सिर्जना सुनार मृत्यु प्रकरण: श्रीमानको यातना सहन नसकेर आत्महत्या गरेको पुष्टि

सिर्जना सुनार मृत्यु प्रकरण: श्रीमानको यातना सहन नसकेर आत्महत्या गरेको पुष्टि

A+ A A-

अन्तरजातीय विवाहलाई स्वीकार नगरेपछि रूपन्देहीमा एक युवतीले आत्महत्या गरेकी छन् । बुटवल-६ स्ठित सौभाग्यनगरमा सिर्जना सुनारले आत्महत्या गरेकी हुन् । घटनास्थलमा भेटिएको 'सुसाइड नोट' मा श्रीमानले दिएको शारीरिक र मानसिक यातना सहन नसकेर आफूले आत्महत्या गरेको उल्लेख छ ।

कसरी भयो घटना ?

घटना गत २१ साउनको हो । बुटवल-६ पुरानो बसपार्क सौभाग्यनगरमा सिर्जना सुनारले झुण्डिएर आत्महत्या गरेकी हुन् । घटनास्थल पुगेको इलाका प्रहरी कार्यालय बुटवलको टोलीले सिर्जनाले लेखेको ‘सुसाइड नोट’ भेटेको थियो । उक्त ‘सुसाइड नोट’ मा अर्घाखाँची शितगंगा-२ जिमाने टोलका २३ वर्षीय सुमन क्षेत्रीले आफूसँग बिहे गरे पनि अलग हुन शारीरिक र मानसिक यातना दिएको उल्लेख छ । त्यसपछि प्रहरीले यो घटनालाई चासोका साथ लिएर अनुसन्धान सुरु गरेको थियो ।

मृतक सिर्जना सुनार ।

सुसाइड नोटमा श्रीमान क्षेत्रीले कुटपिट गर्ने गरेको, मानसिक र शारीरिक यातना दिएको उल्लेख रहेको इलाका प्रहरी कार्यालय बुटवलका प्रहरी नायब उपरीक्षक मदन कुँवरले जानकारी दिए ।

अन्तरजातीय विवाह भएको र केटाले घरसमेत नलगेर अलग हुन खोजेको हालसम्मको अनुसन्धानबाट देखिएको प्रहरीले जनाएको छ । प्रहरीले क्षेत्रीलाई पक्राउ गरी जातीय विभेद र आत्महत्या दुरुत्साहनको मुद्दा चलाइसकेको छ ।

प्रेम सम्बन्ध र विवाह

अर्घाखाँची शितगंगा-२ जिमाने टोलका २३ वर्षीय क्षेत्री नेपाल आर्मीका जागिरे हुन् । स्कुल पढ्दा गाउँकै २१ वर्षीया सिर्जनासँग प्रेम सुरु भयो । सिर्जना कक्षा १२ उत्तीर्ण गरेपछि जापान जाने भन्दै भाषा पढ्न बुटवलमा आइन् । बुटवल आएपछि सुमन र सिर्जनाबीचको प्रेम सम्बन्ध थप प्रगाढ बन्यो ।

दुई वर्षसम्म प्रेम सम्बन्ध राम्रै चल्यो । प्रेममै रहेका बेला सिर्जना गर्भवती भइन् । बिहे नहुँदै गर्भवती भएपछि सुमनलाई विवाहका लागि अनुरोध गरिन् । तर, सुमन नेपाली सेनामा कार्यरत भएकाले बिदा नमिल्ने भन्दै विवाह गर्न आलटाल गरे ।

सिर्जनाको पेटमा रहेको गर्भ फाल्न लगाएर मानसिक र शारीरिक यातना दिएको भन्दै सिर्जनाले गत वर्ष फागुनमा अर्घाखाँची ठाडामा सुमनविरुद्ध उजुरी दिइन् । त्यो बेला समुनले विवाह गर्ने शर्तमा मिलापत्र भयो । त्यही मिलापत्रकै आधारमा २ चैतमा उनीहरूको बुटवलको मनकामना मन्दिरमा विवाह पनि भयो । तर, विवाह भए पनि सुमनले सिर्जनालाई घर लगेनन् ।

सौभाग्यनरमै कोठामा छाडेर बिहेको पर्सिपल्ट काम विशेषले भन्दै सुमन काठमाडौं हिँडे । उनले विवाह भएपछि पनि सिर्जना गर्भवती भएको र तीन महिनाको गर्भ तुहाइदिएको दाबी सिर्जनाकी दिदी दीपा सुनारको छ । सुमनले आफूबाट टाढा राख्न बहिनीलाई मानसिक र शारीरिक यातना दिएर आत्महत्या गर्न बाध्य पारेको दीपाको आरोप छ ।

प्रकाशित मिति: आइतबार, भदौ ६, २०७८ १८:४७