दार्चुलामा बाढी : तीन जनाको मृत्यु, दुई जना बेपत्ता, पाँच वटा पुल बगायो

A+ A A-

दार्चुलामा बाढी र पहिरोका कारण तीन जनाको मृत्यु भएको छ भने दुई जना बेपत्ता भएका छन् । आइतबार राति आएको बाढी पहिरोमा परी दुहुँ गाउँपालिका र महाकाली नगरपालिकाका विभिन्न क्षेत्रमा भौतिक तथा मानवीय क्षति भएको प्रहरीले जनाएको छ ।

पहिरोले घर पुरिँदा दुहु गाउँपालिका– १ ब्यास गाउँका नरसिंह महर र उनकी श्रीमती कौशा महरको मृत्यु भएको दार्चुलाका प्रहरी प्रमुख मनोहर भट्टले बताए ।

यस्तै दुहु गाउँपालिकाको वडा नम्बर ५ दुल्लामा बाढीले बगाउँदा मनुवा डडालको पनि मृत्यु भएको छ । कालागाड खोलामा बेलुकी १० बजेदेखि आएको बाढीले डडाललाई घरैसहित बगाएको प्रहरीले जनाएको छ ।

वडा नम्बर ३ निजाङगाडमा बाढीले दुई जना बेपत्ता छन् । निजाङगाड खोलाको बाढीले बगाउँदा स्थानीय शेरसिंह कार्की र हर्कसिंह कार्की बेपत्ता छन् । यो क्षेत्रमा पाँचवटा पसल, दुईवटा लघु जलविद्युत् आयोजना, चारवटा झोलुंगे पुल र एउटा पक्की पुल बगाएको दार्चुलाका प्रमुख जिल्ला अधिकारी सिद्धराज जोशीले बताए ।

दुहु ३ को श्रीवगडमा निजाङगाडकाे बाढीले पूर्णबहादुर बम, नरेन्द्रबहादुर बम, दीपक बम, रणबहादुर बम, धिरेन्द्र बम, शेरबहादुर बमको घर बगाएको छ ।

यस्तै महाकाली नगरपालिका- १ को श्रीबगडमा देवबहादुर बम, अमरबहादुर बम, सुन्दर बहादुर बम र जितबहादुर बमको होटल तथा पसल बगाएको छ ।

अहिले बाढी प्रभावित क्षेत्रमा नेपाल प्रहरी, सशस्त्र प्रहरी, नेपाली सेना, रेडक्रस र स्थानीयहरू पुगेका छन् । बाटो घाटो नहुँदा उद्दार कार्यमा ढिलाइ भइरहेको प्रमुख जिल्ला अधिकारी जोशीले बताए ।

उद्धार र पुनःस्थापनामा खट्न मन्त्री जोशीको निर्देशन

अविरल वर्षापछि आएको बाढी र पहिरोले समस्यामा परेका नागरिकहरूको उद्धारमा सहयोग गर्न सुदूरपश्चिमका आन्तरिक मामिला तथा कानुनमन्त्री पूर्णा जोशीले स्थानीय प्रशासनलाई निर्देशन दिएकी छन् ।

आइतबार राति जिल्लाका विभिन्न स्थानमा वर्षाका कारण बाढी र पहिरोले धनजनको क्षति भएपछि मन्त्री जोशीले उद्धारका लागि निर्देशन दिएकी हुन् ।

प्रकाशित मिति: सोमबार, भदौ १४, २०७८ ११:४७