कुवेत पुगेका अधिकांश नेपाली कामदार रक्सीकाे अवैध व्यापारमा, जरिवानादेखि मृत्युदण्डसम्म सजाय भाेग्दै

कुवेत पुगेका अधिकांश नेपाली कामदार रक्सीकाे अवैध व्यापारमा, जरिवानादेखि मृत्युदण्डसम्म सजाय भाेग्दै

A+ A A-

कुवेत रोजगारीका लागि पुगेका नेपाली कामदार मदिरा व्यापारमा संग्लन भएको आरोपमा पक्राउ पर्ने गरेका छन् । हाल कुवेतमा ४६ जना नेपाली जेलमा रहेको वैदेशिक रोजगार बोर्डको सचिवालयले जनाएको छ ।

कुवेत जेलमा परेका ४६ जनामध्ये ३० जनाभन्दा धेरै मदिरा व्यापारमा संलग्न भएका कारण जेलमा थुनिएको कुवेतस्थित नेपाली दूतावास बताउँछ । कुवेतमा मदिरा उत्पादन र बिक्री गर्न प्रतिबन्ध छ ।

कुवेत सरकारले मदिरा व्यापारको आरोपमा पक्राउ परेका नेपालीहरूलाई जरिवानादेखि मृत्युदण्डसम्म सजाय सुनाएकाे छ । कुवेतको कानुनमा मदिरा व्यापार गर्ने विदेशी नागरिकलाई अपराधका आधारमा जरिवाना र मृत्युदण्डको सजाय दिने कानुनी व्यवस्था छ ।

दुई साताअघि गैरकानूनी रूपमा मदिरा व्यापार गरेको आरोपमा चार जना नेपाली कामदारलाई कुवेतकाे प्रहरीले पक्राउ गरेको अरब टाइम्स अनलाइनले जनाएको छ ।

कुवेतको हवेलीस्थित अपार्टमेन्टमा गोप्यरूपमा घरेलु मदिरा उत्पादन गरी बिक्री गर्दै आएका उनीहरूलाई प्रहरीले छापा हानेर पक्राउ गरेको समाचारमा जनाइएकाे छ ।

यस्तै, गत साउन ६ गते पनि कुवेतमा अवैध मदिरा उत्पादन गरी व्यापार गरेकाे आरोपमा तीन जना नेपाली पक्राउ परेका थिए । उनीहरूले कुवेतको सहरनजिकै बसेर मदिरा उत्पादन गरी बिक्री गरिरहेको अवस्थामा प्रहरीले छापा हानेर पक्राउ गरेको थियो ।

साथै गत असार २९ गते मदिरासँगै देह व्यापारमा संग्लन भएको आरोपमा रसियाली महिलासँगै चार जना रोजगारीका लागि कुवेत पुगेका नेपाली महिलाहरू पक्राउ परेका थिए । उनीहरूलाई कुवेतस्थित नेपाली दूतावासले आममाफीमार्फत छुटाएर स्वदेश फर्काएको थियो ।

यसैगरी, गत जेठ १८ गते मदिरा उत्पादन गरेर बिक्री गर्दै आएको अभियोगमा तीन जना नेपाली पक्राउ परे । जसमा एक जना महिलासमेत रहेकाे कुवेती अध्यागमनले दूतावासलाई जानकारी गराएको थियो ।

यस्तै, गत पुस महिनामा कुवेत प्रहरीले मदिरा उत्पादन गरी बिक्री गर्ने नेपाली कामदारहरूको गिरोह नै पक्राउ गरेको थियो । उनीहरूलाई कुवेतनजिकै एउटा बस्तीमा मदिरा उत्पादन गरी बिक्री गरिरहेको अवस्थामा प्रहरीले समातेकाे थियाे ।

केही समयअघि पनि कुवेतको साल्मी बन्दरगाहनजिकै एउटा अपार्टमेन्टमा अवैधरूपमा घरेलु मदिरा उत्पादन गरिरहेको अवस्थामा कुवेत प्रहरीले केही नेपालीलाई नियन्त्रणमा लिएकाे थियाे । त्यहाँबाट ठूलो परिमाणमा मदिरा बरामद गरेको अरब टाइम्सकाे समाचारमा उल्लेख छ ।

कुवेतमा अवैध मदिरा उत्पादन तथा बिक्रीका कारण कामदारमाथि प्रश्न पनि उठ्न थालेको छ । मदिरा व्यापारकै कारण रोजगारी गुम्ने र नेपाली समुदाय बदनाम समेत भइरहेको त्यहाँ कार्यरत कामदारहरूले नै बताइरहेका छन् ।

सन् २०२० मा मदिरा व्यापारमा संलग्न १२ जनाभन्दा धेरै नेपाली कामदार कुवेतमा पक्राउ परेको दूतावासको तथ्यांक छ । रोजगारीका लागि कुवेत पुगेका कतिपय नेपाली कामदार स्वदेश नफर्की अवैध रूपमा बसेर विदेशी नागरिकसँग मिलेर मदिरा उत्पादन गर्दै आएका छन् ।

उनीहरूले घरेलु मदिरा उत्पादन गरी विदेशी नागरिकलाई कम्पनी, होस्टेल, आवास गृह र बजारमा लुकीछिपी व्यापार गर्दै आएको कुवेतमा कार्यरत धनकुटा भीरगाँउका सन्दिप थापाले बताए ।

उनका अनुसार रोजगारीका लागि पुगेका केही नेपालीहरूले घरेलु मदिरा काम गर्न कुवेत आएका विदेशी नागरिकलाई पनि महँगो रकम लिएर बिक्री गर्ने गरेका छन् ।

विदेशी महँगो रक्सीभन्दा नेपालीहरूले उत्पादन गरेको घरेलु मदिरा तुलनात्मक रूपमा सस्तो हुने भएका कारण कुवेतमा रहेका चिनियाँ, भारतीय, अप्रिका र युरोपका नागरिकले किनेर खाने गरेका छन् ।

कुवेतमा एक जर्किन घरेलु मदिराको एक सय ५० दिनारमा व्यापार हुने गरेको थापाले जानकारी दिए ।

धेरै कमाउने लोभमा मदिरा व्यापारमा संलग्न

कुवेतमा मदिरा व्यापारमा संलग्न आप्रवासीहरूको संख्या ठूलै रहेकाे बताइन्छ ।

रोजगारीका लागि कुवेत आएका नेपाली कामदारहरू अन्य देशका नागरिकको लहैलहैमा लागेर धेरै कमाउने आशमा मदिरा व्यापारमा लाग्ने गरेका छन् । धेरै कमाउने लाेभ र अवैध रूपमा बसेका कतिपय नेपाली स्वदेश नफर्की मदिरा व्यापारमा संलग्न हुँदा जेलसमेत पर्ने गरेको कुवेतस्थित नेपाली दूतावासका राजदूत दुर्गाप्रसाद भण्डारीले जानकारी दिए ।

दूतावासले पटक–पटक सूचनामार्फत मदिरा व्यापार र कुवेतको कानुन विपरीत केही काम नगर्न रोजगारीमा कार्यरत कामदारलाई आग्रह गर्दै आएको उनी बताउँछन् ।

कुवेतमा मदिरा व्यापार गर्न लाइसेन्स लिनुपर्छ । कुवेत सरकारले तोकेभन्दा बाहेकका मदिरा व्यापार गर्ने कुवेती तथा विदेशी नागरिकलाई कडा कानुनी कारबाही हुने गरेकोे छ ।

कुवेतमा घरेलु रक्सी उत्पादन गरी व्यापार गर्ने विदेशी नागरिकलाई देश निकालादेखि मृत्युदण्डको सजाय हुने गरेको छ । कुवेतमा मदिरा व्यापारमा संलग्न रहेको आरोपमा वार्षिक ५ हजारभन्दा विदेशी नागरिक पक्राउ पर्ने गरेको विदेशी सञ्चारमाध्यमहरुमा उल्लेख छ ।

प्रकाशित मिति: बुधबार, भदौ ३०, २०७८ १०:२३