वैदेशिक रोजगार क्षेत्रका महत्वपूर्ण निकाय नै नेतृत्वविहीन : न मन्त्रालयमा मन्त्री, न विभागमा महानिर्देशक

वैदेशिक रोजगार क्षेत्रका महत्वपूर्ण निकाय नै नेतृत्वविहीन : न मन्त्रालयमा मन्त्री, न विभागमा महानिर्देशक

A+ A A-

श्रम, रोजगार तथा सामाजिक सुरक्षा मन्त्रालयमा अझै पनि मन्त्री नियुक्त हुन सकेको छैन । वैदेशिक रोजगार विभागमा पनि महानिर्देशक छैनन् । जसका कारण वैदेशिक रोजगारीको क्षेत्रमा समस्या सिर्जना हुन थालेको छ । ४ महिनायता मन्त्री नहुँदा मन्त्रालय अन्तर्गतका योजना र कार्यक्रम प्रभावित बनेको छ ।

प्रधानमन्त्री शेरबहादुर देउवाले मन्त्रीमण्डल विस्तार गर्न नसक्दा श्रम मन्त्रालय मन्त्रीविहीन भएको हो । श्रम मन्त्रालयको जिम्मेवारी प्रधानमन्त्री आफैँले सम्हाल्दै आए पनि धेरै काम ठप्प भएको मन्त्रालयका कर्मचारीहरू बताउँछन् ।

विभाग पनि गत सातादेखि नेतृत्वविहीन छ । महानिर्देशक कृष्ण प्रसाद दवाडीले उमेरहदका कारण भदौ ६ (बुधबारदेखि) अवकास पाएका छन् । मन्त्री नभएकाले महानिर्देशक ल्याउन समस्या भइरहेको मन्त्रालयका उच्च अधिकारीहरू बताउँछन् ।

तर, महानिर्देशक पठाउने तयारी भइरहेको श्रम मन्त्रालयका सचिव सूर्यप्रसाद गौतमको भनाइ छ । यद्यपी कसलाई महानिर्देशक बनाउने भन्ने विषय टुंगिइ नसकेको गौतमले बताए ।

विभागमा महानिर्देशक नहुँदा अनुगमनलगायतका काम प्रभावित बनेको र त्यसले विकृति बढेको पीडितहरूले बताउन थालेका छन् । वैदेशिक रोजगारीमा पठाउँदा म्यानपावर कम्पनीहरूले सरकारले तोकेभन्दा बढी रकम लिए पनि उनीहरूमाथि कारबाही हुन नसकेको पीडित बताउँछन् ।

तालुकदार मन्त्रालय र विभाग नेतृत्वविहीन हुँदा अनुगमन तथा कारबाही प्रक्रिया अघि बढाउन समस्या भइरहेको विभागका एक कर्मचारीले बताए ।

‘म्यानपावर कम्पनी र अवैध एजेन्टले विदेश जाने युवाहरूसँग मनपरी रकम लिने गरेको गुनासो विभागमा दैनिक आउँछ । कोरोनाको कारणभन्दा पनि श्रममन्त्री र महानिर्देशक नभएकाले अनुगमन गर्न समस्या भइरहेको छ,’ ती कर्मचारीले भने । तोकेभन्दा बढी पैसा लिएको उजुरी विभागमा आए पनि अनुगमन र कारबाही गर्ने अवस्था नभएको उनले बताए ।

कोरोनाका कारण अहिले कतार, साउदी, ओमानलगायत केही देशले मात्र नेपाली श्रमिक लिएका छन् । मलेसिया, कुवेत, यूएईलगायत देशले श्रमिक लिएका छैनन् ।

म्यानपावर कम्पनीले सरकारले तोकेभन्दा धेरै रकम उठाएको भन्दै साउनमा मात्र ७० भन्दा धेरै उजुरी परेको विभागको उजुरी शाखाले जानकारी दिएको छ । प्रभावकारी अनुगमन नहुँदा यो क्षेत्रमा विकृति बढेको सरोकारबालाहरू बताउँछन् ।

म्यानपावर कम्पनीले विदेश जाने कामदारसँग मनपरी पैसा लिइरहेका उजुरी आएको विभागका निर्देशक महेन्द्रनाथ भट्टराई स्वीकार गर्छन् । वैदेशिक रोजगार ऐनअनुसार उजुरीमाथि कारबाही हुँदै आएको उनको भनाइ छ । उजुरी परेका म्यानपावरमाथि विभागले कारबाही गरिरहेको उनले बताए ।

प्रकाशित मिति: शुक्रबार, भदौ ११, २०७८ ०८:१३