मुख्यमन्त्रीको सपना देखेका शाह मन्त्रीबाटै बाहिरिए, सभामुख थापाको पद धरापमा

मुख्यमन्त्रीको सपना देखेका शाह मन्त्रीबाटै बाहिरिए, सभामुख थापाको पद धरापमा

प्रकाश शाह ।

A+ A A-

सुदूरपश्चिम प्रदेशस्थित माओवादी केन्द्र नेतृत्वको सरकार एमालेको 'आड'ले अडेको थियो । प्रदेशसभामा एमाले ठूलो दल मात्रै थिएन अरु दुई जना सांसदलाई आफ्नो पक्षमा पार्न सके उसैको सरकार बन्ने स्थिति पनि थियो । तर, एमाले र माओवादीबीच गठबन्धन हुँदै पार्टी एकतासम्म पुग्दा सुदूरपश्चिममा माओवादीको नेतृत्वमा सरकार बनेको थियो ।

एमाले फुट्नुअघि माओवादी माधव नेपाल पक्षलाई सुदूरपश्चिम प्रदेश सरकारको नेतृत्व दिन पनि तयार थियो । प्रदेशसभामा एमालेका २५ सांसद रहेकामा त्यसबेला माधव नेपाल पक्षका १७ जना थिए ।

नेपाल पक्षलाई सुदूरपश्चिम प्रदेश सरकारको नेतृत्व दिन प्रचण्ड तयार भएपछि त्यसबेला नेपाल पक्षमा रहेका भीम रावलले एमाले संसदीय दलका नेता प्रकाश शाहलाई मुख्यमन्त्रीका लागि तयार रहन भनेका थिए । रावलले शाहलाई साउनभित्रै मुख्यमन्त्री बनाउने आश्वासन दिएका थिए । एमाले स्रोतका अनुसार शाह मुख्यमन्त्री बन्न तयार भइसकेका थिए ।

तर परिस्थिति उल्टियो । एमाले विभाजित भयो । शाह एमालेमै रहे । त्यसपछि तत्कालका लागि उनी मुख्यमन्त्री बन्ने सम्भावना टुट्यो ।

शाहले नेपाली कांग्रेसका संसदीय दलका नेता रणबहादुर रावलसमेत सहभागी एक जमघटमा आफ्नो मुख्यमन्त्री बन्ने अवसर गुमेको बताएका थिए । साउनभित्रै मुख्यमन्त्री बन्ने तयारी भए पनि केन्द्रीय राजनीतिले उक्त अवसर टुटेको त्यसबेला शाहले भनेका थिए ।

शाहले मुख्यमन्त्री बन्ने अवसर त गुमाए नै एकीकृत समाजवादीको पक्षमा सनाखत नगर्दा मन्त्रीबाटै राजीनामा दिनुपर्‍यो । शाहले मंगलबार मन्त्रीबाट राजीनामा दिएका हुन् । सुदूरपश्चिममा सभामुखबाहेक एमालेका २४ जना सांसद रहेकामा १४ जनाले एकीकृत समाजवादीको पक्षमा सनाखत गरेका छन् ।

सभामुख अर्जुन थापाको पद पनि धरमरमा

प्रदेशसभाका सभामुख अर्जुन बहादुर थापाको पद पनि धरमरमा परेको छ । नेकपा एमालेबाट प्रदेशसभाको सभामुख चुनिएका थापा पहिले नेपाल पक्षमा थिए । पार्टी विभाजनपछि भने उनले कता लाग्ने भन्ने स्पष्ट पारिसकेका छैनन् ।

सभामुख अर्जुन बहादुर थापा ।

सभामुख चुनिएपछि आफूले दल त्यागेर तटस्थ रहेकाले कुनै पार्टीको पक्षमा नरहेको थापाको भनाइ छ । ‘सरकार बन्न र बनाउनका लागि मेरो एक भोटले कुनै अर्थ राख्ने अवस्था छैन,’ उनले भने । आफू कुनै पार्टीको पक्षमा लाग्नुपर्ने अवस्था नआएको उनले बताए ।

तर, एकीकृत समाजवादीको पक्षमा नखुले थापा एमालेमै रहेको बुझिने समाजवादीका नेताहरू बताउँछन् । सभामुखको पद जोगिने या नजोगिने भन्ने विषय थापाको भूमिकामा निर्भर हुने समाजवादीका एक नेताले बताए । थापा एमालेमा खुलेमा उनको पद धरापमा पर्ने समाजवादीका नेताहरूको भनाइ छ ।

अहिले प्रदेशसभाका ५२ सांसदमध्ये समाजवादीका १४, माओवादीका १३, कांग्रेसका १२ र जसपाका एक गरी गठबन्धनमा ४० सांसद छन् । अर्थात् गठबन्धनका दलसँग सुदूरपश्चिममा दुईतिहाईभन्दा बढी मत छ । प्रदेशसभामा एमालेका १० र लोकतान्त्रिक समाजवादीका एक सांसद छन् ।

संसदीय अंकगणितले थापा एमालेमा खुले उनको पद धरापमा पर्ने देखाउँछ । समाजवादीका नेताहरूको प्रतिक्रिया पनि त्यस्तै छ ।

प्रकाशित मिति: बुधबार, भदौ २३, २०७८ १३:०३