कतार प्रहरीको रोजगारीमा बेथिति : चर्को रकम मागेको पीडितको आरोप, विभाग भन्छ- उजुरी आएको छैन

कतार प्रहरीको रोजगारीमा बेथिति : चर्को रकम मागेको पीडितको आरोप, विभाग भन्छ- उजुरी आएको छैन

A+ A A-

कतार प्रहरीमा रोजगारीमा जानका लागि म्यानपावरहरूले मोटो रकम मागेको गुनासो आउन थालेको छ । अन्तर्वार्ता दिएर छनोट भएकाहरूसँग म्यानपावरले एजेन्टमार्फत ७ देखि १० लाखसम्म माग गरेको पीडितहरूले आरोप लगाएका छन् ।

तर, रोजगारी गुम्ने डरले पीडितहरूले कुनै निकायमा यस विषयमा खुलेर भन्न सकेका छैनन् । वैदेशिक रोजगार विभागले अनुगमन नगर्दा आफूहरू समस्यामा पर्ने गरेको पीडितहरूको भनाइ छ ।

श्रम, रोजगार तथा सामाजिक सुरक्षा मन्त्रालयले कतारस्थित नेपाली दूतावासलाई मागपत्र प्रमाणीकरणको अनुमति दिएसँगै दूतावासले लाजिम्पाटस्थित अल ताक्वेत ओभरसिज नेपाल प्रालिलाई पूर्वस्वीकृति दिएको थियो । उक्त म्यानपावरले कतार प्रहरीको रोजगारीका लागि २०० जनाको माग गरेको छ ।

दूतावासका अनुसार उक्त म्यानपावरलाई फ्रि भिसा, फ्रि टकटमा कामदार पठाउन भिसा प्रमाणीकरण गरिएको हो । तर, पीडितहरूले भने म्यानपावरले आफूहरूसँग ७ देखि १० लाख मागेको बताएका छन् ।

वैदेशिक रोजगार विभागले भने कतार प्रहरीको रोजगारीका क्रममा ठगी भएको उजुरी नआएको जानकारी दिएको छ । त्यस्तो समस्या लिएर आए वैदेशिक रोजगार ऐनअनुसार तत्काल कारबाही हुने विभागका महानिर्देशक दीपक काफ्ले बताउँछन् ।

सरकारको वैदेशिक रोजगार नीतिविपरित गत वर्ष कतार प्रहरीको मागपत्र प्रमाणिकरण नगरी अन्तर्वार्ता लिएपछि वैदेशिक रोजगार विभागले तीन म्यानपावर कम्पनीमा छापा मारेको थियो । ती तीन वटै कम्पनी कारबाहीमा परेका थिए । गत वर्ष विभागले छापा मार्ने क्रममा लाजिम्पाटस्थित होप इन्टरनेशनलमा नेपालस्थित कतार दूतावासकै गाडी भेटिएको थियो ।

कतार पुलिसका लागि मागको पूर्वस्वीकृति बिना नै अन्तर्वार्ता लिएका एसओएस, डीडी ह्युमन रिसोर्स र होप इन्टरनेसनल गरी तीन वटा म्यानवावर कम्पनीको कारोबार रोक्का भएको थियो ।

विश्वकप फुटबललाई लक्षित गरी कतार प्रहरीका लागि ५ हजार र सुरक्षा गार्डका लागि २ हजार ५ सय गरी ७ हजार ५ सय नेपाली श्रमिक लैजाने भनिएको थियो । तर, विवादका कारण कारण रोकिएको थियो ।

प्रकाशित मिति: बुधबार, भदौ २३, २०७८ १२:१३