यी हुन् कर्णालीमा एकीकृत समाजवादीको पक्षमा खुल्ने जनप्रतिनिधि

A+ A A-

कर्णाली प्रदेशसभामा एमालेका २० सांसद थिए । तीमध्ये माधव नेपाल पक्षमा १२ जना थिए । एमाले विवाद चर्किंदै जाँदा माधव नेपाल पक्षमा रहेका प्रकाश ज्वाला, अम्मरबहादुर थापा, कुर्मराज शाही र नन्द सिंहले फ्लोर क्रस गरेर मुख्यमन्त्री महेन्द्रबहादुर शाहीलाई विश्वासको मत दिए ।

विपक्षीलाई विश्वासको मत दिएको भन्दै एमालेले उनीहरूलाई सांसदबाट हटायो । चार जना सांसद हटाउँदा १६ जना रहेकोमा एमाले पार्टी विभाजन भएपछि मुगुका चन्द्रबहादुर शाही, रुकुमपश्चिमका देवी ओली र जुम्लाका पदमबहादुर रोकायाले नेकपा एकीकृत समाजवादी पार्टी रोजेका छन् । अब कर्णालीमा एमालेका १३ जना सांसद छन् ।

प्रकाश ज्वालाको गृहजिल्ला सल्यानका ६४ जनप्रतिनिधिले गरे नयाँ दलमा सनाखत

नेता प्रकाश ज्वालाको गृहजिल्ला सल्यानका ६४ जना जनप्रतिनिधिले एकीकृत समाजवादीमा सनाखत गरेका छन् । निर्वाचन आयोग पुगेर उनीहरूले सनाखत गरेका हुन् ।

सल्यान जिल्लाका १० वटा स्थानीय तहमध्ये एमालेले चार स्थानीय तहमा प्रमुख, तीन स्थानीय तहमा उपप्रमुखसहित २७ वडाध्यक्ष, २८ दलित सदस्य, २४ महिला सदस्य र ५८ वडा सदस्यसहित कुल १ सय ४२ जना जनप्रनिधि निर्वाचित भएका थिए ।

कुल जनप्रतिनिधिमध्ये ६४ जनाले एकीकृत समाजवादी रोज्दा अब एमालेका जनप्रतिनिधिको संख्या ७८ छ ।

स्थानीय तहका प्रमुख एक, उपप्रमुख एक र १६ जना वडाअध्यक्षले सनाखत गरेको एकीकृत समाजवादी सल्यानका सचिव रमेश गौतमले जानकारी दिए । ‘सिद्ध कुमाख गाउँपालिकाका अध्यक्ष चित्रबहादुर चलाउने, कपुरकोट गाउँपालिका उपाध्यक्ष तिला बुढा मगरले एकीकृत समाजवादीमा सनाखत गरेका छन् ।’ उनले भने, ‘सनाखत गर्ने समय अझै भएका कारणले केही जनप्रतिनिधि थप हुन सक्छन् ।’

जुम्लाका ६१ जिल्ला समिति सदस्यमध्ये ५८ जनाले रोजे एकीकृत समाजवादी

नेकपा एमाले जुम्लाका ६१ सदस्यीय जिल्ला समितिमध्ये पदाधिकारीसहित ५८ जनाले एकीकृत समाजवादी रोजेका छन् । शनिबार पत्रकार सम्मेलनमार्फत उनीहरूले यसको घोषणा गरेका हुन् ।

जुम्ला जिल्ला अध्यक्ष तीर्थ बुढा, उपाध्यक्ष नन्दबहादुर रोकाया, सचिव आदिप्रसाद न्यौपाने, उपसचिव राजबहादुर खत्रीसहितका अन्य जिल्ला सदस्यहरूले एकीकृत समाजवादी रोजेका हुन् ।

नेकपा एमालेका अध्यक्ष केपी शर्मा ओलीको दम्भका कारणले आफूहरूले माधव नेपाल नेतृत्वको पार्टी रोजेको प्रदेशसभाका सदस्य पदमबहादुर रोकायाले बताए ।

दैलेखमा एकीकृत समाजवादी रोज्‍ने जनप्रतिनिधि ५७ जना

महावु गाउँपालिका अध्यक्ष जंगबहादुर शाही, उपाध्यक्ष प्रेमकुमारी बुढा र ठाँटीकाँध गाउँपालिका उपाध्यक्ष सुस्मिता सिंहले एकीकृत समाजवादीमा सनाखत गरिसकेकी छन् । दैलेखका ९० वडामध्ये ५३ वटामा एमाले विजयी भएको थियो । यसभन्दा अघि १२ जना वडा अध्यक्षले एकीकृत समाजवादीमा सनाखत गरेका थिए ।

समाजवादीमा सनाखत गर्नेमा महावु गाउँपालिका अध्यक्ष जंगबहादुर शाही, उपाध्यक्ष प्रेमकुमारी बुढा, वडा १ का वडा अध्यक्ष डम्बर थापा, वडा नं. ४ का वडा अध्यक्ष देव शाही, वडा नं. ५ का अध्यक्ष जगत हमाल, वडा नं. ६ डम्बर थापा छन् ।

त्यस्तै, ठाँटीकाँध गाउँपालिका उपाध्यक्ष सुस्मिता सिंहले समाजवादीमा सनाखत गरेकी छन् । भगवतीमाई गाउँपालिकाका अध्यक्ष दानबहादुर थापा र नारायण नगरपालिकाका उपप्रमुख सावित्री मल्ल एकीकृत समाजवादीमा खुलेका छन् ।

दुल्लु नगरपालिका वडा ९ का वडा अध्यक्ष रनबहादुर बोहोरा, भगवतीमाई गाउँपालिका वडा नं. २ वडा अध्यक्ष कर्णबहादुर शाही र नारायण नगरपालिका ३ का वडा अध्यक्ष चन्द्र उपाध्यायले एकीकृत समाजवादीमा सनाखत गरेका हुन् ।

त्यस्तै, एकीकृत समाजवादीमा सनाखत गर्ने अन्य जनप्रतिनिधिहरू महावै गाउँपालिकाका वडा सदस्यहरू गोमा ढकाल, राज शाही, कविता गिरी, रश्मी विक, शेरबहादुर ढाडा मगर, भीमसिंह दमाईं छन् ।

यस्तै दुल्लु नगरपालिकाका वडा सदस्यहरू खजुरा सुजी, खगिसरा तिमिल्सेना, ठाटीकाँध गाउँपालिकाका वडा सदस्य खगेन्द्र खनाल, भैरवी गाउँपालिकाका पानसरा थापा वडा सदस्य, भैरवी गाउँपालिकाका शंकर बयलककोटी वडा सदस्य, नारायण नगरपालिकाका वडा सदस्यहरू रमेश केसी, मनकुमारी सुनार, रत्न श्रेष्ठ, नमराज शाही, कृष्णबहादुर रावत र महावु गाउँपालिकाका वडा सदस्य खड्गबहादुर शाही रहेका छन् ।

११ वटा स्थानीय तह रहेको दैलेखमा २०७४ को स्थानीय निर्वाचनमा सातवटा स्थानीय तहमा एमालेले जितेको थियो । १४ जना प्रमुख/अध्यक्ष तथा उपप्रमुख/उपाध्यक्षमध्ये आठ जना एमालेमै रहने बुझिएको छ भने ६ जना एकीकृत समाजवादीमा जाने बुझिएको छ ।

दैलेखका ९० वडामध्ये ५३ वटा वडामा एमाले विजयी भएको थियो । तीमध्ये ३१ जना वडाध्यक्ष एमालेमै रहने भएका छन् । एकीकृत समाजवादीमा २२ जना वडा अध्यक्ष जाने देखिएको छ ।

कर्णाली प्रदेश सरकारका भौतिक पूर्वाधार विकासमन्त्रीसमेत रहेका एकीकृत समाजवादीका नेता अम्मरबहादुर थापाले अझै ५० भन्दा बढी जनप्रतिनिधिहरू समाजवादीमा खुल्ने बताए ।

कालीकोटका ३० जनप्रतिनिधिले गरे सनाखत

कालीकोटका नौ स्थानीय तहमध्ये दुई गाउँपालिकाका अध्यक्ष/उपाध्यक्ष र एक नगरपालिका प्रमुख र उपप्रमुखमा एमाले विजयी भएको थियो । एमाले विजयी भएका नरहरिनाथ गाउँपालिको अध्यक्षमा धीरबहादुर विष्ट, महावै गाउँपालिकाको उपाध्यक्षमा मनराज शाही, शुभकालिका गाउँपालिकाको अध्यक्षमा खडानन्द चौलागाईं, उपाध्यक्षमा पम्फा शाही विजयी भएका थिए ।

त्यस्तै, खाँडाचक्र नगरपालिकाको प्रमुखमा जसीप्रसाद पाण्डे र उपप्रमुख विजया विष्ट विजयी भएकी थिइन् ।

त्यसमध्ये नरहरिनाथ गाउँपालिका अध्यक्षमा धीरबहादुर बिष्ट, शुभकालिका गाउँपालिकामा अध्यक्षमा खडानन्द चौलागाईं, उपाध्यक्षमा पम्फा शाही र उपप्रमुख विजया विष्ट नयाँ बनेको दलमा सनाखत गरेको पूर्वएमाले सचिव चित्रसिंह गाउँले जनाए ।

कालीकोटका ४२ वडामध्ये २७ वटा वडामा एमालेले जितेकोमा त्यसमध्ये १६ वडा अध्यक्षले नयाँ बनेको दल एकीकृत समाजवादीमा सनाखत गरेको गाउँलेले जानकारी दिए ।

डोल्पामा ४१ जनाले गरे एकीकृत समाजवादीमा खनाखत

डोल्पामा नेकपा एमाले छाडेर ४१ जना जनप्रतिनिधिहरूले एकीकृत समाजवादीमा सनाखत गरेका छन् । सोमबार सामूहिक रूपमा जिल्ला निर्वाचन कार्यालयमा पुगेर हस्ताक्षर गरेका हुन् ।

ठूली भेरी नगरपालिकाका नगरप्रमुख गणेशबहादुर शाहीसहित आठ जना वडाध्यक्ष, चार जना जिल्ला समन्वय समितिका सदस्य १० जना वडा सदस्य, महिला सदस्य सात जना, दलित महिला सदस्य छ जना र कार्यपालिका सदस्य पाँच गरी जम्मा ४१ जनाले सनाखत गरेका हुन् ।

नेकपा एमालेको नेतृत्वले धोका दिएकाले सामाजवादी रोज्नुपरेको ठूली भेरी नगरपालिकाका नगरप्रमुख गणेशबहादुर शाहीले बताए ।

जिल्ला निर्वाचन कार्यालयमा एकीकृत समाजवादीमा हस्ताक्षर गर्नेमा ठूली भेरी नगरपालिकाका ३६ जना, जगदुल्ला गाउँपालिकाका ३ जना, मुड्केचुला गाउँपालिकाका १ जना र त्रिपूरासुन्दरी नगरपालिकाका १ जना रहेको जिल्ला निर्वाचन कार्यालयले जनाएको छ ।

रुकुम पश्चिममा एमाले कमजोर

रुकुम पश्चिममा ६५ जना जिल्ला कमिटी सदस्यमध्ये ४६ जनाले एकीकृत समाजवादी रोजेका छन् । नेकपा एमाले जिल्ला अध्यक्ष विमलकुमार पुनसहित जिल्ला कमिटीका ससस्यहरूले माधव नेपाल नेतृत्वको दल रोजेका हुन् ।

नेकपा एमालेका जिल्ला कमिटीका उपाध्यक्ष रहेको ऋषिप्रसाद शर्मालगायत १४ जना एमालेमा नै रहने निष्कर्ष निकालेका छन् । ६५ सदस्यीय जिल्ला कमिटीमा पाँच जना यसभन्दा अघि नै माओवादी केन्द्र रोजेका छन् ।

एमालेका सचिव हरिप्रसाद शर्मा, उपसचिव माधव गौतमलगायत बहुमत जिल्ला कमिटी एकीकृत समाजवादीमा रुपान्तरण भएको एकीकृत समाजवादीका अध्यक्ष पुनले जानकारी दिए ।

त्यस्तै, रुकुम पश्चिमबाट राष्ट्रिय सभाका सदस्य ठकेन्द्रप्रकाश पुरी र कर्णाली प्रदेशसभाका सांसद देवी ओलीले एकीकृत समाजवादी रोजेका छन् । प्रतिनिधिसभा सांसद तीर्था तीर्था गौतम भने एमालेमै रहेकी छन् ।

छवटा स्थानीय तह रहेको रुकुम पश्चिममा एमाले २०७४ सालको स्थानीय तहका निर्वाचन दुईवटा अध्यक्ष जितेको थियो । २ जनाले वडा अध्यक्ष जितेको एमालेमा एक जना एकीकृत समाजवादी र एक जना एमालेमा रहेका छन् ।

हुम्लामा पाँच जनाले गरे दलत्याग

हुम्लामा पाँच जनाले एमाले दल त्याग गरेका छन् । जिल्ला समन्वय समितिका सदस्य अजवीर शाही, अदानचुली गाउँपालिकाको कार्यपालिकाका सदस्य पम्फा शाही, वडा नम्बर ३ का सदस्य गोर्ख थापा, खड्क बुमी र वडा नम्बर ४ का सदस्य हस्त बुमीले दलत्यागमा सनाखत गरेका हुन् ।

सुर्खेतका चार जना वडा अध्यक्ष एकीकृत समाजवादीमा

सुर्खेतका नौवटा स्थानीय तहमध्ये तीनवटा स्थानीय तहमा एमाले विजयी भएको थियो । तीनवटा स्थानीय तहमा प्रमुख उपप्रमुख जितेको एमाले विभाजन हुँदा चार वडा अध्यक्ष र सात सदस्यहरूले मात्रै एकीकृत समाजवादीमा सनाखत गरेका छन् ।

सुर्खेतमा एमालेले सिम्ता गाउँपालिका, चौकुने गाउँपालिका र लेकबेशी नगरपालिकामा विजय हात पारेको थियो ।

यसभन्दा अघि माधव नेपाल पक्षमा रहेका सिम्ताका अध्यक्ष कवीन्द्रकुमार केसी, उपाध्यक्ष चन्द्रकला शाही, लेकवेशीका नगरप्रमुख गगनसिंह सुनार, उपप्रमुख शान्ति छन्तेल, चौकुनेका अध्यक्ष धीरबहादुर शाही र उपाध्यक्ष निर्मला राना पनि एमालेमै बसेका छन् ।

वीरेन्द्रनगर नगरपालिकाका– ८ का वडा अध्यक्ष थम्मप्रसाद गौतम, १० का रत्न बुढा र १२ का लोकप्रसाद चालिसे र चौकुने गाउँपालिका एक वडा अध्यक्षले एकीकृत समाजवादीमा सनाखत गरेका छन् ।

प्रकाशित मिति: मंगलबार, भदौ २२, २०७८ १९:३१