फेसबुकमा वैदेशिक रोजगारीका झुटा र आकर्षक विज्ञापनको बिगबिगी, यसरी हुन्छ लाखौँको ठगी

फेसबुकमा वैदेशिक रोजगारीका झुटा र आकर्षक विज्ञापनको बिगबिगी, यसरी हुन्छ लाखौँको ठगी

A+ A A-

कोरोना महामारीका कारण दुई वर्षयता वैदेशिक रोजगारी क्षेत्र ठप्पप्राय: छ । रोजगारदाता देशले विगतमा जस्तो नेपालबाट कामदारको माग गरेका छैनन् । तर, यो समयमा विभिन्न देशबाट आकर्षक 'डिमाण्ड' आएको भन्दै सामाजिक सञ्जालमा विज्ञापन गरी ठगी गर्ने गिरोह सक्रिय छ ।

एक वर्षयता सामाजिक सञ्जालमा वैदेशिक रोजगारीको आकर्षक विज्ञापनकै आधारमा आर्थिक ठगीका उजुरी लिएर धेरै पीडितहरू आउने गरेको वैदेशिक रोजगार विभागले जानकारी दिएको छ । सामाजिक सञ्जालको विज्ञापनकै आधारमा ठगिएको उजुरी आए पनि ठगी गर्नेको पहिचान भने नखुल्ने गरेको विभागले जनाएको छ ।

विभागका अनुसार वैदेशिक रोजगारीका लागि विभिन्न देशको आकर्षक विज्ञापन गर्ने र पैसा लिएपछि फेसबुक तथा अन्य सामाजिक सञ्जालको एकाउन्ट बन्द गरी विज्ञापन गर्ने व्यक्ति फरार भएका उजुरी आउने गरेका छन् ।

सामाजिक सञ्जालमा गरिएको विज्ञापन

रोजगारीका नाममा ठगी गरिरहेका व्यक्तिसँग वैदेशिक रोजगारीका बारेमा राम्रो जानकारी नभए पनि उनीहरूले प्रलोभनमा पारी लाखौँ ठगी गरिरहेको वैदेशिक रोजगार विभागका निर्देशक तथा सूचना अधिकारी महेन्द्रनाथ भट्टराई बताउँछन् ।

रोजगारीको डिमाण्ड देख्नेबित्तिकै केही नबुझी पैसा दिने गरेका कारण धेरै जना आर्थिक शोषणमा परिरहेको भट्टराईको भनाइ छ ।

यसरी ठगिन्छन्

गत बुधबार कोटेश्वर बस्ने रामेछाप गोकुलगंगा–३ का ३३ वर्षीय पोषबहादुर सुनुवारलाई युरोपेली देश पठाइदिने प्रलोभन देखाएर छ जना युवालाई ठगी गरेको भन्दै महानगरीय अपराध महाशाखाको टोलीले पक्राउ गरेको थियो ।

सुनुवारलाई महाशाखाले रोजगारीका नाममा ठगी गरेको भन्दै अनुसन्धानका लागि विभागमा जिम्मा लगाएको थियो । उनले सामाजिक सञ्जाल फेक फेसबुक आईडी बनाएर विज्ञापन गरी प्रतिव्यक्ति ७ लाखसम्म ठगी गरेको अनुसन्धानबाट खुलेको विभागले जानकारी दिएको छ ।

यस्तै, काभ्रेपलाञ्चोकको महाभारत गाउँपालिका– १ घर भएका २८ वर्षीय मीनध्वज भनिने विचारमान मोक्तानलाई छ जनालाई कम्बोडिया पठाइदिन्छु भनेर ३९ लाख ठगी गरेको आरोपमा महानगरीय अपराध महाशाखाले साउन ३२ मा पक्राउ गरी वैदेशिक रोजगार विभागमा जिम्मा लगाएको थियो ।

उनले पनि सामाजिक सञ्जालमा वैदेशिक रोजगारीको विज्ञापन गरी रोजगारीको खोजीमा रहेका युवालाई ठगी गरेको विभागले जनाएको छ ।

यसैगरी, सप्तरीको रुपनी गाउँपालिका- २ बस्ने एजेन्ट अशोककुमार यादवले मोटो रकम लिएर नेपालीहरूलाई यूएई पठाए । यादवले सञ्जय दासलाई दुबईको नुन फुड कम्पनीमा आकर्षक तलबसहित प्याकिङको काममा लगाइदिने भन्दै २ लाख ४३ हजार ६ सय रुपैयाँ, सप्तरीको विष्णुपुर गाउँपालिकाका बेदानन्द यादवबाट २ लाख ४२ हजार ३ सय र धीरेन्द्र दाससँग १ लाख ४६ हजार रुपैयाँ लिएर त्यहाँ पठाए । तर, उनीहरूले यूएईमा भनेजस्तो काम नपाएपछि अहिले अलपत्र परेका छन् ।

एजेन्ट यादवले पनि फेकबुकमा झुटो विज्ञापन गरी उनीहरूलाई यूएई पठाएको पीडितले विभागको कल सेन्टरमा उजुरी गरेका छन् ।

सप्तरीकै शम्भुनाथ नगरपालिका- ६ बस्ने एजेन्ट छुतहरू मियाले पनि १२ जनासँग जनही २ लाखका दरले रकम उठाएर भिजिट भिसामा यूएई पठाए । एजेन्टले भिजिट भिसामा यूएई पठाएका उनीहरू अहिले बिचल्लीमा परेका छन् । ती १२ जना पनि सामाजिक सञ्जालको विज्ञापनबाट ठगिएका हुन् ।

यी त विभागमा उजुरी परेका प्रतिनिधि पात्र मात्र हुन् । महिनामा २ सयभन्दा बढी युवा धेरै–थोरै सामाजिक सञ्जालको विज्ञापनकै आधारमा ठगिएको उजुरी लिएर आउने गरेको विभागले जानकारी दिएको छ ।

सामाजिक सञ्जालमा गरेको विज्ञापनका आधारमा मासिक १० करोडभन्दा धेरै ठगीका व्यक्तिगत उजुरी विभागमा पर्ने गरेका छन् ।

सामाजिक सञ्जालबाट ठूलो रकम ठगी गर्ने व्यक्ति वैदेशिक रोजगारीमा कामदार पठाउने कुनै पनि म्यानपावरसँग संग्लन नहुने गरेको विभागले जानकारी दिएको छ ।

सामाजिक सञ्जालमा वैदेशिक रोजगारीको विज्ञापन गरी एउटै व्यक्तिले ३०–४० जनासँग ५० लाखसम्म ठगी गरेर फरार भएका मुद्दाहरू दर्ता भएको विभागले जनाएको छ ।

विज्ञापन यसरी गरिन्छ

वैदेशिक रोजगारीका नाममा झुट र आर्थिक ठगी गर्ने उद्देश्यले सामाजिक सञ्जालमा विज्ञापन भइरहेको विभागले जानकारी दिएको छ ।

फेसबुकमा राज समीर नाम गरेका व्यक्तिले युरोपका केही देशमा पानीजहाजमा रोजगारीका लागि ५० जनाको डिमाण्ड आएको भन्दै विज्ञापन गरेका छन् । उनले गरेको विज्ञापन युरोपका कुनै देशबाट प्रमाणीकरण नगरिएको विभागले जनाएको छ ।

उनले ठगी गर्ने नियतले विज्ञापन गरेका कारण सचेत हुन विभागले रोजगारीको खोजीमा रहेका युवालाई आग्रह गरेको छ ।

यस्तै, युनिक पुरन नाम गरेका व्यक्तिले कतारको यूसीसी कम्पनीमा २ सय जनाका लागि प्लम्बरको डिमाण्ड आएको भन्दै फेकबुकमा विज्ञापन गरेका छन् ।

पुरनले गरेको विज्ञापन पनि कतारस्थित नेपाली दूतावासमा प्रमाणीकरण नभएका कारण झुटो अथवा ठगी गर्ने माध्यम भएको विभागले जनाएको छ ।

यसैगरी, केपी आचार्यले यूएईको एक कम्पनीमा कामदारको डिमाण्ड माग भएको भन्दै फेसबुकमा विज्ञापन गरेका छन् । उनले तत्काल कामदारको आवश्यकता परेको भन्दै गरेको विज्ञापन पनि रोजगारीको खोजीमा रहेका युवा ठग्नका लागि गरिएको विभागले जनाएको छ ।

उनले विज्ञापन गरेको डिमाण्ड यूएईस्थित नेपाली दूतावासमा प्रमाणीकरण नभएको विभागले जनाएको छ ।

एउटै व्यक्तिले खाडीका देश, युरोपका देश र अन्य देशबाट ५ सय जनाभन्दा धेरै कामदारको माग आएको भन्दै विभिन्न रोजगारदाता कम्पनीको फोटो राखी फेसबुकमा विज्ञापन गरिरहेका हुन्छन् । यसरी गरिएका विज्ञापन ठगी र झुटा भएको विभागले जनाएको छ ।

सामाजिक सञ्जालमा विज्ञापनकै आधारमा वार्षिक १ हजारभन्दा धेरै रोजगारीको खोजीमा रहेका युवा ठगिने गरेको विभागको तथ्यांक छ ।रोजगारीका नाममा विज्ञापन गर्ने एजेन्ट र व्यक्तिका बारेमा स्वयम् ठगिने पीडितसँग जानकारी नहुने गरेको विभागले जनाएको छ ।

वैदेशिक रोजगारीमा कामदार पठाउँदै आएका म्यानपावर कम्पनीले विभिन्न देशबाट ल्याएका डिमाण्ड प्रमाणीकरण गरी पूर्व र अन्तिम श्रम स्वीकृति लिनुपर्ने कानुनी व्यवस्था रहेको विभागका निर्देशक भट्टराई बताउँछन् ।

सरकारले रोजगारीका नाममा भइरहेको ठगी नियन्त्रण गर्न संस्थागत र व्यक्तिले ल्याएका डिमाण्ड सम्बन्धित देशको दूतावासबाट प्रमाणीकरण गरेपछि मात्र श्रम स्वीकृति जारी गर्ने गरेको भट्टराईले बताए ।

‘सामाजिक सञ्जालमा वैदेशिक रोजगारीका डिमाण्डको विज्ञापन गर्न पाइँदैन । म्यानपावर कम्पनीले भिसा प्रमाणीकरण गरेपछि मात्र उनीहरूको कार्याललको पेजमा विज्ञापन गर्न पाउँछन्,’ उनले भने, ‘रोजगारीका नाममा ठगी गर्ने नियत भएका केही व्यक्तिले विज्ञापन गरिरहेका छन् । त्यस्ता विज्ञापनको पछि लाग्दा धेरै युवायुवतीहरू आर्थिक ठगीमा पर्ने गरेका छन् । यो समस्याका रूपमा देखा पर्दै छ ।’