मेदवारका रूपमा हेरेका छन् । त्यसैले मेरो विकल्प अरू हुनसक्दैन ।

-संस्थापनइतर समूहका सभापतिका आकांक्षीहरूसँग समर्थन माग्दा तपाईंले के-के भन्नुभयो ?

वरिष्ठ नेता रामचन्द्र पौडेललाई मैले १३औँ महाधिवेशनमा निकै मेहनत गरेर सहयोग गरेको थिएँ । विविध कारणले उहाँलाई जिताउन सकिएन । मैले भेटघाटमा उहाँलाई यही कुरा स्मरण गराउने गरेको छु । मैले रामचन्द्र दाइलाई भनेको छु- दाइ हामीले तपाईंलाई यसअघि सभापति बनाउन खोजेका हौं तर सकेनौं । अब तपाईंको उमेर पनि पुग्यो । तपाईं आराम गर्नुस् । अब तपाईं पार्टी सम्हाल्न सक्नुहुन्न । आम कार्यकताहरूले पनि परिवर्तन खोजेका छन् । उनीहरू पार्टीलाई साँच्चिकै योगदान पुर्‍याउन सक्ने सक्षम नेतृत्व चाहन्छन् । त्यसैले पार्टी नेतृत्वमा आउन मलाई सहयोग गर्नुस् भनेको छु । तर, रामचन्द्र दाइले मान्नु भएको छैन ।

महामन्त्री शशांक कोइरालालाई पनि आफ्नो दाबी छाडेर सहयोग गर्न भनेको छु । शेखर कोइरालाको कुरा छ, उहाँ उमेरमा मभन्दा जेठो हुनुहुन्छ । त्यही अनुसार म उहाँलाई शेखर दाइ भनेरै सम्बोधन गर्छु । तर, राजनीतिमा उहाँ विल्कुलै नयाँ हुनुहुन्छ । उहाँले सिक्नुपर्ने धेरै नै छ । त्यसैले मैले शेखर कोइरालालाई तपाईंको अहिले सभापति बन्ने बेला भएको छैन भन्ने गरेको छु ।

मसँग लामो समय गिरिजाबाबु , सुशील कोइराला र शेरबहादुर देउवासँग काम गरेको अनुभव छ । रामचन्द्र दाइपछि सबैले नेतृत्वको रूपमा स्वीकार गर्ने व्यक्ति पनि म नै हो । रामशरण महत, अर्जुननरसिंह केसीलगायतका नेताहरूले मेरो नेतृत्व स्वीकार गर्न सक्छन् तर अरुको नेतृत्वमा बस्न रुचाउँदैनन् । पार्टीमा सबैलाई मिलाएर राख्न सक्ने क्षमता समेत भएकाले सभापतिमा मेरो दाबी रहँदै आएको छ ।

-सभापतिको दाबी वा अहिलेको समूहमध्ये एक कुरा छाड्नुपर्ने अवस्था आयो भने तपाईं के गर्नुहुन्छ ?

यो पटक सभापतिको उम्मेदवारीबाट म कुनै हालतमा पछि हट्दिनँ । म समूह छाड्न सक्छु तर सभापतिको दाबीबाट पछि हट्दिनँ । सँगसँगै अझै समय छ, सहमति जुट्छ भन्नेमा पनि विश्वस्त छु । तर, सहमति जुटेन भने नयाँ समूह पनि बन्न सक्छ । म सभापतिको उम्मेदवारीबाट पछि हट्दिनँ । सकेसम्म मिलेर जाउँ भन्ने हो तर सहमति जुट्दै जुटेन भने चुनाव लड्नेहरूले आ-आफ्नो टिम त बनाउँछन् नि । समूह भनेको त्यही हो ।

-यदि तपाईंको नाममा सहमति जुट्यो भने सभापतिका बाँकी आकांक्षीहरूको व्यवस्थापन कसरी गर्नुहुन्छ ?

रामचन्द्र दाइ हाम्रो सम्मानित व्यक्ति हुनुहुन्छ । उहाँ उच्च पदमा जानुपर्छ । उहाँलाई हामी राष्ट्रपति बनाउँछौँ । अन्य साथीहरूको पनि सही व्यवस्थापन गर्न सकिन्छ ।

-तपाईंहरूको बैठकमा पावर सेयरिङको कुरा अलि धेरै उठ्ने गर्छ । आगामी आम निर्वाचनपछि कसलाई प्रधानमन्त्री बनाउने, कसलाई राष्ट्रपति र कसलाई मन्त्री बनाउने भन्नेबारे पनि कुरा पनि भइरहेका छन् भन्ने सुन्नमा आएको छ । तर, सरकारको अहिलेको गतिविधि हेर्दा तपाईंहरू सत्तामा आउन सक्नुहोला र ?

सरकार अहिले बन्ने क्रममै छ । मन्त्रीमण्डल विस्तारमा केही ढिलाइ भएको छ । तर, यसले छिट्टै पूर्णता पाउँछ । केपी ओलीको गैरसंवैधानिक कदमका कारणले यो अवस्था आएको हो भन्ने सबैले बुझेका छन् । जहाँसम्म पावर सेयरिङको कुरा छ, त्यो त हुनुपर्छ । पावर सेयरिङको कुरा सुन्दा नराम्रो लाग्छ तर व्यवहारिक पाटो पनि हेर्नुपर्‍यो नि । व्यवहारिक रूपमा सबैलाई समेटेर लैजान यो आवश्यक छ ।

-तपाईं सरकारमा जाने तयारीमा हुनुहुन्छ हो ?

अहिले मैले सरकारमा जाने कुनै सोच बनाएको छैन ।

-तर, बाहिर तपाईं सरकारमा जाँदै हुनुहुन्छ भन्ने चर्चा छ नि ?

चर्चा त भइरहन्छ । तर, अहिले सरकारमा जाने मेरो सोच छैन । पार्टीका वर्कर (कार्यकर्ता) हरू पार्टी विधिसम्मत रूपमा चलेको हेर्न चाहन्छन् । यसका लागि अनुभव र काम गर्न सक्ने क्षमता भएको व्यक्ति चाहिएको छ ।

पार्टीलाई यतिखेर विधि र पद्धति बसाल्ने नेतृत्व चाहिएको छ । त्यसैले साँच्चिकै योगदान पुर्‍याउन सक्ने व्यक्ति म नै हो । त्यही भएर पनि होला पार्टीका कार्यकर्ताहरूले मलाई पार्टीको यस्तो दुरावस्थामा तिमी के हेरेर बसेका छौँ भनेर निरन्तर घचघच्याइरहेका छन् । त्यसैले अहिले सरकारमा होइन पार्टीको नेतृत्वमा पुगेर पार्टीलाई सही ट्र्याकमा ल्याउनेमै मेरो ध्यान केन्द्रित छ ।