बागमतीमा संघ र प्रदेशका १९ सांसदसहित २४० जनप्रतिनिधिले त्यागे एमाले

A+ A A-

देशका सात प्रदेशमध्ये राजनीतिक तथा आर्थिक दृष्टिकोणले महत्वपूर्ण मानिने बागमतीमा नेकपा एमाले फुटको असर परेको छ । बागमतीमा प्रतिनिधिसभा सदस्य, प्रदेशसभा सदस्य, स्थानीय तहका प्रमुख, वडाध्यक्षदेखि वडा सदस्यसम्म नेकपा एकीकृत समाजवादी रोज्नेको संख्या ठूलो छ ।

उत्तरी क्षेत्रस्थित चीनसँग जोडिएको रसुवा जिल्लामा भने एकीकृत समाजवादीमा खुल्ने सांसददेखि स्थानीय तहका जनप्रतिनिधिको संख्या शून्य छ । बागमतीका १० जिल्लामध्ये (उपत्यकाका तीन जिल्लाबाहेक) धादिङ, काभ्रे र मकवानपुरमा एकीकृत समाजवादीको राम्रो पकड देखिएको छ ।

निर्वाचन आयोगले प्रदेश र स्थानीय तहका जनप्रतिनिधिलाई नेकपा एमाले र जनता समाजवादी पार्टी विभाजनपछि नयाँ दल रोज्न दिएको समय मंगलबार साँझ ५ बजे सकिएको छ । एकीकृत समाजवादी रोज्ने प्रतिनिधिसभा सदस्य माधवकुमार नेपालसहित ६ जना छन् ।

काठमाडौं उपत्यका बाहेक १० जिल्लामध्ये मकवानपुरबाट प्रतिनिधिसभा सदस्यमा निर्वाचित विरोध खतिवडाले मात्रै एकीकृत समाजवादी रोजेका हुन् ।

मकवानपुरमा दुई जना एमालेबाट खतिवडा र कृष्णप्रसाद दहालले चुनाव जितेका थिए । दाहाल एमालेमै छन् भने खतिवडाले माधव नेपालको साथ दिए । एकीकृत समाजवादी रोज्नेमा ललितपुरका कृष्णलाल महर्जन छन् भने नवराज सिलवाल एमालेमै ।

काठमाडौंबाट नेपालसहित चार सांसद एकीकृत समाजवादीमा छन् । नेपाल, जीवनराम श्रेष्ठ, मुकुन्द न्यौपाने र रामकुमारी झाँक्री एकीकृत समाजवादी छन् । श्रेष्ठ र नेपाल प्रत्यक्ष निर्वाचित हुन् भने न्यौपाने र झाँकी समानुपातिकतर्फबाट सांसद भएका थिए ।

काठमाडौंबाट चुनाव जितेका ईश्वर पोख्रेल, कृष्णगोपाल श्रेष्ठ, कृष्णबहादुर राई, मायादेवी न्यौपाने, रामवीर मानन्धर, बिनाकुमारी श्रेष्ठ, विन्दा पाण्डे, सरिता न्यौपाने र सुजिता शाक्य भने एमालेमै छन् । भक्तपुरमा एकीकृत समाजवादी शून्य छ ।

भक्तपुरमा एमालेबाट महेश बस्नेतले मात्रै चुनाव जितेका थिए । काभ्रेमा एमालेबाट चुनाव जित्ने गोकुल बास्कोटा र समानुपातिकतर्फबाट सांसद बनेकी नवीना लामा एमालेमै रहँदा एकीकृत समाजवादी शून्य बनेको हो ।

प्रतिनिधिसभामा प्रत्यक्ष निर्वाचित खेमप्रसाद ओली र भूमिप्रसाद त्रिपाठी एमालेमै बसेपनि धादिङमा पनि एकीकृत समाजवादी शून्यको स्थितिमा छ । नुवाकोटमा एउटा निर्वाचन क्षेत्र जितेको एमालेका नारायणप्रसाद खतिवडा पनि एमालेमै छन् । एउटा मात्रै निर्वाचन क्षेत्र रहेको रसुवामा एमालेका उम्मेदवारले चुनावमा पराजित व्यहोरेका थिए ।

सिन्धुपाल्चोकमा एमालेबाट निर्वाचित शेरबहादुर तामाङ एमालेमै छन् । सिन्धुलीमा प्रत्यक्ष निर्वाचित गणेशकुमार पहाडी र सामानुपातिकतर्फ सांसद बनेकी गोमा देवकोटा एमालेमै रहँदा एकीकृत समाजवादीको पक्षमा कोही पनि देखिएनन् । दोलखामा एमालेबाट प्रत्यक्ष निर्वाचित पार्वत गुरुङ र समानुपातिक सांसद शान्तिमाया तामाङ पाख्रिन एमालेमा रहेका छन् । चितवनका कृष्णभक्त पोखरेल र सुरेन्द्र पाण्डे पनि एमालेमै छन् ।

बागमती प्रदेशसभामा एमालेका ५६ सांसदमध्ये १३ जनाले एमाले परित्याग गर्दै एकीकृत समाजवादी रोजेका छन् । प्रदेशसभा सदस्य राजेन्द्र पाण्डे, मुनु सिग्देल, रमा आलेमगर, लक्ष्मण लम्साल, बसुन्धरा हुमागाईं, माधव पौडेल, वसन्त मानन्धर, पार्वती सिलवाल, कुसुम कार्की, इन्द्रमाया गुरुङ, राजेन्द्रमान श्रेष्ठ, कृष्ण खनाल र मीना ज्ञवालीले एमाले त्याग्दै नयाँ दल एकीकृत समाजवादी रोजेका हुन् । १३ सांसदले एमाले छोडेसँगै बागमतीमा एकल बहुमत रहेको एमाले सरकार अल्पमतमा परिसकेको छ ।

यसैगरी बागमतीका १० जिल्ला (उपत्यकाबाहेक) का स्थानीय तहका दुई सय ४० जना जनप्रतिनिधिले एकीकृत समाजवादी रोजेका छन् । १० जिल्लामध्ये सबैभन्दौ धेरै धादिङका जनप्रतिनिधिले एमाले परित्याग गरेका हुन् ।

धादिङको एक नगरपालिका प्रमुख, गाउँपालिका अध्यक्ष र उपाध्यक्ष, १४ जना वडा अध्यक्षसहित ८५ जना जनप्रतिनिधिले निर्वाचन कार्यालय धादिङमा एकीकृत समाजवादीको पक्षमा सनाखत गरेका छन् । कार्यालयका अनुसार ६ जना जनप्रतिनिधिले यसअघि एकीकृत समाजवादीमा गरेको सनाखत फिर्ताको माग गर्दै निवेदन समेत दिएका छन् ।

काभ्रेका ५६ जना स्थानीय तहका जनप्रतिनिधिले एकीकृत समाजवादी रोजेको निर्वाचन कार्यालय काभ्रेले जानकारी दिएको छ । मकवानपुरको हेटौंडा उपमहानगरपालिकाकी उपमेयर मिना कुमारी लामा, कैलाश गाउँपालिका अध्यक्ष टंक मोक्तान, इन्द्रसरोबार गाउँपालिका अध्यक्ष जीवन लामासहित ३९ जनाले नेकपा एस रोजेको प्रदेश निर्वाचन कार्यालय, हेटौंडाले जानकारी दिएको छ ।

यसैगरी सिन्धुलीमा दुई जना जनप्रतिनिधिले एकीकृत समाजवादी रोज्दै सनाखत गरे । जसमध्ये एकले सनाखत फिर्ताको माग गर्दै निवेदन दिएका छन् ।

दोलखामा वडाध्यक्षसहित वडा सदस्य सात जना, सिन्धुपाल्चोकमा दुई जना वडा सदस्य, नुवाकोटमा नौ जनाले एकीकृत समाजवादी रोज्दै सनाखत गरेको निर्वाचन कार्यालयले जानकारी दिएको छ। नुवाकोटमा एक जनाले सनाखत फिर्ताका लागि निवेदन दिएको कार्यालले जनाएको छ ।

चितवनमा ३६ जना जनप्रतिनिधि, रामेछापका मन्थली नगरपालिका प्रमुखसहित ५ जनाले एकीकृत समाजवादी रोजेको निर्वाचन कार्यालयले जानकारी दिएको छ ।

प्रकाशित मिति: मंगलबार, भदौ २२, २०७८ २२:०१