एमाले मकवानपुर २ जेठमा फर्कियो, तत्कालीन माधव पक्षका लम्साल बने अध्यक्ष

A+ A A-

नेकपा एमालेमा १० बुँदे सहमति कार्यान्वयन गर्न कठिन भैरहँदा पार्टीको मकवानपुर कमिटीले भने यसलाई सहजै कार्यान्वयन गरेको छ ।

एमाले मकवानपुरले १० बुँदे सहमति कार्यान्वयन गर्दै २ जेठ २०७५ को अवस्थामा फर्किएको छ । एमालेको विवाद सुल्झाउन गठित कार्यदलको १० बुँदे सहमतिलाई कार्यान्वयन गर्दै एमाले मकवानपुर तत्कालिन अवस्थामै फर्किएको नेताहरुले बताएका छन् ।

हेटौंडामा शनिबार एमालेको जिल्ला कमिटी बैठक बस्यो । उक्त बैठकको अध्यक्षता तत्कालिन एमालेका उपाध्यक्ष बद्री लम्सालले गरेका छन् । उनै लम्साललाई एमाले मकवानपुरको अध्यक्ष बनाइएको छ ।

तत्कालिन एमाले मकवानपुरकी अध्यक्ष मुनु सिग्देलले नेकपा एकीकृत समाजवादी रोजेसँगै लम्साललाई अध्यक्ष बनाइएको हो । बागमती प्रदेशसभा सदस्य तथा एकीकृत समाजवादीकी केन्द्रीय सदस्यसमेत रहेकी सिग्देल जिल्ला अधिवेशनबाट १ मतले अध्यक्षमा विजयी भएकी थिइन् ।

उनले केही दिनअघि प्रदेश निर्वाचन आयोगको कार्यालयमा एकीकृत समाजवादी रोज्दै सनाखत गरेकी थिइन् ।

हाल अध्यक्ष बनेका लम्साल एमाले दुई धारमा विभाजित भएसँगै माधव नेपाल पक्षमा खुलेका थिए । सरकारले अध्यादेश ल्याएपछि एमाले विभाजन हँदा उनले एमालेमै बस्ने निर्णय गरेका हुन् । बैठकले उपाध्यक्षमा गोपाल श्रेष्ठलाई चयन गरेको छ ।

सर्वोच्च अदालतले तत्कालिन नेकपा फुटाउँदै एमाले र माओवादी केन्द्र पुरानै अवस्थामै फर्किने आदेश गरेपछि ओली पक्षका नेता एकालाल श्रेष्ठलाई एमाले मकवानपुरको अध्यक्ष बनाएको थियो । श्रेष्ठ पार्टी २ जेठकै संरचनामा फर्किएसँगै जिल्ला सचिव भएका छन् । उपसचिवमा लालबहादुर थापासहित ३ सय २९ सदस्यीय जिल्ला अधिवेशन आयोजक कमिटी चयन गरिएको अध्यक्ष लम्सालले जानकारी दिए ।

मकवानपुर प्रतिनिधिसभा सदस्य तथा नेकपा एसका केन्द्रीय सदस्य विरोध खतिवडाको जिल्ला पनि हो । जिल्लामा दुई गाउँपालिका अध्यक्ष, दुई पालिकाका उपप्रमुखसहित ३९ जना जनप्रतिनिधिले भने एकीकृत समाजवादीको पक्षमा सनाखत गरिसकेका छन् ।

प्रकाशित मिति: शनिबार, भदौ २६, २०७८ १७:४८