यस्तो छ विभाजनपछि कर्णालीमा माधव नेपालको पार्टीको अवस्था

A+ A A-

कर्णालीमा बलियो रहेको नेकपा एमालेको माधव नेपाल समूह नयाँ दल दर्ता गरेसँगै कमजोर देखिएको छ ।

यसअघि नवौं महाधिवेशनमा नेपालको पक्षमा कर्णालीका १० जिल्लामध्ये ७ जिल्लाको अध्यक्ष माधव नेपालसँगै थिए । तर नेकपा एकीकृत समाजवादी गठन गरेसँगै तीन जिल्लाका अध्यक्षमा मात्र नयाँ दलमा जोडिएका छन् ।

मुगुका अध्यक्ष धर्मबहादुर शाही, रुकुम पश्चिमका अध्यक्ष विमल पुन र जुम्लाका अध्यक्ष तीर्थ बुढा नेपालसँगै नयाँ पार्टीमा खुलेका हुन् । नेपाल पक्षका डोल्पाका अध्यक्ष दत्त रोकायको भने मृत्यु भैसकेको छ ।

विगतमा नेपाल पक्षमा खुलेका सुर्खेतका अध्यक्ष ध्रुवकुमार शाही, जाजरकोटका अध्यक्ष करबीर शाही हुम्लाका अध्यक्ष दल रावल लगायतका नेताहरू भने एमालेमै बसेका छन् ।

प्रतिनिधिसभा सांसदमध्ये डोल्पाका धनबहादुर बुढा, मुगुका गोपाल बम, दैलेखका पार्वती बिसुंखे साथ माधव नेपालको नयाँ दलले पाएको छ ।

तर यसअघि नेपालनिकट मानिएका सुर्खेतका सांसद ध्रुबबहादुर शाहीले पनि नयाँ पार्टी खोल्ने निर्णयलाई साथ दिएनन् । प्रदेशसभाका सांसदमध्ये मुगुका चन्द्रबहादुर शाही माधव नेपालसँगै रहेपनि नयाँ पार्टी सनाखत गर्ने बेला उनी उपस्थित भएनन् । प्रदेशसभामा रुकुमपश्चिमकी देवी ओली मात्र नयाँ पार्टीमा लागेकी छन् ।

स्थानीय तहका कस्तो छ प्रभाव

एमाले पार्टी विभाजनको असर स्थानीय तहमा परेको छ । स्थानीय तहका जनप्रतिनिधिमध्ये कर्णालीमा एमालेबाट निर्वाचित स्थानीय तहका ५९ (प्रमुख २७ र उपप्रमुख ३२) जनप्रतिनिधिमध्ये नेपाल समूहमा ३० र ओली समूहमा २९ जना थिए । पार्टी विभाजनपछि भने नेपाल समूहका जनप्रतिनिधिले भने आफ्नो कित्ता स्पष्ट पारिसकेका छैनन् ।

दैलेखका दुई गाउँपालिका अध्यक्ष नेपालतर्फ

दैलेखका दुई गाउँपालिका अध्यक्ष नेकपा एकीकृत समाजवादीमा खुलिसकेका छन् । दैलेख भगवतीमाई गाउँपालिकाका अध्यक्ष दानबहादुर थापा, महावु गाउँपालिकाका अध्यक्ष जंगबहादुर शाही नयाँ पार्टीको पक्षमा देखिएका हुन् ।

त्यस्तै, महाबु गाउँपालिका उपाध्यक्ष प्रेमकुमारी बुढा, नारायण नगरपालिकाका उपप्रमुख सावित्री मल्ल, चामुण्डा विन्द्रासैनी नगरपालिकाका उपप्रमुख ताराकुमारी शाही र ठाँटीकाँध गाउँपालिकाका उपाध्यक्ष सुस्मिता सिंह पनि नयाँ पार्टीमै लागेका छन् ।

कालिकोटमा नेपाल समूह बलियो

कालिकोटको नौ स्थानीय तहमध्ये एमाले पार्टीले २०७४ सालको निर्वाचनमा तीनमा जित हासिल गरेको थियो ।खाँडाचक्र नगरपालिका, शुभकालिका गाउँपालिका र नरहरिनाथ गाउँपालिकामा एमालेले चुनाव जितेको थियो ।

एमाले विभाजित बनेपछि कालिकोटका स्थानीय जनप्रतिनिधिहरु पनि विभाजित बनेका छन् ।

नरहरिनाथ गाउँपालिकाका अध्यक्ष धीरबहादुर बिष्ट र शुभकालिका गाउँपालिकाका अध्यक्ष खडानन्द चौलागाई नयाँ दलमा लागेका छन् । खाँडाचक्र नगरपालिकाकी उपप्रमुख विजया बिष्ट र शुभकालिका गाउँपालिकाकी उपाध्यक्ष पम्फा शाही पनि नयाँ पार्टीमा सामेल छन् ।

कालिकोटका ८२ वटा वडामध्ये एमालेका २४ जना वडा अध्यक्ष जितेको थियो । त्यसमध्ये १६ जना वडा अध्यक्ष नयाँ पार्टीमा खुलेको नेकपा नवगठित नेकपा एकिकृत समाजवादीका जिल्ला अध्यक्ष विश्वराज बमले बताए ।
६८ जना सदस्यीय जिल्ला कमिटी रहेको साविकको एमालेबाट ४५ जनाभन्दा धेरै नयाँ पार्टीमा लागेको बमले जानकारी दिए ।

सुर्खेतमा नेपाल पक्ष कमजोर

माधव नेपाललाई साथ दिएका जिल्ला अध्यक्ष ध्रुवबहादुर शाहीसहितका तीन तिहाईभन्दा बढी एमालेमै रहेपछि सुर्खेतमा नेपाल पक्ष कमजोर देखिएको छ । एमालेका तत्कालिन जिल्ला सचिव मोहन बडुवाल मात्र नयाँ पार्टीमा खुलेका छन् ।

६३ सदस्यीय नेकपा एमाले जिल्ला कमिटीमा सदस्य हर्क रानाको मृत्यु भैसकेको छ । बाँकी ६२ जनामा नौ जना मात्रै नयाँ दलमा सहभागी भएका छन् । पार्टी पदाधिकारीमा सचिव मोहन बडुवाल र उपसचिव टोपबहादुर रास्कोटी नयाँ दलमा खुलेका हुन् ।

सुर्खेतमा नौ वटा स्थानीय तह र ९९ वडा छन् । एमाले एक्लैले तीन स्थानीय तहसहित निर्वाचनमा ४३ वटा वडामा जितेको थियो । एमाले विभाजन हुँदा केही वडाअध्यक्ष र सदस्य मात्रै नयाँ पार्टीमा लागेका छन् । एमालेले जितेको सुर्खेतको सिम्ता, चौकुने गाउँपालिका र लेकबेशी नगरपालिका हो । सिम्ताका अध्यक्ष कविन्द्रकुमार केसी, उपाध्यक्ष चन्द्रकला शाही, लेकवेशीका नगरप्रमुख गगनसिंह सुनार, उपप्रमुख शान्ति छन्तेल, चौकुनेका अध्यक्ष धीरबहादुर शाही र उपाध्यक्ष निर्मला राना भने एमालेमै रहेको प्रष्ट पारिसकेका छन् ।

वीरेन्द्रनगर नगरपालिकाकी उपमेयर मोहनमाया ढकाल एमालेमै छन् । उनी नेकपा विभाजनको बेला समेत केपी ओली पक्षमा थिइन् । वीरेन्द्रनगर नगरपालिकाका तीन वडाअध्यक्ष माधव नेपालको नयाँ दलमा प्रवेश गरेका छन् । १६ वडा रहेको वीरेन्द्रनगरमा नौ वडामा एमालेले विजय प्राप्त गरेको थियो । ती मध्ये वडा नं. १० का अध्यक्ष रत्नबहादुर बुढा, वडा नं. १२ अध्यक्ष लोकप्रसाद चालिसे र वडा नं. ८ का अध्यक्ष थम्मप्रसाद गौतम नयाँ पार्टीमा लागेका हुन् ।

चौकुने गाउँपालिका वडा नं. १ का लक्ष्मण आले, पञ्चपुरी नगरपालिकाका वडा नं. ५ का वडा अध्यक्ष रतनबहादुर बीसी नयाँ पार्टीमा लागेका छन् ।

कर्णालीका अन्य जिल्लामा स्थानीय तहमा एमालेबाट जितेका जनप्रतिनिधिहरु अहिलेसम्म कुनै कित्तामा खुलेका छैनन् । स्थानीय तहका जनप्रतिनीधिहरुलाई २१ दिन भित्र दल रोज्ने अधिकार दिएको हुँदा त्यो बेलासम्म एउटा पार्टी रोजिसक्ने नवगठित नेकपा एकीकृत समाजवादीका एक नेताले बताए ।

प्रकाशित मिति: बिहीबार, भदौ १०, २०७८ १७:१४