लुम्बिनी प्रदेशसभा सचिवालयले एमालेलाई भन्यो– सांसदद्वय शाही र वलीलाई पदमुक्त गर्न मिल्दैन

लुम्बिनी प्रदेशसभा सचिवालयले एमालेलाई भन्यो– सांसदद्वय शाही र वलीलाई पदमुक्त गर्न मिल्दैन

A+ A A-

लुम्बिनी प्रदेशसभा सचिवालयले सांसदद्वय अजय शाही र विमला वली खत्रीलाई पदमुक्त गर्न नमिल्ने बताएको छ ।

आइतबार प्रदेशसभा सचिवालयले प्रमुख प्रतिपक्षी दल एमालेलाई जवाफ पठाउँदै सांसदद्वय शाही र वलीलाई पदमुक्त गर्न नमिल्ने बताएको हो । प्रदेशसभा सचिवालयले एमालेको माग अनुसार शाही र वलीलाई सांसदबाट पदमुक्त गर्ने कानुनी आधार नभएको पनि स्पष्ट पारेको छ ।

एमालेले दुवै सांसदलाई कारबाही गरिएको भन्दै पदमुक्त गर्न ९ भदौमा सभामुख पूर्णबहादुर घर्तीलाई पत्र बुझाएको थियो ।पत्रमा प्रदेशसभा नियमावलीको अनुसूची ७ अनुसार दलले भर्ने फारममा सांसद विमला वली र सांसद अजय शाही दुवैको नाम दलका सदस्यका रूपमा समावेश गरेको उल्लेख छ । तर, सांसदले भर्ने अनुसूची ६ अनुसारको व्यक्तिगत विवरण फारममा सांसदद्वयले आफू एमालेको सदस्य नभएको व्यहोरा भरेकाकाले पदमुक्त गर्न नसकिएको जवाफ प्रदेशसभा सचिवालयले दिएको हो ।

सांसद वलीको हकमा एमाले र माओवादी केन्द्र दुवैको अनुसूची ७ को फारममा आफ्नो सदस्य रहेको विवरण लेखिएको र शाहीको हकमा भने एमालेले मात्र आफ्नो सदस्य रहेको दाबी सचिवालयमा बुझाएको थियो । शाही निर्वाचनमा स्वतन्त्र समूहबाट सहभागी भएको र उनको व्यक्तिगत विवरणमा पनि स्वतन्त्र समूहको तर्फबाट प्रदेशसभा सदस्य रहेको उल्लेख भएकाले उनलाई पदमुक्त गर्न नमिल्ने सचिवालयले जनाएको छ ।

शाहीले निर्वाचनमा सहभागी हुँदा नै स्वतन्त्र पहिचान कायम हुने गरी सूर्य चिह्न प्रयोग गर्ने गरी सम्झौता गरेका थिए ।

दाङ क्षेत्र नम्बर ३ (ख) बाट निर्वाचित वलीले २३ फागुनको सर्वोच्चको फैसलापछि आफू कुनै दलको संसदीय दलमा सहभागी नभएको दाबी गरेकी छन् ।

एमालेले संसदीय दलको बैठक र पार्टीको बैठकमा उपस्थित भएको भनेर गरेको दाबीलाई विमलाले कीर्ते भनेकी छिन् । उनले केही हस्ताक्षर मुख्यमन्त्री कार्यालयमा ‘बन्धक’ बनाइएका बेला दबाबमा गराइएको समेत आरोप लगाएकी छन् ।

प्रदेशसभा सचिवालयले आधिकारिकता छानविनका लागि एमाले संसदीय दलसँग संसदीय दलको बैठकको माइन्युट, एमाले संसदीय दलको विधान र सदस्यता विवरण माग गर्दा एमालेले उपलब्ध नगराएको र उपलब्ध प्रमाणका आधारमा एमाले संसदीय दलमा सूचना जारी हुन नसक्ने व्यहोरोको पत्र पठाइएको प्रदेशसभाका सभामुख घर्तीले बताए ।

एमालेले भने सभामुखलाई दलको पत्रको विपरीत निर्णय गर्ने अधिकार नभएको जनाएको छ । सभामुखले पठाएको पत्रप्रति एमालेको गम्भीर आपत्ति रहेको प्रदेशसभामा एमाले संसदीयदलका मुख्य सचेतक भूमिश्वर ढकालले बताए ।

उनले सभामुखको पत्रविरुद्ध एमाले अदालत जाने कुनै योजना नबनाएको स्पष्ट पार्दै दुई सांसदको पदमुक्तको सूचना जारी नहुँदासम्म संसद चल्न नदिने चेतावनी दिए ।