पार्टीविरुद्ध किरिया बसेका वडा सभापति भन्छन्- मेरा लागि कांग्रेस मर्‍यो

A+ A A-

डडेल्धुराको अमरगढी नगरपालिका–९ का नरबहादुर पाल दुई पटक नेपाली कांग्रेसको वडा सभापतिमा निर्वाचित भए । उनी तेस्रो पटक पनि सभापति हुन्छु भन्नेमा ढुक्क थिए ।

तर, आइतबार सार्वजनिक भएको कांग्रेसको क्रियाशील सदस्यता सूचीमा उनको नाम थिएन । कांग्रेसमा १४ वर्षको उमेरदेखि सक्रिय रूपमा काम गरिरहेका पालले आफ्नो क्रियाशील सदस्यता खारेज गरिएको भन्दै सोमबार कांग्रेसको किरिया नै गरिदिए ।

'बिगतदेखि नै कांग्रेसका लागि काम गर्दै आएको मलाई थाहा नै नदिइ हटाइयो,’ पालले भने । पीडा र दुःख सहन नसकेर कांग्रेसको किरिया नै गरिदिएको उनले बताए ।

'सानै उमेरदेखि समाजसेवा गर्नुपर्छ भनेर पार्टीमा लागेँ । तर, एक्कासी आज आएर यस्तो गरेपछि धेरै नै दुःखित बनाएको छ,' उनले भने ।

'अब के गर्छु भन्ने सोच बनाएको छैन । तर, मेरो लागि कांग्रेस मरिसकेको छ,' उनले भावुक हुँदै भने, 'समय आएपछि इटको जवाफ पत्थरले दिनेछु ।’

पाल आफ्नो कपाल खौरेर किरिया बसेका छन् । १० दिनसम्मै किरिया बस्ने उनले बताए । किरिया गरेपछि राम्रैसँग गरौँ भन्ने सोच बनाएको पाल बताउँछन् ।

आफूले पार्टीमा गरेको योगदानको अनादर भएको बताउँछन् पाल । कांग्रेसको राजनीतिमा को कति बेला हट्छ भन्ने थहा नभएको उनले बताए ।

‘सक्रीय रूपमा काम गरेको कांग्रेसले देखेन । आजदेखि मेरो लागि नेपाली कांग्रेस मरेको हो,’ पालले भने । ‘नेपाली कांग्रेसको किरियाको मेरो पहिलो दिन,’ सोमबार कपाल खौरेको दुईवटा फोटो सामाजिक सञ्जालमा राख्दै उनले लेखेका पनि छन् ।

आफूले गरेको कामको मूल्यांकन नभएपछि भावुक हुँदै फेसबुकमा फोटो हालेको उनले बताए । नेपाली कांग्रेसमा मन लागेकालाई हटाउने र राख्ने भइसकेको उनले बताए ।

सार्वजनिक भएको क्रियाशील सदस्यको नामावलीमा धेरै सदस्यको नाम हटाइएको कांग्रेस डडेल्धुराले जनाएको छ । वडा, पालिका, प्रदेशसभा क्षेत्र र जिल्ला कार्यसमितिबाट निर्णयसहित अनुमोदन गरिएका ४०० भन्दा बढी सदस्यको नाम हटाइएको बताइएको छ ।