काठमाडौंका सडकमा फोहोरका डंगुर, स्थानीय भन्छन्- हिँड्न पनि गाह्रो भैसक्यो

A+ A A-

काठमाडौं उपत्यकामा गत हप्ताको सोमबारदेखि थुप्रिएको फोहोर अझै उठिसकेको छैन । महानगरपालिकाले लामो समयसम्म पनि फोहोर नउठाएपछि काठमाडौंका गल्लीहरूमा दुर्गन्ध फैलन थालेको छ ।

काठमाडौंको चाबहिल (गोपीकृष्णदेखि बबरमहल पुग्ने) कोरिडोर दुर्गन्धित भएर हिँड्नै नसकिने भएको छ ।

कालो पुलदेखि रातो पुलसम्म जोड्ने कोरिडोरमा सडकको बीचबीचमा ठाउँठाउँमा फोहोर थुप्रिएको छ । कोरिडोरको वारिपारि हरेक कुनामा फोहोरको डङ्गुर देख्न सकिन्छ ।

सडकको पेटीमै मुख थुनेर हिँडिरहेकी सम्झना बोहरा आक्रोश पोख्दै भन्छिन्, ‘अस्ति नै फोहोर उठ्छ भनेर खुसी भएका थियौँ । तर, फोहोर नै उठाउँएनन् । सधैँ हिँड्ने हामीलाई निकै नै गाह्रो भइसक्यो । यसरी सडकमै चाङ लगाएर राख्ने हो र ?’

अहिले काठमाडौंका हरेक सडकका मोडमा फोहोरका चाङ देखिन्छन् । सडकको किनारमा फोहोरले भरिएका गाडीहरू राखिएको छ । बोहरा गुनासो पोख्छिन्, ‘यो सडक भएर कोही मान्छे हिँड्यो भने वाक्‌वाक् बान्ता नै आउँछ ।’

काठमाडौं महानगरपालिका, वातावरण व्यवस्थापन विभागका प्रमुख हरिकुमार श्रेष्ठले अबको तीन दिनभित्र फोहोर व्यवस्थापन भइसक्ने बताए । उनले भने, ‘अबको तीन दिनभित्र फोहोर व्यवस्थापन गरिसक्छौँ ।’

अचानक १० दिनभन्दा बढी फोहोर नउठेकाले समस्या भएको तर अहिले त्यस्तो अवस्था नरहेको श्रेष्ठको भनाइ छ । त्यो थुप्रिएको फोहोर तीन दिनभित्र व्यवस्थापन भइसक्ने उनले बताए ।

गत ३० साउनमा काठमाडौँ महानगरपालिकाले सूचना जारी गर्दै एक हप्ता फोहोर घरबाहिर ननिकाल्न नागरिकलाई आग्रह गरे पनि फोहोर नउठेको दुई हप्ताभन्दा धेरै भइसकेको छ ।

महानगरपालिकाले काठमाडौं उपत्यकाको फोहोर व्यवस्थापन भइरहेको सिसडोलको बाटो हिलो हुँदा फोहोर बोकेका गाडी गुड्नै नसक्ने भएकाले फोहोर उठाउन नसकिएको बताएको थियो ।