मिनवा म्यानपावरले ठग्यो १ करोड ७० लाख, क्षतिपूर्ति माग्दै पीडितले घेरे विभाग

मिनवा म्यानपावरले ठग्यो १ करोड ७० लाख, क्षतिपूर्ति माग्दै पीडितले घेरे विभाग

A+ A A-

रोजगारीका लागि युरोप पठाइदिने प्रलोभन देखाएर मिनुवा ओभरसिज प्रालिले १ करोड ७० लाख रुपैयाँ ठगी गरेको खुलासा भएको छ ।

सो म्यानपावरले विदेशी जान चाहने ७० जनाभन्दा बढी कामदारसँग उक्त रकम ठगी गरेको उजुरी परेको वैदेशिक रोजगार विभागले जानकारी दिएको हो ।

मिनुवा ओभरसिजका सञ्चालकद्वय दिक्पाल लिम्बू र मोहन लिम्बूले युरोपका रोमानिया, पोचुर्गल, पोल्यान्ड, माल्टा र फ्रान्स रोजगारीमा पठाउने प्रलोभन देखाएर प्रति व्यक्ति २ लाख ५० हजारदेखि ९ लाख रुपैयाँसम्म असुलेको उजुरी लिएर विभागमा गत बैशाखयता धाइरहेको पीडितहरूले बताएका छन् ।

म्यानपावरले विभागमा राखेको धरौटी रकमबाट क्षतिपूर्ति दिनुपर्ने माग गर्दै पीडितहरू विभागको गेटमा आन्दोलनमा उत्रिएका छन् । म्यानपावरले ठगी गरेको भन्दै क्षतिपूर्ति माग गर्दै उनीहरू आन्दोलनमा उत्रिएका हुन् ।

झापा गोलधापका अनिश भट्टराईले रोमानिया जाने भनेर एक वर्षअघि २ लाख ५० हजार सो म्यानपावरमा बुझाएको बताए । उक्त म्यानपावरले पैसा लिएको एक वर्ष बितिसक्दा पनि रोमानिया नपठाएको आन्दोलनरत भट्टराईले बताए । ‘म्यानपावरका सञ्चालकहरूले एक वर्षदेखि झुक्याए । अर्को महिना भिसा आउँछ भन्दै ढाँट्छन् । एकातिर पैसा खाए, अर्कोतिर दुःख दिए,’ उनले भने, ‘म्यानपावरले विभागमा राखेको धरौटीबाट क्षतिपूर्ति लैजानु भनेको छ । तर, विभागले धरौटीबाट क्षतिपूर्ति दिन मानेको छैन ।’

उनी झापादेखि म्यानपावरले ठगेको रकम उठाउन काठमाडौं आएका हुन् ।

भट्टराईजस्तै नुवकोटकी श्रीषमा तामाङले पनि माल्टा जानका लागि मिनवा म्यानपावरमा २ लाख ५० हजार बुझाएकी थिइन् । एक वर्षसम्म पनि उक्त म्यानपावरले माल्टा पठाउन नसकेपछि क्षतिपूर्तिका लागि विभाग आएको बताइन् । ‘म्यानपावरले बेरोजगार युवालाई प्रलोभन देखाएर ठग्छन् । युरोपका देशको डिमान्ड नभए पनि झुक्याएर ठगिरहेका छन्,’ उनले भनिन्, ‘देशभित्र रोजगारी छैन । विदेशिन खोज्दा ठगीमा परिन्छ । यसरी ठग्ने म्यानपावरलाई विभागले उन्मुक्ति दिन्छ । न्याय खोज्न कहाँ जानु ?,’ नुवाकोटदेखि म्यानपावरले ठगेको पैसा उठाउन काठमाडौं आएकी उनले बताइन् ।

यसैगरी, मकनवापुरका भोलामान घोलुनाले पनि फ्रान्स जानका लागि मिनवा म्यानपावरमा ८ लाख तिरेका थिए । उनलाई म्यानपावरले पैसा लिएर पनि एक वर्षसम्म पनि रोजगारीमा पठाउन सकेन । घरबारी बन्धकी राखेर फ्रान्स रोजगारीमा जान म्यानपावरलाई ८ लाख रुपैयाँ तिरे । तर, जान नपाएपछि आफ्नो पैसा उठाउन आएको विभागमा आन्दोलनरत घोलुनाले बताए ।

घोलुनाले भने, ‘दुई वर्षदेखि बेरोजगार छु । परिवार पाल्ने माध्यम अरु केही छैन । त्यही भएर विदेशिन खोजेको तर म्यानपावरले ठग्यो । घरबारी नै बन्धकी राखेर फ्रान्स रोजगारीमा जान म्यानपावरमा पैसा बुझाएँ । अहिले ठगिएको त्यही पैसा उठाउन आन्दोलन गर्नुपरेको छ ।’

उनी पनि मनकवापुरबाट पैसा उठाउन विभागमा आएको बताउँछन् । उनीहरूजस्तै ठगिएका ७० जनाभन्दा बढी पीडित विभागको गेटमा म्यानपावरसँग क्षतिपूर्ति पाउनुपर्ने माग गर्दै आन्दोलन गरिरहेका छन् ।

वैदेशिक रोजगार ऐनअनुसार मिनवा म्यानपावरबाट ठगिएका पीडितलाई क्षतिपूर्ति भराउने तयारी र छलफल भइरहेको वैदेशिक रोजगार विभागका निर्देशक तथा सूचना अधिकारी कमल ज्ञवालीले जानकारी दिए । म्यानपावरले कम्पनी सञ्चालन गर्न राखेको धितो रकमबाट पीडितलाई क्षतिपूर्ति भराउने कानुनी व्यवस्था छ । सोही व्यवस्थाअनुसार पीडितले क्षतिपूति पाउने उनले बताए ।

रोजगारीको खोजीमा रहेका युवाहरू म्यानपावर कम्पनीबाट ठूलो रकम ठगिएको समस्या लिएर विभागमा धाउने गरेका छन् । कोरोना महामारीमा समेत धेरै युवा म्यानपावर कम्पनीबाट ठगिएको उजुरी परेको विभागले जनाएको छ । पछिल्लो समय युरोप र अफ्रिकी देशका नाममा ठगिएको उजुरी पर्ने गरेको विभागले जनाएको छ ।

प्रकाशित मिति: आइतबार, भदौ २७, २०७८ १७:४१