बागमतीमा सरकार जोगाउन एमालेलाई कठिन, गठबन्धन सरकार बनाउने तयारी

A+ A A-

नेकपा एमाले बागमती प्रदेश संसदीय दलको बैठकले बागमतीमा गठबन्धनको सरकार बनाउने निर्णय गरेको छ ।

नेकपा एमालेका १२ सांसद नेकपा एकीकृत समाजवादीतर्फ गएपछि बागमतीका मुख्यमन्त्री अष्टलक्ष्मी शाक्य अल्पमतमा परेकी छन् । मुख्यमन्त्रीमा नियुक्त भएको दुई सातामै शाक्य अल्पमतमा परेकी हुन् ।

आफू अल्पमतमा परेपछि संसदीय दलको नेता समेत रहेकी मुख्यमन्त्री शाक्यले आज बुधबार साँझ दलको बैठक राख्दै सरकार टिकाउन अन्य दललाई पनि सरकारमा समावेश गर्ने तयारी गरेकी हुन् । हेटौंडा–१ स्थित मुख्यमन्त्री निवासमा बसेको संसदीय दलको बैठकले संवैधानिक प्रक्रिया अनुसार सरकार टिकाउने निर्णय गरेको एमाले बागमतीका सचेतक दीपक निरौलाले जानकारी दिए । उनले अन्य दललाई पनि सरकारमा समावेश गराउन छलफल र वार्ता गर्ने निर्णय भएको बताए ।

स्रोतका अनुसार एमालेले राप्रपा र नेपाल मजदुर किसान पार्टीसँग सत्ता साझेदारका लागि छलफल गरिरहेको छ । यद्यपि एमालेलाई सरकार टिकाउन वा गठबन्धनको सरकार बनाउन एमाले र नेमकिपाको मतले मात्रै पुग्दैन । राप्रपा र नेमकिपासँग हाल सो प्रदेशमा दुई/दुई सांसद छन् । बागमतीमा ५६ सांसद संख्यासहित एकल बहुमतमा रहेको एमालेसँग हाल ४४ सांसद मात्रै छन् । यस्तै प्रमुख प्रतिपक्षी नेकपा मा‍ओवादी केन्द्रको २३, कांग्रेसको २२, विवेकशील साझाको ३ र एक स्वतन्त्र सांसद छन् । सरकार बनाउन ५५ मत आवश्यक पर्छ ।

नेकपा एकीकृत समाजवादी फुटेकोसँगै गठबन्धन नेतृत्वको चर्चा समेत चलेको छ । एकीकृत समाजवादीबाट सनाखत गरेका १२ जनालाई निर्वाचन आयाेगले प्रमाणीकरण गरेको खण्डमा गठबन्धनको पक्षमा सहजै बहुमत पुग्ने देखिन्छ।

‘बागमतीमा एमालेको बहुमतको सरकार नरहने निश्चित भइसकेको अवस्थामा हामी अन्य संवैधानिक प्रक्रिया अपनाएर सरकार टिकाउने छौं । सरकार टिकाइ राख्न अन्य दलसँग छलफल र वार्ता गर्ने निर्णय गरेका छौं,’ निरौलाले भने ।

निरौलाले एमाले त्यागेका नेताहरूको कारण पार्टी र बागमती प्रदेशमा समस्या भएको बताए । नेकपा एस रोजेका १२ जना सांसदमा केही कमी कमजोरी र भ्रम रहेको पनि निरौलाको आरोप छ । ‘उहाँहरू केही कमजोरीका साथ र भ्रममा परेर अर्को पार्टीमा जानु भएको छ । उहाँहरूसँग हामी छलफल र वार्ता गर्नेछौं,’ निरौलाले भने ।

पार्टी फुटमा जाँदा सांसदहरू आफ्नो पक्षमा ल्याउन नसकेको भन्दै बैठकमा मुख्यमन्त्री शाक्यको आलोचना भएको एक सांसदले बताए । तर शाक्यले भने आफू पार्टी विभाजनको पक्षमा नरहेको र सबैलाई विभाजनमा नलाग्‍न आग्रह गरेको भन्दै प्रष्टीकरण दिएकी थिइन् ।

प्रकाशित मिति: बुधबार, भदौ १६, २०७८ २१:१२