बालकको ज्यान गएपछि सिन्धुलीको ओम शान्ति अस्पताल तनावग्रस्त, ठूलो संख्यामा प्रहरी परिचालन (भिडियोसहित)

बालकको ज्यान गएपछि सिन्धुलीको ओम शान्ति अस्पताल तनावग्रस्त, ठूलो संख्यामा प्रहरी परिचालन (भिडियोसहित)

A+ A A-

चिकित्सकको लापरबाहीले बालकको मृत्यु भएको भन्दै पीडित परिवारले सिन्धुलीको ओम शान्ति अस्पताल घेराउ गरेका छन् । सिन्धुलीको तीनपाटन गाउँपालिका-२ स्थित भुवन कटुवालले सञ्चालन गरेको अस्पतालमा ६ महिने युनिक तामाङको मृत्यु भएको हो ।

पीडित परिवारले चिकित्सकको लापरबाहीले बालकको उपचारका क्रममा मृत्यु भएको आरोप लगाएका छन् । पीडित परिवारले चिकित्सको लापरबाहीले नै बालकको मृत्यु भएको भन्दै अस्पतालमा नाराबाजी गर्दै घेराउ गरेका हुन् ।

पीडित परिवार र स्थानीयले अस्पताल घेराउ गरेपछि स्थितिलाई नियन्त्रणमा लिन ठूलो संख्यामा प्रहरी परिचालन गरिएको छ । आगोले खुट्टा पोलेर घाइते भएपछि बालकलाई उपचारका लागि अस्पताल भर्ना गरिएको थियो ।

केही दिनअघि युनिकको खुट्टा आगोले पोलेपछि ओम शान्ति अस्पताल लगेको र सात दिनसम्म अस्पतालमा राखिएको परिवारले जनाएको छ । डिस्चार्ज भएको केही दिनपछि फेरि अस्पताल लगेको र बालकको स्थिति नसुध्रेपछि बालकलाई थप उपचारका लागि उनका बुबा सागर तामाङले काठमाडौं ल्याउन चाहेका थिए ।

‘हामीले घाउ बिग्रिँदै गएको देखेपछि काठमाडौं लान्छौँ भनेर तयारी थालिसकेका थियौँ,' मृतक बालकका मामा मदन तामाङले भने, ‘तर अस्पतालले हामी जसरी पनि ठीक पार्छौं भनेर लान दिएन । आज यस्तो दुर्गति भयो ।'

इलाका प्रहरी कार्यालय बेलघारीका अनुसार बिरामीको स्वास्थ्य बिग्रिँदै गएपछि १८ भदौ दिउसो ३ बजेतिर अस्पतालले लठ्याउने सुई लगाएसँगै बालकको होस गुम्यो । त्यसपछि परिवारले युनिकलाई थप उपचारको लागि काठमाडौं ल्याउने तयारी थाल्यो । तर, ल्याउँदाल्याउँदै बीचबाटोमै उनको मृत्यु भयो ।

अस्पतालकै लापरबाहीको कारण युनिकको मृत्यु भएको परिवारको आरोप छ ।

शव बोक्दै युनिकको बाबा

अस्पताल संचालक भुवन कटुवाल भने सम्पर्कमा नआएको प्रहरी बताउँछ । ‘हामी पनि अनुसन्धान गरिरहेका छौँ । पीडक भनिएका भुवन कटुवालको जारी छ,' इप्रका बेलघारीले भन्यो, ‘पोस्टमार्टम कार्य भइरहेको छ । सत्यतथ्य बुझेर आवश्यक प्रक्रिया चाल्छौँ ।'

भुवन कटुवालको दाइ पवन कटुवाल भने आफू कानुनी प्रक्रिया अनुसार सजाय भोग्न तयार रहेको बताउँछन् ।

अहिले बेलघारी क्षेत्रमा जिल्ला सदरमुकाम सिन्धुलीमाढीबाट प्रहरी पठाइएको छ । जिल्ला प्रहरी कार्यालय सिन्धुलीका अनुसार कुनै दुर्घटना नहोस् भनेर त्यहाँ ठूलो मात्रामा प्रहरी परीचालन गरिएको हो ।

प्रकाशित मिति: आइतबार, भदौ २०, २०७८ १५:४१