हिन्दू हुनुमा मलाई गर्व छ, तर हिन्दू राज्यको पक्षमा छैन : बलबहादुर केसी [अन्तर्वार्ता]

हिन्दू हुनुमा मलाई गर्व छ, तर हिन्दू राज्यको पक्षमा छैन : बलबहादुर केसी [अन्तर्वार्ता]

A+ A A-

नेपाली कांग्रेसको वडा अधिवेशन सुरु हुन दुई दिनमात्रै बाँकी छ । १८ भदौमा वडा अधिवेशन सुरु गरी मंसिर ९-१३ मा काठमाडौंमा महाधिवेशन गर्ने कांग्रेसको कार्यतालिका छ । स्थानीय तहको अधिवेशनका लागि नेताहरू गृहजिल्ला जान थालिसकेका छन् । लामो समय क्रियाशील सदस्यताको विवादमा अल्झेको कांग्रेसको अधिवेशनको प्रक्रिया प्रारम्भ भएको छ । यही सन्दर्भमा कांग्रेस केन्द्रीय सदस्य बलबहादुर केसीसँग गरिएको कुराकानीः

नेपाली कांग्रेसलाई महाधिवेशन लाग्यो कि अझै केही बाँकी छ ?

महाधिवेशन प्रक्रिया अगाडि बढिसक्यो । अब केही बाँकी छैन । नेपाली कांग्रेसको केन्द्रीय कार्यसमितिले निर्णय गरी केन्द्रीय निर्वाचन समिति बनायो । केन्द्रीय निर्वाचन समितिले जिल्ला-जिल्लामा निर्वाचन अधिकृतहरू पठाइसक्यो । यो त भयो प्रक्रियाको कुरो । यसका अतिरिक्त हामीबीच जेजस्ता समस्या वा मिल्न नसकेका कुराहरू थिए, ती सबै नै करिब-करिब मिलिसकेका छन् । त्यसैले अब महाधिवेशनको मैदानमा नेपाली कांग्रेस होमियो ।

निर्धारित समयमा महाधिवेशन नहुँदा जुन उत्साह देखिनुपर्ने हो त्यो त देखिएन नि होइन ?

कुन हदसम्म भयो भने उत्सव मान्ने भन्ने त्यसको कुनै निश्चित मापदण्ड त छैन, तर स्वभाविक रूपमा निर्धारित समयसीमाभित्र महाधिवेशन गर्न नसक्दा उत्साहमा केही कमी आयो होला । तर, अधिवेशन प्रक्रिया प्रारम्भ भएसँगै नेता कार्यकर्तामा त्यो उत्साह फेरि आएको छ । ढिलै भए पनि अधिवेशन प्रक्रिया अगाडि बढेको छ । यो नै सुखद् पक्ष हो । अब यो प्रक्रियालाई कुनै कुराले रोक्न सक्दैन ।

यसपटक क्रियाशील सदस्यताको विवादले निम्त्याएको तिक्तता त अन्तिम समयसम्मै रह्यो नि ?

नेपाली कांग्रेस लोकतान्त्रिक पार्टी हो । पार्टीभित्र वादविवाद हुन्छ, मतभेद र विरोध पनि हुन्छ । तर अन्तिममा जुन निर्णय हुन्छ, सो निर्णय सबैले मानेर जाने परम्परा छ । यसपटक पनि त्यस्तै भएको हो ।

नेताहरू नै अनसन बस्नुभयो । समस्या भएर अनसन वा विरोध भएको नभई तपाईंहरूले अनावश्यक विवाद सिर्जना गरी विरोधका लागि विरोध गर्नुभयो भन्ने संस्थापन पक्षको आरोप छ, के भन्नुहुन्छ ?

यहाँ मात्रै होइन, संसारभरि नै संस्थापन पक्षले दिने तर्क यस्तै हुन्छ । वा भनौँ जो पावरमा हुन्छ उसले बोल्ने भाषा यही नै हो । हामी विधि र प्रक्रियामै छौँ, सबैलाई न्याय गरेका छौँ भन्ने गर्छन् उनीहरू ।

तर, क्रियाशील सदस्यता वितरणमा गम्भीर त्रुटिहरू थिए । विधि र प्रक्रिया मिचेर क्रियाशील सदस्यता वितरण गरी संस्थापन पक्ष पूरै पार्टी नै क्याप्चर गर्न चाहन्थ्यो । हामीले त्यो प्रवृत्तिको विरोध गरेका हौँ । स्वतन्त्र र निष्पक्ष रूपमा अधिवेशन होस् भनेर हामीले बेथितिविरुद्ध आवाज उठाएका हौँ । र, धेरै हदसम्म कमीकमजोरी सच्याउन सफल पनि भएका छौँ ।

वरिष्ठ नेता रामचन्द्र पौडेलसहित तपाईंहरू पार्टीमा विरोध त गर्नुहुन्छ तर अन्तिम समयसम्म अडान लिन सक्नुहुन्न भन्ने नेताहरूको गुनासो छ नि, होइन ?

उहाँहरूको गुनासो जायज छ । यदि नेतृत्व तहमा उहाँहरू हुनुहुन्थ्यो भने पनि गर्ने निर्णय यस्तै नै हुन्थ्यो । हामी अन्यायविरुद्ध आवाज पनि उठाउँछौँ र हाम्रो अडानकै कारणले कुनै प्रक्रिया अवरुद्ध नहोस् भन्नेमा पनि सचेत छौँ । त्यसैले दबाब सिर्जना गरी जति सकिन्छ सुधार गर्ने हाम्रो प्रयत्न हो ।

अहिले नेपाली कांग्रेसका केही नेताहरू हिन्दू राज्यको मुद्दा उठाइरहेका छन् । यसलाई तपाईंले कसरी हेर्नुभएको छ ?

म हिन्दू हुँ । हिन्दू परिवारमा जन्मिएकोमा मलाई गर्व छ । व्यक्तिको धर्म हुन्छ तर राज्यको कुनै धर्म हुँदैन । त्यसमाथि पनि हिजो धर्म निरपेक्षतामा हस्ताक्षर गर्ने म पनि हो । सस्तो लोकप्रियताका लागि र क्षणिक स्वार्थ पूर्तिका लागि वा भनौँ भोटको लोभले यस्तो कुरा गर्न पाइँदैन ।

उनीहरूलाई वास्तवमै हिन्दू राज्य चाहिएको हो भने त्यसको पनि एउटा निश्चित विधि र प्रक्रिया छ । त्यसका लागि संविधान संशोधन गर्नतिर लागे भइहाल्यो नि । त्यसैले उनीहरूले दिन खोजेको नाराले समस्या चर्काउने काम मात्रै गर्छ यसले समाधान दिँदैन । त्यसैले एउटा लोकतान्त्रिक पार्टीमा रहेकाहरूले अनावश्यक बाटोमा लाग्नु हुँदैन ।

संविधानसभा सदस्यको हैसियतले यो संविधानको एक जना हस्ताक्षरकर्ता म पनि हुँ । त्यो हस्ताक्षरकर्ताको नाताले संविधानमा जे कुरा लेखिएका छन्, त्यसको मैले अक्षरशः पालना गर्नुपर्छ ।

हेर्नुस् भिडियो अन्तर्वार्ता :