पाँच देशका ६५ रोजगारदाता कम्पनी कालो सूचीमा, अधिकांश मलेसियाली (सूचीसहित)

A+ A A-

वैदेशिक रोजगार विभागले सम्झौताअनुसारको सेवा सुविधा, करारमा तोकिएको तलब उपलब्ध नगराउने विभिन्न देशका ६५ वटा रोजगारदाता कम्पनीलाई कालो सूचीमा राखेको छ ।

नेपालीका कामदार रोजगारीमा लिँदै आएका मलेसियाका ५२, संयुक्त अरब इमिरेट्सका तीन, साउदी अरेबियाका पाँच, कतारका चार र माल्दिभ्सको एक गरी ६५ वटा रोजगारदाता कम्पनीलाई कालो सूचीमा राखिएको विभागले जनाएको छ ।

विभागका अनुसार रोजगारदाता देशका फर्निचर, निर्माण, सप्लाईलगायतका कम्पनीलाई कालो सूचीमा राखिएको छ । विभागले कालो सूचीमा राखेका अधिकांश कम्पनी मलेसियाका छन् ।

विभागले कालो सूचीमा राखेका ६५ मध्ये ५२ वटा मलेसियाका रोजगारदाता कम्पनी छन् । यी कम्पनीले करिब २ हजार नेपाली कामदारलाई समस्यामा पारेको विभागले जानकारी गराएको छ ।

विभागले कालो सूचीमा राखेका रोजगारदाता कम्पनीमा कामदार पठाउन थाहा पाएको म्यानपावर कम्पनीलाई कारबाही गरिने विभागले जनाएको छ । कालो सूचीमा राखिएका कम्पनीलाई सफ्टवेयरले सपोर्ट नगर्ने भएकाले व्यवसायीले छलछाम गर्न सक्ने विभागको दाबी छ ।

कालो सूचीमा परेका रोजगारदाता कम्पनीमा कामदार पठाउन रोक लगाएको र कामदार पठाएको पत्ता लागे कडा कानुनी कारबाही हुने विभागका निर्देशक तथा सूचना अधिकारी महेन्द्रनाथ भट्टराईले बताए ।

काम दिन नसक्दा श्रमिक अलपत्र परेका, समयमै सेवा सुविधा नदिएको, कतिपय कम्पनी नै समस्याग्रस्त अवस्थामा रहेकाले ती कम्पनीलाई कालो सूचीमा राखी कामदार पठाउन रोक लगाइएको निर्देशक भट्टराईले बताए ।

‘रोजगारीमा कामदार पठाउन रोक लगाएसँगै अब कालो सूचीमा परेका कम्पनीबाट आएका मागपत्र सम्बन्धित देशका नियोगले प्रमाणीकरण समेत गर्न छाडेका छन् । कालो सूचीमा परेका कम्पनीबाट आएका मागपत्र विभागको अनलाइनमा प्रमाणीकरण हुँदैनन्,’ भट्टराईले भने, ‘अनलाइन प्रणाली लागू नहुँदा केही रोजगार व्यवसायी कम्पनीले झुक्याएर कालो सूचीमा परेका रोजगारदाता कम्पनीमा श्रमिक पठाउने गरे होलान् । तर, अनलाइन प्रणाली लागू भएपछि त्यो सम्भावना छैन ।’

कामदार आपूर्ति गराउने समयमा एक किसिमको सम्झौता गर्ने र काममा पुगेपछि अर्कै काम तथा सेवा सुविधा दिने कम्पनी प्राय: कालो सूचीमा परेको उनको भनाइ छ । कतिपय म्यानपावर कम्पनीले कामदार झुक्याएर नराम्रा रोजगारदाता कम्पनीमा पठाएर फसाउने गरेको उजुरी लिएर पीडित विभागमा धाउने गरेका छन् ।

पछिल्लो समय वैदेशिक रोजगारीमा मलेसिया र साउदी पुगेका युवा समस्यामा पर्ने क्रम बढ्दै गएको छ । नेपालमा सम्झौता भएअनुसार काम र सेवा–सुविधा नपाएपछि रोजगारीमा गएका नेपाली युवा भागेर काम गर्न बाध्य हुने नेपाली पनि धेरै छन् ।

रोजगारीका लागि विदेश पुगेका कामदारलाई रोजगारदाता कम्पनीले नै समस्यामा पार्ने गरेको उजुरी पीडितले गर्दै आएका छन् । विभागमा रोजगारीका नाममा म्यानपावर र उनीहरूका प्रतिनिधि एजेन्टबाट ठगिएका ५० जनाभन्दा बढी पीडित दैनिक धाउने गरेका छन् ।

नेपालमा सम्झौता भएअनुसार काम र सेवा–सुविधा नपाएपछि धेरै नेपाली कामदार भागेर अरु नै कम्पनीमा काम गर्न बाध्य छन् । पछिल्लो समय वैदेशिक रोजगारीमा मलेसिया र साउदी पुगेका युवा समस्यामा पर्ने क्रम बढ्दै गएको छ ।

विभागले सम्बन्धित देशका नियोग र विभागमा पीडित कामदारले गरेको उजुरीका आधारमा रोजगारदाता कम्पनीलाई कालो सूचीमा राख्ने गरेको छ । विभागले धेरै नेपाली कामदारलाई समस्यामा पर्ने रोजगारदाता कम्पनीको विवरण पनि संकलन गरिरहेको छ ।

विभागले कालो सूचीमा राखेका रोजगारदाता कम्पनीहरू :

प्रकाशित मिति: मंगलबार, भदौ १५, २०७८ १८:११