लाइसेन्स परीक्षा नहुँदा अस्ट्रेलियामा नेपाली नर्स समस्यामा

A+ A A-

नेपालबाट अस्ट्रेलिया गएका नर्सहरू समस्यामा परेका छन् । अस्ट्रेलियाको नर्सिङ काउन्सिल (आप्रा) ले परीक्षा प्रणाली परिवर्तन गरेका कारण उनीहरू समस्यामा परेका हुन् ।

यसअघि नेपालमा बीएससी अध्ययन गरेकालाई तीन महिनाको ब्रिजिङ कोर्स गराएर नर्सिङ काउन्सिलले लाइसेन्स दिने गरेको थियो । यस्तै बीएन गरेकालाई मास्टर्स सकेपछि ब्रिजिङ गराएर नर्सिङ काउन्सिलले लाइसेन्स दिने गरेकोमा त्यसलाई परिमार्जन गर्दा नेपाली विद्यार्थीलाई असहज भएको हो ।

सो लाइसेन्स लिएपछि मात्र ती विद्यार्थीले अस्ट्रेलियामा नर्सिङको काम गर्न पाउँछन् ।

अस्ट्रेलियाले नयाँ परीक्षा प्रणाली सुरु गर्दै अमेरिका, क्यानडा र बेलायतको जस्तै लिखितमा नेसनल काउन्सिल लाइसेन्सर एक्जामिनेसन (एनक्लेक्स) र प्रयोगात्मक परीक्षा (अस्की) लाई अबलम्बन गरेको हो ।

सो प्रक्रिया अनुसार अन्य देशमा पढेका नर्सहरुले अस्ट्रेलियामा सैद्धान्तिक र व्यवहारिक ज्ञान भएको प्रमाणित गरेर मात्र दर्ता लिन सक्छन् । जसका लागि सबैभन्दा पहिला ‘नेसनल काउन्सिल लाइसेन्सर एक्जामिनेसन (एनक्लेक्स)' र ‘ओएससीई' परीक्षा दिनुपर्ने हुन्छ ।

नयाँ परीक्षा विधिले अप्ठ्यारामा परेका विद्यार्थीहरू परीक्षाको कोटाका कारण थप समस्यामा परेका हुन् । नयाँ मोडलको परीक्षा दिन तयार भएका नेपाललगायतका विदेशी नर्सहरू पर्याप्त कोटा नहुँदा परीक्षामा सहभागी हुन पाएका छैनन् । कोरोना महामारीको कारण देखाउँदै आप्राले ओएससीई परीक्षा राम्रोसँग संचालन गरेको छैन ।

सो परीक्षा दक्षिण अस्ट्रेलियाको एडिलेडमा मात्र भैरहेको छ । एकपटकमा ४० जनाले मात्र सहभागी हुन पाउने भएकाले यसअघि नै समय लिएकाहरूले अझै वर्ष दिनसम्म कुर्नुपर्ने अवस्था आएको छ ।

परीक्षा दिन नपाएका कारण करिब हजार भन्दा बढी नर्सले काम गर्न नपाइ अलपत्र परेका छन् । अस्ट्रेलियामा समय धेरै लाग्ने भएकाले कतिपय नर्सहरू क्यानडा र अमेरिकाजस्ता मुलुक तर्फ जान सुरु गरिसकेका छन्।

आफूहरूलाई अप्ठ्यारो परेकाले यतिबेला अस्ट्रेलियामा रहेका नर्सहरूले पेटिसन (डिजिटल हस्ताक्षर) संकलन गरेर सम्बन्धित निकायसम्म पुर्‍याउने अभियान सुरु गरेका छन् । भिसा अवधि निश्चित समयको लागि हुने, र लाइसेन्स लिन ढिलो हुँदा उनीहरू समस्यामा रहेको बताउँछिन्, मनिता ओली । अहिले सुरु गरिएको पेटिसनमार्फत यही कुरा उठाइएको उनले बताइन् ।

यतिबेला अस्ट्रेलियामा कोभिडको कारण नर्सहरुको अभाव भएको समाचार पनि सार्वजनिक भइरहेका छन् । आफूहरूले काम गर्न नपाउने तर नर्स अभाव भएको अवस्था रहेकाले पनि आफूहरूलाई काम गर्न अनुमति दिन माग गर्दै करिब २५ सय अन्तर्राष्ट्रिय नर्सहरूको हस्ताक्षर सरकारलाई बुझाउने तयारी रहेको उनले बताइन् ।

अस्ट्रेलियामा पेटिसनलाई आधिकारिक पत्र मानिने भएकोले आप्राको ध्यान खिच्न नर्सहरुले हस्ताक्षर संकलन गरिरहेका छन् । नेपाली नर्सहरूको नेतृत्वमा पनि चेन्ज डट अर्ग वेबसाइटमा हस्ताक्षर संकलन सुरु भएको हो । कबिता कार्कीले सुरु गरेको पेटिसनमा हालसम्म २६ सयले हस्ताक्षर गरिसकेका छन् ।

मनिताको अनुसार हस्ताक्षर संकलन मार्फत यो समूहले लाइसेन्स परीक्षा नियमित गर्नुपर्ने माग राखेका छन् । यदि नसके पहिलाको जस्तै ‘आइरन कोर्स' गर्ने व्यवस्था गरिदिनुपर्ने उनीहरूको माग छ ।

‘भिसा सकिन लाग्दा समेत लाइसेन्स लिने प्रक्रिया अघि बढिरहेको छैन । यसले गर्दा यहाँ बस्नका लागि फेरि नर्सिङ विषय नै पढ्नुपर्ने अवस्था आएको छ । नेपालमै लाखौं खर्च गरेर पढियो, अस्ट्रेलियामा पनि फेरि सोही विषय र लेभलमा पढ्नु पर्दा खर्च कसरी जुटाउने ?,' उनले प्रश्न गरिन् ।

प्रकाशित मिति: सोमबार, भदौ १४, २०७८ २०:०३