राजेन्द्र पाण्डे भन्छन्- बागमतीमा सरकार परिवर्तन हुन्छ, म मुख्यमन्त्री हुन्छु

राजेन्द्र पाण्डे भन्छन्- बागमतीमा सरकार परिवर्तन हुन्छ, म मुख्यमन्त्री हुन्छु

A+ A A-

बागमती प्रदेशसभा सदस्य तथा नेकपा एकीकृत समाजवादीका नेता राजेन्द्र पाण्डेले आफू मुख्यमन्त्री बन्ने बताएका छन् ।

मंगलबार प्रदेश निर्वाचन कार्यालय, हेटौँडामा नेकपा एकीकृत समाजवादी पार्टीका पक्षमा सनाखत गराएपछि प्रतिक्रिया दिँदै पाण्डेले आफू बागमतीको मुख्यमन्त्री बन्ने बताएका हुन् । मुख्यमन्त्रीमा तपाईंको नाम चार्चामा छ नि भन्ने शिलापत्रको प्रश्नमा पाण्डेले भने, ‘पार्टीले के निर्णय गर्छ थाहा छैन । मेरो विषयमा पनि कुरा भएको छ ।’

नेता पाण्डेले अष्टलक्ष्मी शाक्य अझै पनि एकीकृत समाजवादीमा आए मुख्यमन्त्रीबाट नहट्ने बताए । ‘उहाँले नेकपा एकीकृत समाजवादीमा आउँछु भन्नुभयो भने मुख्यमन्त्री रहनु हुन्छ । उहाँले एमालेमै बस्छु भनेर बोलेको कुरा सुनेको छु । त्यसैले अब उहाँ मुख्यमन्त्री रहनुहुन्न,’ उनले भने । शाक्य २ भदौमा बागमती प्रदेशको मुख्यमन्त्रीमा नियुक्त भएकी थिइन् ।

राजेन्द्र पाण्डे भन्छन्- बागमतीमा सरकार परिवर्तन हुन्छ, म मुख्यमन्त्री हुन्छु@Shilapatra pic.twitter.com/XgRJg2o95J
— Shilapatra (@Shilapatra) August 31, 2021

मुख्यमन्त्री बनेको दुई सातामै शाक्य अल्पमतमा परेकी छन् । निर्वाचन आयोगले २२ भदौमा प्रमाणिकरण गरेसँगै एकीकृत समाजवादीले एमालेलाई दिएको समर्थन फिर्ता लिने नेता पाण्डेले बताए । आयोगबाट प्रमाणिकरण भएपछि सरकार परिवर्तनको प्रक्रिया अगाडि बढाइने उनको भनाइ छ ।

‘सरकारलाई दिएको समर्थन फिर्ता लिने बित्तिकै शाक्य अल्पमतमा पर्नुहुन्छ । अल्पमतको सरकार चलाएर पदमा बस्न मिल्दैन,’ उनले भने । मंगलबार प्रदेश निर्वाचन आयोगको कार्यालयमा पुगेर बागमतीका सामाजिक विकास मन्त्री कृष्ण खनालसहित १२ सांसदले नेकपा एकीकृत समाजवादीका पक्षमा सनाखत गरेका थिए । नेता पाण्डेले एकीकृत समाजवादीमा बागमतीका अन्य प्रदेशसभा सदस्य पनि थपिने दाबी गरे ।

प्रकाशित मिति: मंगलबार, भदौ १५, २०७८ १७:३४