कांग्रेसको ‘एनसी विन’ : विरोधी तह लगाउने रणनीति कि एजेन्डा स्थापित गर्ने अस्त्र ?

कांग्रेसको ‘एनसी विन’ : विरोधी तह लगाउने रणनीति कि एजेन्डा स्थापित गर्ने अस्त्र ?

A+ A A-

२१ भदौमा नेपाली कांग्रेसले पार्टीलाई प्रविधिमैत्री बनाउने भन्दै एनसी विन (नेपाली कांग्रेस वाइडली इन्फरमेसन नेटवर्क) गठन गर्‍यो । पार्टीका प्रवक्ता विश्वप्रकाश शर्माको अध्यक्षतामा बसेको वैठकले ई. दिपेश बिष्टको संयोजकत्वमा २७ सदस्यीय केन्द्रीय संरचना बनाएको हो ।

संयोजक बिष्टका अनुसार यस्ता संरचना पार्टीको तल्लो तहसम्म विस्तार हुनेछन् । आन्तरिक रुपमै पार्टीले विभिन्न तहमा कमिटीहरू गठन गरिरहेको छ । देशभरका सातैवटा प्रदेशमा एनसी विनको प्रादेशिक संरचना आन्तरिक रुपमा गठन भैसकेको छ । यद्यपि, यो सार्वजनिक गरिएको भने छैन ।

कांग्रेसले एनसी विनको छातामुनि रहने गरी ‘वार रुम’ पनि गठन गरिसकेको छ । तर विपक्षीको आवाज दबाउन यस्तो टोली बनाएको भन्दै सामाजिक सञ्जालमा आलोचना समेत भयो । विगतमा नेकपाले गठन गरेको साइबर सेना र एमालेको आइटी आर्मी जस्तै वार रुम बनाएको भन्दै धेरैले आपत्ति जनाए ।

कतिपय कांग्रेस कार्यकर्ताले समेत ‘हामी हनुमान बन्न तयार छैनौँ’ भन्दै आलोचना गर्न भ्याए । तर, संयोजक बिष्ट आफूहरूले आइटी आर्मी र साइबर सेना देखेर वार रुम नबनाएको तर्क गर्छन् ।

बिष्टका अनुसार विगतदेखि नै कांग्रेसले यो समूहलाई प्रविधि र सामाजिक सञ्जाल उपसमितिको रुपमा काम गराइरहेको थियो । महाधिवेशनको संघारमा रहेको कांग्रेसले क्रियाशील सदस्यताको दर्ता देखि अनलाइन प्रविधिको व्यवस्थापन सोही उपसमितिबाट गराएको थियो । यसले पार्टीको क्रियाशील सदस्यताको नामावली देशभरबाट गरेर २ सय ७ ठाउँबाट अनलाइनमा इन्ट्री गर्ने काम गरिरहेको छ ।

‘त्यही समूहले अहिले औपचारिक रुप लिएको मात्र हो । यसभन्दा अघिदेखि हामीसँग जोडिएर सातसय आईटी प्रोफेसनलले काम गरिरहेकै थिए,’ बिष्टले भने, ‘तिनीहरूले पार्टीको जिल्ला, नगर र क्षेत्रीय सभापतिलाई सहयोग गर्न भनेर परिचालन गरेका थियौँ । ती सबै साथीहरूलाई एउटा छातामुनि ल्याउन एनसी विन गठन गरिएको हो ।’

अहिलेका लागि एनसी विन पार्टीको १४ औँ महाधिवेशन लक्षित रहेको उनले बताए । यो समूहले पार्टीको लागि प्रचारसामग्री बनाउने देखि अनलाइनबाट हुने पार्टीको गतिविधिमा काम गर्ने बिष्टले बताए । साथै आउँदो चुनाव केन्द्रित रहेर यसले पार्टीको एजेन्डा स्थापित गर्न भूमिका खेल्ने बताइएको छ ।

‘पार्टीको विधिविधानबारे कार्यकर्तालाई अनलाइनबाट सुसूचित बनाउनु हाम्रो काम हो,’ उनले भने, ‘यसबारे सामग्री वेबसाइटमा राखेपनि कार्यकर्ताले ती सामग्री हेरेको पाइँदैन । त्यसैको प्रचार गर्न हामीले काम गरिरहेका छौँ ।’

तर पछि भने निर्वाचनमा पार्टीको उम्मेदवारलाई सहयोग गर्नु यसको उद्देश्य रहेको बिष्टले स्वीकारे । त्यस्तै पार्टीको बारेमा कसैले गलत प्रचार गरेको पाइएमा त्यसको प्रतिवाद पनि वाररुमले सामाजिक सञ्जालमार्फत नै गर्ने उनको भनाइ छ । ‘कतै हाम्रो बारेमा गलत प्रचार गरिरहेको पायौँ भने वार रुमले त्यसको प्रतिवाद गर्छ, सत्यतथ्य बुझाउने कोशिस गर्छ,’ उनले भने ।

बिष्टको भनाइ केलाउँदा वार रुमको स्थापना नै विरोधी आवाजलाई तह लगाउन भएको हो भन्दा फरक नपर्ला ।

पत्रकार उज्वल प्रसाईं पनि राजनैतिक दलले अनेकौँ प्रोपोगाण्डा गर्नकै लागि यस्ता कमिटी गठन गरेको ठान्छन् । यस्ता फण्डा मच्चाइरहँदा पार्टीलाई आफ्नो भएका संघठनप्रति विश्वास छैन भनेर बुझ्न गाह्रो नहुने उनको भनाइ छ ।

‘प्रचार गर्न प्रचारप्रसार विभाग, विद्यार्थीको आवाज बोल्न विद्यार्थी संगठन जस्ता क्षेत्र विशेषका विभिन्न संघ पहिल्यै छन् । फेरि यो आइटी वाला फण्डा के का लागि ?,’ प्रसाईंको प्रश्न छ ।

‘भारतमा पनि केही समय अगाडि ‘आइटी सेल’ नामक यस्तै संघको प्रोपोगाण्डाबाट भाजपाले फाइदा लिएको थियो । त्यहीँबाट सिकेर नेपालका राजनीतिक दलले डिजिटल प्रोपोगाण्डा मच्चाउन चाहेका हुन सक्छन्’, उनले भारतको उदाहरण दिँदै यो समूहको स्थापनाको उद्देश्यमा शंका व्यक्त गरे ।

भाजपाले सन् २०१४ को निर्वाचन जित्नको लागि निजी कम्पनीलाई डिजिटल प्रोपागाण्डा गर्न जिम्मा लगाएको थियो । त्यसैलाई टेकेर पछि ‘आइटी सेल’ बनाए । सो समूहले विपक्षी दल र विरोधीको चरित्र हत्या गर्ने गर्थ्यो ।

त्यस्तै पत्रकार एवं विश्लेषक जगत नेपाल कांग्रेसले यसलाई कसरी परिचालन गर्छ भन्नेमा निर्भर रहेको बताउँछन् । ‘यदी यो अनेकौँ प्रोपोगाण्डा गर्न, विरोधीको चरित्रहत्या गर्न प्रयोग भयो भने हाम्रो लोकतन्त्रमाथि नै असर गर्छ । त्यसो भएन र जनता, कार्यकर्तालाई सुसूचित गर्न लागिपर्‍यो भने राम्रो नतिजा पनि देला,’ उनले भने ।

प्रकाशित मिति: आइतबार, भदौ २७, २०७८ ०६:२२