माधव नेपालको पार्टीमा खुलेका सांसदलाई मन्त्रीको अफर गर्दै मुख्यमन्त्री शाक्य

माधव नेपालको पार्टीमा खुलेका सांसदलाई मन्त्रीको अफर गर्दै मुख्यमन्त्री शाक्य

A+ A A-

बागमतीकी मुख्यमन्त्री अष्टलक्ष्मी शाक्यले मन्त्री बन्न नेकपा एकीकृत समाजवादीका सांसदलाई अफर गरेकी छन् ।

एमाले विभाजनसँगै धरापमा परेकी शाक्यले ठूलो संख्यामा मन्त्रिपरिषद् विस्तार गर्दै आफ्नो सत्ता टिकाउने योजना बुनेकी छन् । २ भदौमा शाक्य मुख्यमन्त्री बनेकी हुन् । शाक्यले एकीकृत समाजवादीमा लागेका सांसदलाई मन्त्री बन्न अफर गरेसँगै बागमतीको राजनीतिमा तरंग आएको छ ।

बागमती प्रदेशमा एकीकृत समाजवादीको नेतृत्वकारी भूमिका नेता राजेन्द्र पाण्डेले लिएका छन् । प्रदेशसभा सदस्यसमेत रहेका पाण्डेले आफ्नो पक्षमा १२ जना सांसद रहेको दाबी गर्दै आएका छन् । मुख्यमन्त्री शाक्यले एकीकृत समाजवादीका केन्द्रीय सदस्य तथा प्रदेश सांसद कृष्णप्रसाद खनाललाई यसअघि नै सामाजिक विकास मन्त्रालयको जिम्मेवारी दिइसकेकी छन् । खनाल माधव नेपालले चन्द्रागिरिमा गरेको भेलामा उपस्थित भएका थिए ।

मुख्यमन्त्री बनेको थोरै दिनमै सत्ता छोड्नु पर्ने राजनीतिक परिस्थति आएपछि शाक्यले एकीकृत समाजवादीका सांसद फकाउन थालेको एक सांसदले जानकारी दिए । एमालेले शाक्यलाई मुख्यमन्त्रीमा कायम राख्न आवश्यक परे २२ जनासम्मको मन्त्रिमण्डल बनाउने गृहकार्य गरिरहेको हो । एकीकृत समाजवादीका अध्यक्ष माधव नेपालले शाक्यलाई आफ्नो पार्टीमा नआए मुख्यमन्त्रीबाट हटाउने बताएपछि एमालेले मन्त्रिपरिषद् विस्तार गरी सांसद फकाउन खेल सुरु गरेको एक सांसद बताउँछन् ।

‘शाक्यले जसरी पनि आफू हट्ने देखेपछि मन्त्रालय विस्तार गर्ने र एकीकृत समाजवादीका सांसदलाई मन्त्री बनाउन फकाउँदै हुनुहुन्छ । तर, समाजवादीमा लागेका कसैले उहाँलाई साथ दिँदैनन्,’ एक सांसदले शिलापत्रसँग भने । नेकपा एमाले बागमतीका सचेतक दिपक निरौलाले भने शाक्यलाई मुख्यमन्त्रीबाट हटाउन चुनौती दिए । ‘संविधानमा ११ वटा मन्त्रालय र २२ जनासम्म मन्त्री बनाउने व्यवस्था छ । हामी मन्त्रिपरिषद् विस्तार गरेर ११ वटा मन्त्रालय बनाउँछौँ,’ निरौलाले भने ।

शाक्यले ११ जना मन्त्री र थप ११ राज्यमन्त्री बनाएर सत्ता टिकाउने रणनीति बनाएकी छिन् ।

एकीकृत समाजवादीले भने शाक्यको सरकार टिकाउने रणनीति सफल नहुने बताएको छ । एकीकृत समाजवादीमा केही सांसद गए राप्रपा र नेपाल मजदुर किसान पार्टीका सांसदलाई सरकारमा ल्याउने तयारी पनि एमालेले गरेको छ । बागमतीमा राप्रपाका २ र नेमकिपाका २ सांसद छन् । सचेतक निरौलाले शाक्यको नेतृत्वमा अब बहुमतको सरकार नभई अन्य साना दलहरूको समर्थनमा संयुक्त सरकार बन्ने बताए ।

बागमतीमा सरकार बनाउन ५५ जना सांसदको समर्थन आवश्यक हुन्छ । विभाजनअघि एमालेसँग बागमती प्रदेशसभामा ५६ सांसद थिए । तर, केही सांसद एकीकृत समाजवादीमा लागेपछि एमालेसँग ४५ सांसद रहेको बताइएको छ ।

एकीकृत समाजवादीकी केन्द्रीय सदस्य तथा प्रदेश सांसद मुनु सिग्देलले आफूहरूसँग १२ जना सांसद रहेको बताइन् । उनले शाक्यले फकाउँदैमा कोही सांसद एमालेको सरकारमा नजाने स्पष्ट पारिन् ।

यस्तो छ एकीकृत समाजवादीको रणनीति

मुख्यमन्त्री शाक्यले आफ्ना सांसदलाई मन्त्री बन्न अफर गर्दै फकाउन थालेपछि एकीकृत समाजवादीमा तरंग उत्पन्न भएको छ । आफ्ना सांसद एमालेमा जान सक्ने भन्दै एकीकृत समाजवादीले मंगलबार नै बागमती प्रदेश निर्वाचन आयोगको कार्यालय हेटौँडामा उपस्थित हुने तयारी गरेको छ ।

शाक्यले आफ्ना सांसद फकाउनुअघि नै समाजवादी निर्वाचन आयोग पुगेर सांसदहरूको सनाखत गर्ने रणनीतिमा पुगेको हो । निर्वाचन कार्यालयमा उपस्थित हुन सांसदले हेटौँडा आउने क्रम जारी रहेको सांसद सिग्देलले जानकारी दिइन् ।

‘आफ्ना पार्टीका सांसदसहित केही समयभित्र प्रदेश निर्वाचन कार्यालय हेटौँडा पुगेर नेकपा एकीकृत समाजवादीको पक्षमा खुल्ने तयारीमा छौँ,’ उनले भनिन् ।

आज नेकपा एकीकृत समाजवादीतर्फ खुल्ने सांसदको पहिचान हुने सिग्देलले बताइनु ।

प्रकाशित मिति: मंगलबार, भदौ १५, २०७८ १४:००