सुदूरपश्चिमका ६ संघीय सांसदसहित दुई सय २३ जना एकीकृत समाजवादीमा

A+ A A-

सुदूरपश्चिम प्रदेशमा नेकपा एमालेबाट विजयी ६ संघीय सांसदसहित दुई सय २३ जना जनप्रतिनिधिले नेकपा एकीकृत समाजवादी पार्टी रोजेका छन् ।

निर्वाचन आयोगमा सनाखत गर्न पाइने अन्तिम दिन मंगलबारसम्म प्रदेशका नौ जिल्लाका एमालेबाट विजयी दुई सय २३ जनाले एकीकृत समाजवादी पार्टीमा सनाखत गरेका हुन।

सुदूरपश्चिममा सबै भन्दाबढी कैलालीका ६५ जनप्रतिनिधिले नेकपा एमाले छाड्दै नेकपा एकीकृत समाजवादी रोजेका छन् । निर्वाचन कार्यालय कैलालीमा पुगेर ६५ जनाले नेकपा एकीकृत समाजवादी पार्टी रोजेका हुन् । निर्वाचन कार्यालयका अनुसार गोदावरी नगरपालिकाका उपमेयर रत्ना कडायत, घोडाघोडी नगरपालिकाकी उपमेयर प्रेमाकुमारी थापा र महोन्याल गाउँपालिकाकी उपाध्यक्ष पुजादेवी बुढामगरले एकीकृत समाजवादी रोजेका हुन्।

यस्तै १२ जना वडाध्यक्ष, ३७ जना वडा सदस्य, ९ जना कार्यपालिका सदस्य र उपप्रमुखसहित ९ जना जिल्ला समन्वय समितिका सदस्यले एमाले छाडेर एकीकृत समाजवादीको पक्षमा सनाखत गरेका हुन्।

गौरीगंगा नगरपालिकाका वडा नम्बर २, ५ र ७ का वडा अध्यक्ष, घोडाघोडी नगरपालिकाका ४, ७ र १० का वडा अध्यक्ष, लम्कीचुहा नगरपालिकाका वडा नम्बर ८ का वडा अध्यक्ष, टीकापुर नगरपालिकाका वडा नम्बर १ का वडाध्यक्षले एकीकृत समाजवादी रोजेका हुन्।

यस्तै गोदावरी वडा नम्बर ५ र ११ का वडा अध्यक्ष, धनगढी उपमहानगरपालिका वडा नम्बर १४ का वडा अध्यक्ष र मोहन्या गाउँपालिका वडा नम्बर ४ का वडा अध्यक्षसमेत एकीकृत समाजवादीमा आएका हुन्। कैलालीमा एमालेका दुई सय १० जना जनप्रतिनिधि थिए। झण्डै ३१ प्रतिशतले पार्टी छाडेका हुन्।

यस्तै कञ्चनपुरमा ५१ जनप्रतिनिधिले रोजे एकीकृत समाजवादी रोजेका छन् । मंगलबार साँझसम्म एक नगर प्रमुखसहितले जिल्ला निर्वाचन कार्यालयमा पुगेर सनाखत गरेका हुन् ।

जिल्ला निर्वाचन अधिकारी उदयराज जोशीका अनुसार एकीकृत समाजवादी मा सनाखत गर्नेमा १ नगर प्रमुख, ११ वडाध्यक्ष र अन्य कार्यपालिका सदस्य तथा वडा सदस्यहरु रहेका छन् । सनाखत गर्नेमा पुनर्वास नगरपालिकाका नगर प्रमुखसमेत रहेका छन् ।

एकीकृत समाजवादी रोजेका तीन जनाले सनाखत फिर्ताको निवेदन दिएका छन् । कृष्णपुर नगरपालिकाका २ वडाध्यक्ष र १ सदस्यले निवेदन दिएको जोशीले बताए । निवेदन निर्वाचन आयोगमा पठाइएको उनले बताए ।

७ नगरपालिका र २ गाउँपालिकासहित ९ स्थानीय तह रहेको कञ्चनपुरमा एमालेबाट ५ प्रमुख र ७ उपप्रमुख विजयी भएका थिए । वडाध्यक्ष र सदस्यमा पनि एमालेकै बहुमत उम्मेदवारहरु विजयी भएका थिए ।

बैतडीमा २३ जना जनप्रतिनिधिले नेकपा एकीकृत समाजवादी रोजेका छन्। जिल्ला निर्वाचन कार्यालय बैतडीका अनुसार एमालेबाट विजयी २३ जना जनप्रतिनिधिले एकीकृत समाजवादीमा सनाखत गरेका हुन्। समाजवादीतिर जानेमा ४ जना वडाध्यक्ष र अरु सदस्य छन् ।

डडेल्धुरामा एमालेबाट विजयी दुई जनप्रतिनिधि मात्रै एकीकृत समाजवादीतिर लागेका छन्। निर्वाचन कार्यालय (डडेल्धुरा) का अनुसार अमरगढी नगरपालिका–५ का वडाध्यक्ष खेमराज पाठक र भागेश्वर गाउँपालिका–४ का सदस्य प्रेम सिंह साउदले एकीकृत समाजवादीमा सनाखत गरेका छन्।

निर्वाचन कार्यालय, डोटीका अनुसार ३ जना जनप्रतिनिधिले एकीकृत समाजवादीमा सनाखत गरेका छन्। पूर्वी चौकी गाउँपालिका अध्यक्ष दीर्घराज बोगटी, दिपायल सिलगढी नगरपालिकाका उपप्रमुख शिवराज खड्का र सायल गाउँपालिकाका एक वडाध्यक्षले एमाले छोडेका हुन्।

दार्चुलामा एमाले विभाजनमा दुई जनप्रतिनिधि गएका छन्। एमालेबाट निर्वाचन दुई जना जनप्रतिनिधि एकीकृत समाजवादीमा सनाखत गरेका छन् । अपिहिमाल गाउँपालिकाका सदस्य रुकमति जागरी र भुरी धामीले एकीकृत समाजवादी पार्टीमा सनाखत गरेकी हुन् ।

बझाङमा एमालेका २५ जना जनप्रतिनिधिले एकीकृत समाजवादी रोजेका छन्। जिल्ला निर्वाचन कार्यालय बझाङका अनुसार एक गाउँपालिकाका अध्यक्ष, उपाध्यक्ष सहित वडाध्यक्ष, सदस्य गरेर २५ जनाले एकीकृत समाजवादी पार्टीमा सनाखत गरेका हुन्।

निर्वाचन कार्यालय बाजुराका अनुसार पाँच जना एमालेका जनप्रतिनिधिले नेकपा एकीकृत समाजवादीमा सनाखत गरेका छन्। एमाले छोड्नेहरूमा गाउँपालिकाका अध्यक्ष र उपाध्यक्ष एक–एक जना, दुई जना वडाध्यक्ष र एक जना सदस्य छन्। अछाममा २७ जना जनप्रतिनिधिले नेकपा समाजवादीमा सनाखत गरेका छन् ।

जिल्लाको साँफेबगर नगरपालिका प्रमुख कुलबहादुर कुँवर, उपप्रमुख बिरमला देवी बुड्थापा, चौरपाटी गाउँपालिका अध्यक्ष हर्कबहादुर साउद, वडा अध्यक्षसहित सदस्य गरी २७ जना जनप्रतिनिधिले एकीकृत समाजवादी पार्टी रोजेका हुन् ।

सुदूरपश्चिम प्रदेशमा १४ सांसद एकीकृत समाजवादीमा

प्रदेशमा १४ सांसदले नेकपा एकीकृत समाजवादी पार्टीमा सनाखत गरेसँगै सबै भन्दा ठुलो दल बनेको छ । एमाले सांसदहरू दीर्घ सोडारी, प्रकाश रावल, तारालामा तामाङ, आन्तरिक मामिला तथा कानुन मन्त्री पूर्णा जोशी, सामाजिक विकास मन्त्री लालबहादुर खड्काले समाजवादी रोजिसकेका छन् ।

यस्तै भौतिक पूर्वाधार राज्यमन्त्री चुनकुमारी चौधरी, सामाजिक विकास राज्यमन्त्री मना साउद, पूर्व उद्योग, पर्यटन, वन तथा वातावरण मन्त्री माया भट्ट, सांसदहरू बलबहादुर सोडारी, अम्मर साउद, कुलवीर चौधरी, सुशीला बुढाथोकी र एमाले प्रमुख सचेतक दुर्गा विकले एकीकृत समाजवादीका पक्षमा सनाखत गरेका थिए ।

सुदूरपश्चिम प्रदेशसभामा एमालेका २५ सांसद थिए । तीमध्ये १३ जनाले एकीकृत समाजवादी रोजेका हुन् । त्यस्तै सुदूरपश्चिमका ६ जना संघीय सांसद पनि एकीकृत समाजवादीमा खुलेका छन्। यसअघि एमालेका संघीय सांसद निरा जैरु, प्रेम आले, बिना बुढाथोकी, लक्ष्मी चौधरी, शेरबहादुर कुँवर र शारदा भट्टले एकीकृत समाजवादीमा सनाखत गरेका थिए।

प्रकाशित मिति: मंगलबार, भदौ २२, २०७८ २२:१८