लुम्बिनीमा नौ महिनादेखि थन्किए विद्युतीय बस र ट्याक्सी, सञ्चालनबारे अन्योल कायमै

लुम्बिनीमा नौ महिनादेखि थन्किए विद्युतीय बस र ट्याक्सी, सञ्चालनबारे अन्योल कायमै

A+ A A-

गौतमबुद्ध जन्मस्थल लुम्बिनीमा नौ महिनाअघि ल्याइएका वातावरणमैत्री विद्युतीय बस र ट्याक्सी सञ्चालन हुन सकेका छैनन् ।

गत मंसिरमा चीनबाट ल्याइएका विद्युतीय बस र ट्याक्सी लुम्बिनी विकास कोष नजिकै चार्जिङ स्टेशनमा विगत नौ महिना देखि थन्किएका हुन् । विश्व सम्पदास्थल लुम्बिनीमा वातावरण प्रदुषण कम गर्न भन्दै ल्याइएका बस र ट्याक्सी लामो समयसम्म सञ्चालनमा आउन नसक्दा महँगो मूल्यका यी सवारीसाधन बिग्रने जोखिम बढेको छ ।

अहिले ५ बस र १४ ट्याक्सी पार्किङ स्थलमा छन् । एडीबीको अनुदान सहयोगमा क्लिन इनर्जी प्रोजेक्ट मार्फत आएका यी सवारी साधन एडीबीले पर्यटन मन्त्रालयलाई र पर्यटन मन्त्रालयले कोषलाई हस्तान्तरण गरेपछि मात्र स‌चालन हुनसक्छ ।

तर, अहिलेसम्म पनि कोषलाई बस र ट्याक्सी हस्तान्तरण भइसकेको छैन । भैरहवा विमानस्थलबाट लुम्बिनीको रुटमा चलाउने योजना बनाइएको भएपनि अहिलेसम्म यी सवारीको सञ्चालन मोडालिटी तयार भइसकेको छैन ।

लुम्बिनी विकास कोषका सदस्यसचिव सानुराजा शाक्यले यी सवारीसाध हस्तान्तरण भइनसकेको र भैरहवामा निर्माणधीन विमानस्थल पनि सम्पन्न नभइसकेकाले अझै केही समय सञ्चालननहुने जानकारी दिए ।

यी सवारीसाधन लुम्बिनीमा मात्र नभई बुद्ध सर्किटमा चलाउन सक्ने गरी प्रारम्भिक छलफल भइरहेपनि अझै टुंगो नलागेको लुम्बिनी विकास कोषले जनाएको छ ।

कोष आफैंले विद्युतीय सवारीसाधन सञ्चालनगर्ने वा टेन्डर आह्वान गरी अरुलाई चलाउन दिने भन्ने विषयमा टुंगो नलागेको सदस्यसचिव शाक्यले बताए । एसियाली विकास बैंक (एडीबी) को अनुदानमा १३ करोड लागतमा भित्रिएका बस र ट्याक्सीमा नेपाल सरकारले तीन करोड ५० लाख रुपैयाँ भन्सार शुल्क व्यहोरेको छ ।

एउटा बस दुई देखि तीन करोड र एउटा ट्याक्सी ५० लाख मूल्य बराबरका हुन् । अन्तर्राष्ट्रिय स्टान्डर्डका यी बसमा कार्ड भुक्तानी गर्ने अटोमेटिक सिस्टम जडित रहेको कोषले जनाएको छ । बस १९ सिटे हो भने ट्याक्सी पाँच सिटे हो ।

बातानुकुलित र अपाङमैत्री समेत रहेको बसको ढोका स्वचालित हो । एक पटक फुल चार्ज गरे चार सय किमिसम्म गुड्ने क्षमता बसको छ ।

बसलाई चार्ज गर्न चार्जिङ स्टेसन समेत बनाइएको छ । पावर हाउसबाट १ सय ५४ किलोवाट विद्यत उत्पादन हुने र त्यहाँ ३३ वटा गाडी चार्जर स्ट्यान्ड राखिएको छ ।