प्रधानमन्त्री कृषि आधुनिकीकरण परियोजना : चितवनमा १५ करोड ३२ लाख रुपैयाँ बराबरका कार्यक्रम

प्रधानमन्त्री कृषि आधुनिकीकरण परियोजना : चितवनमा १५ करोड ३२ लाख रुपैयाँ बराबरका कार्यक्रम

A+ A A-

प्रधानमन्त्री कृषि आधुनिकीकरण परियोजना कार्यान्वयन एकाई चितवनको वार्षिक कार्यक्रम सार्वजनिक गरिएको छ । परियोजना कार्यान्वयन एकाइ चितवनले कृषि ज्ञान केन्द्र चितवनको कार्यालयमा सोमबार कार्यक्रम सार्वजनिक गरेको हो ।

परियोजनाका लागि चितवनमा चालु आर्थिक वर्ष २०७८/७९ को लाागि १५ करोड ३२ लाख रुपैयाँ बजेट बराबरको कार्यक्रम सार्वजनिक गरिएको छ । जोन विकास कार्यक्रमतर्फ संघीय सरकारबाट आठ करोड २० लाख रुपैयाँ बजेट बिनियोजन गरिएको छ ।

ब्लक विकास कार्यक्रमतर्फ प्रदेश सरकारको तर्फबाट ३ करोड ७१ लाख र स्थानिय सरकारबाट पकेट विकास कार्यक्रम अन्तर्गत तीन करोड ४१ लाख रुपैयाँ विनियोजन गरिएको छ ।

प्रधानमन्त्री कृषि आधुनिकीकरण परियोजना एकाई चितवनका वरिष्ठ कृषि अधिकृत विनोदकुमार भट्टराईका अनुसार परियोजनाले यो आर्थिक वर्षमा जिल्लामा सञ्चालित चार वटा कृषि जोन कार्यक्रमलाई प्राथमिकतामा राखेको छ । लागत घटाउँदै उत्पादन वृद्धि गर्नका लागि कृषिमा आधुनिकीकरण र यान्त्रिकीकरणमा जोड दिई सिकाई केन्द्र, भण्डारण र बजारीकरणका लागि पनि बजेट छुट्याइएको उनले बताए ।

तरकारी जोनलाई ९३ लाख

प्रधानमन्त्री कृषि आधुनिकीकरण परियोजना कार्यान्वयन एकाई चितवनद्वारा भरतपुर महानगरपालिका ४ देखि ९ र ११ देखि २८ नम्बर वडासम्म सात सय ६९ हेक्टर क्षेत्रफलमा तरकारी जोन कार्यक्रम सञ्चालित छ । यो कार्यक्रमको लागि ९३ लाख बजेट बराबरको विभिन्न कार्यक्रम सार्वजनिक गरिएको छ ।

तरकारी बजार प्रवर्द्धन सहयोगका लागि ४५ लाख रुपैयाँ छुट्याइएको छ । सहभागितात्मक कृषि प्रविधि सिकाई तथा प्रदर्शनी केन्द्रको लागि २० लाख रुपैयाँ बजेट विनियोजन गरिएको छ । जोन र सुपरजोन क्षेत्रमा कृषि आधुनिकीकरण यान्त्रिकीकरण सहयोगमा १५ लाख रुपैयाँ छुट्याइएको छ । गाजर खेती जातीय उत्पादन प्रदर्शन, प्राङ्गारिक तरकारी उत्पादन र बजार प्रवर्द्धन लगायतका कार्यक्रम सार्वजनिक गरिएको छ ।

केरा जोनलाई ९९ लाख

चितवनको भरतपुर, कालिका, खैरहनी र रत्ननगर पालिकाको एक हजार पाँच सय बीस हेक्टर क्षेत्रफलमा केरा जोन कार्यक्रम लागु रहेको छ । यो कार्यक्रमको लागि मात्रै ९९ लाख २० हजार रुपैयाँ बजेट ल्याइएको छ ।

केरा पकाउने प्रविधि (राइपेनिङ च्याम्बर) निर्माण सहयोगका लागि ४० लाख रुपैयाँ बजेट विनियोजन गरिएको कृषि अधिकृत इन्द्र ढुङ्गानाले बताए । यो प्रविधि निर्माणका लागि किसानसँगै व्यवसायीले पनि प्रस्ताव दिन पाउनेछन् ।

राइपेनिङ च्याम्बर बिनाकेमिकल केरा पकाउने प्रविधि हो । यो प्रविधिबाट ४५ मेट्रिक टनसम्म केरा एकैचोटी पकाउन सकिन्छ । विषादी हालेर हरियो जातको केरा पकाउँदा भेट्नो कुहिने समस्या हुन्छ । राइपेनिङ च्याम्बरबाट केरा पकाउँदा यस्तो समस्या हट्ने र विषादीरहित भएकोले स्वास्थ्यवर्द्धक पनि हुने ढुङ्गानाले बताए ।

धान जोनलाई एक करोड ३१ लाख

धान जोन कार्यक्रम चितवनको रत्ननगर, राप्ती र खैरहनी नगरपालिकाको आठ हजार पाँच सय ४० हेक्टरमा लागु छ । यो कार्यक्रमका लागि एक करोड ३१ लाख रुपैयाँ बजेट विनियोजन गरिएको छ ।

धान जोनका लागि विशेषगरी कस्टम हायरिङ्ग सेन्टर २ वटा निर्माणको लागि ३० लाख, सहभागितात्मक कृषि प्रविधि सिकाई तथा प्रदर्शनी केन्द्रको लागि ५० लाख रुपैयाँ विनियोजन गरिएको छ । धान जोन अन्तर्गतका कार्यक्रममा सिँचाइ पूर्वाधार निर्माण तथा मर्मत सम्भार, बीउ उत्पादन सहयोग लगायतका कार्यक्रम ल्याइएको छ ।

मौरी जोनलाई ४५ लाख

परियोजनाको मौरी जोन कार्यक्रमका लागि चालु आर्थिक वर्ष २०७८/७९ को लागि ४५ लाख बजेट बराबरको कार्यक्रम सार्वजनिक भएको छ । यो कार्यक्रमको लागि मौरी घार वितरण, जोन/सुपरजोन क्षेत्रमा कृषि यान्त्रिकीकरण सहयोग, महको प्याकेजिङ् तथा ब्रान्डिङ सहयोग लगायतका कार्यक्रम अगाडि सारिएको छ ।

परियोजनाले सिक र कमाऊ शीर्षक अन्तर्गत प्राविधिक विद्यालयमा अध्ययनरत विद्यार्थीहरुलाई प्राविधिक शिक्षालयको साझेदारीमा व्यावसायिक उत्पादन कार्यक्रमलाई पनि प्राथमिकतामा राखेको छ ।

यो कार्यक्रमका लागि २० लाख बजेट विनियोजन गरिएको छ । परियोजनाले माटो सुधार तथा व्यवस्थापन कार्यक्रमका लागि ४ लाख रुपैयाँ बजेट छु्ट्याएको छ ।

प्रकाशित मिति: मंगलबार, भदौ २२, २०७८ ०९:५४