काबुल विमानस्थलनजिकैको त्यो दृश्य, प्रत्यक्षदर्शी नेपाली भन्छन्, 'बाँचिन्छजस्तो लागेको थिएन'

काबुल विमानस्थलनजिकैको त्यो दृश्य, प्रत्यक्षदर्शी नेपाली भन्छन्, 'बाँचिन्छजस्तो लागेको थिएन'

A+ A A-

बिहीबार राति अफगानिस्तानको काबुल विमानस्थलबाहिर बम विस्फोट भयो । बम विस्फोटमा परी ८५ जनाभन्दा बढी हताहत भएको खबर बाहिरियो । सो घटनाले विश्व जगत्‌को ध्यान खिच्यो ।

सो घटनाको प्रत्यक्षदर्शी बने स्वदेश फर्किने तयारीमा रहेका ४२ जना नेपालीहरू । उनीहरू विमानस्थलनजिकैको एउटा उद्धार सेल्टरमा बसिरहेका थिए । परराष्ट्र मन्त्रालयका अनुसार उनीहरूलाई अफगानिस्तानका विभिन्न स्थानबाट एकीकृत गरी उद्धारका लागि त्यहाँ राखिएको हो । तर, काबुल विमानस्थलनजिकै भएको विस्फोटनपछि उनीहरू त्रासमा छन् ।

सोही सेल्टरमा बसेका धादिङका निराजन क्षत्री बम विस्फोट हुँदा आफूलाई बाँचिन्छ जस्तो नलागेको बताउँछन् । अफगानिस्तानमा रहेको क्यानडा नियोगमा कार्यरत उनी भन्छन्, 'हामी सबै जना नेपाली फर्किन पाउने खुसीमा होटलमा बसिरहेका थियौँ । बिहीबार राति काबुल विमानस्थलनजिकै ठूलो बम विस्फोट भएको आवाज आयो र झ्यालबाट हेर्‍यौँ । यहाँको दृश्यले त बाँचिन्छजस्तो नै लागेन ।'

क्षत्रीले थपे, 'सबै जना सुत्ने तयारीमा र कतिपय त सुतिसकेका पनि थिए । हामी बसेकाे सेल्टरनजिकै बम विस्फोटनको भयानक आवाज सुनियो । त्रासले गर्दा हामी सबै जनालाई रातभर निद्रा नै लागेन । रातभरि झ्यालबाट काबुल विमानस्थलको दृश्य चियाएर बस्यौँ । कति बेला बमको बाछिटाले होटल नै उडाउने हो भन्ने त्रासमा थिए सबै जना । यस्तो डर त आजसम्म कहिल्यै लागेको थिएन ।’

उनले भने, ‘दुई वर्ष अफगानिस्तानमा रोजगारी गर्दा यस्तो डर लागेको थिएन । तर, बिहीबार राति भएको बम विस्फोटले सात्तो लियो । चाँडै घर फर्किन पाए हुन्थ्यो ।’ क्षत्रीका अनुसार काबुल विमानस्थल आसपास मानिसको ठूलो भिड भएकाले त्यहाँ बम विस्फोट गराएको हुन सक्छ ।

त्यस्तै, कैलालीका विकास सापकोटा पनि सोही सेल्टरमा उद्धारको आशामा बसिरहेका छन् । उनी पनि कति बेला बम विस्फोट हुन्छ र मरिन्छ भन्ने त्रासमा छन् ।

सापकोटाले भने, 'बिहीबार राति काबुल विमानस्थलनजिकै भएको विस्फोटनको आवाज सुन्दा त बाँचेर नेपाल पुगिन्छजस्तो नै लागेन । काबुलमा रहेका विदेशी र काबुलवासी १५ दिनयता राम्ररी सुतेका छैनन् । कति–बेला कहाँ विस्फोट हुन्छ भन्ने त्रासमा छौँ ।'

उनका अनुसार काबुल विमानस्थलनजिक दुई दिनयता बम विस्फोट हुने संकेत विद्रोहीले गरेका थिए । काबुलमा एक सातायता नेटवर्क र विद्युत् अवरोध हुँदै आएको छ । त्यही भएर कति बेला यहाँ ठूलो आक्रमण हुन्छ भन्ने भय थियो ।

सापकोटाले भने, ‘अहिले अफगानिस्तानमा कति बेला के हुन्छ भन्ने नै थाहा हुन्न । काबुलआसपासका मान्छे भाग्ने तयारीमा छन् । काबुल विमानस्थलनजिकै अरु पनि बम विस्फोट हुने हल्ला छ ।’

बिहीबार राति भएको विस्फोटनपछि अफगानिस्तान छाड्न खोज्ने मानिसको भिड काबुल विमानस्थलमा बढिरहेको सेल्टरबाट देखिएको सापकोटाको भनाइ छ । काबुल विमानस्थलनजिक मानिसको भिड छ । कति बेला भोकमरी, कोरोना महामारी र हैजा फैलिन्छ भन्ने टुंगो नभएको उनले बताए ।

सापकोटाले भने, 'काबुलमा के भइरहेको छ, बाहिर थाहा हुँदैन । मानिसहरू रातभरि रोएको, भागदौड गरेको र चिच्याएको आवाज सुनिन्छ ।'

काबुलमा भएको सो विस्फोटनमा परी मृत्यु हुनेको संख्या ९० पुगेको छ । उक्त घटनामा परी १ सय ५० जनाभन्दा बढी घाइते भएका छन् भने अफगानिस्तानमा रहेका सबै नेपालीहरू सकुशल रहेको भारतस्थित नेपाली दूतावासले जनाएको छ ।

त्यस्तै, परराष्ट्र मन्त्रालयले अफगानिस्तानबाट थप ११ जना नेपालीलाई उद्धार गरी नयाँ दिल्ली ल्याइएको जनाएको छ । हालसम्म ७ सय ८१ जना नेपालीको उद्धार गरिएको तथा अफगानिस्तानमा अवैध रूपमा गएका ३ सय ५० जना नेपाली रहेको मन्त्रालयले जनाएको छ ।

मन्त्रालयका अनुसार अफगानिस्तानबाट उद्धार गरी दोहा, दुबई, लण्डन र नयाँ दिल्लीमा रहेका नेपालीहरूलाई काठमाडौंसम्म ल्याउन निरन्तर समन्वय र सहजीकरण भइरहेको छ ।

काबुलमा नागरिक उड्डयन सेवा हालसम्म पनि खुलिसकेको छैन, जसका कारण सिधा उडानमार्फत उद्धार गर्न समस्या भइरहेको परराष्ट्र मन्त्रालयकाे भनाइ छ ।

प्रकाशित मिति: शुक्रबार, भदौ ११, २०७८ १९:४९