लुम्बिनी प्रदेशका सभामुख घर्ती विवादमा, एमालेले माग्यो राजीनामा

A+ A A-

लुम्बिनी प्रदेशका सभामुख पूर्णबहादुर घर्ती विवादमा तानिएका छन् । प्रतिपक्षी नेकपा एमालेले सूर्य चिन्हबाट निर्वाचित दुई प्रदेश सांसदलाई पदमुक्त गर्न पत्र बुझाएपनि सभामुख घर्तीले पदमुक्त गर्न नमिल्ने बताएपछि सभामुख घर्ती विवादमा तानिएका हुन्।

सभामुख घर्तीले विधिको शासन विपरीत काम गरेको भन्दै नैतिकताका आधार राजीनामा दिनुपर्ने माग एमालेले गरेको छ । आइतबार नेकपा एमाले संसदीय दलको कार्यालयमा आयोजित पत्रकार सम्मेलनमा बोल्दै पूर्व मन्त्री एवं सांसद बैजनाथ चौधरीले सभामुखको भुमिका निष्पक्ष नभएको भन्दै राजीनामा मागेका हुने् ।

यस्तै सभामुखले पार्टीको कार्यकर्ता जस्तो व्यवहार गरेको भन्दै उनले सदनबाटै सभामुखलाई ठेगान लगाइदिने धम्की समेत दिए । ‘हामी अदालत जाँदैनौं, अदालतमा जानुपर्ने केही कारण छैन । सदनमै हामी काफी छौं । यस्तै गर्दै गए हामी सभामुखलाई सदनबाटै ठेगान लगाउँछौ’, उनले भने ।

एमाले प्रमुख सचेतक भुमिश्वर ढकालले सभामुख घर्तीले पद अनुकूल आचरण नगरेको र अदालतले जस्तै गरी कारबाही गर्न मिल्दैन भनेर पत्र दिनु हास्यापद निर्णय गरेको टिप्पणी गरे । उनले एमालेले माग गरेअनुसार प्रदेशसभा सदस्यद्वय विमला खत्री वली र अजय शाहीलाई पदमुक्त नगरेको भन्दै सभामुखको आचरण ठीक नभएकाले र नैतिकताका आधारमा पदमा बस्न नमिल्ने उनले बताए ।

प्रमुख सचेतक ढकालले सभामुख घर्तीले पदमुक्त गरेको सूचना सदनमा दिनुको सट्टा उल्टै आफैं न्यायाधीशको भूमिका निर्वाह गरी फैसला गरेको भन्दै असन्तुष्टि जनाए । उनले सभामुख घर्तीले प्रचलित कानुन, तथ्य, संसदीय मूल्य-मान्यताका विपरीत क्षेत्राधिकारले नदिएको निर्णय गरेका कारण नैतिकताका आधारमा पदमा बस्न नमिल्ने भन्दै राजीनामा माग गरे ।

उनले संसदको अवरोध कायम रहने चेतावनी समेत दिए । ‘सभामुखले विगतमा गरेको नजिरलाई समेत लत्याउन पछि परेका छैनन् । के यो संसदीय मूल्य मान्यता हो ? वा स्वेच्छाचारी निरंकुश चरित्र हो ? बिमलाकुमारी खत्री वली र अजय शाहीलाई प्रदेश सभा सदस्यबाट निष्कासन नगर्दासम्म हाम्रो दलले अगाडि बढाएको संसद अवरुद्ध गर्ने आन्दोलन जारी राख्छौं’, उनले भने ।

प्रकाशित मिति: आइतबार, भदौ ६, २०७८ १६:१५