अचार व्यवसायमा रमाएका गिरी दम्पती : विदेश जाने मोह त्यागे, महिनैपिच्छे ३ लाख कमाइ

अचार व्यवसायमा रमाएका गिरी दम्पती : विदेश जाने मोह त्यागे, महिनैपिच्छे ३ लाख कमाइ

A+ A A-

कुनै पनि काममा मेहनत गरियो भने सफलता पाउन सकिन्छ भन्ने उदाहरण हुन् कैलालीका गिरी दम्पती ।

विदेश जाने तरखरमा रहेका उनीहरूले यो सोच बदल्दै स्वदेशमै मनग्य आम्दानी गरिरहेका छन् । कैलालीको धनगढी उपमहानगरपालिका- ८ घर भएका शान्ति गिरी र रामचन्द्र गिरी फलफूल तथा अचार व्यवसायमा लागेर सफल बनेका छन् ।

उमेरले ३० वर्ष मात्रै पुगेकी शान्ती गिरीको १० वर्षपहिले बिवाह भयो । श्रीमान् रामचन्द्र कम्प्युटर पसलमा काम गर्थे । अरुका पसलमा काम गरेर खासै पैसा कमाउन सकिरहेका थिएनन् चन्द्रले । घर खर्च चलाउनै मुस्किल भएपछि शान्तिले रामचन्द्रलाई विदेश जान सल्लाह दिइन् ।

रामचन्द्र पनि दोधारमा थिए । तर उनले सोच बदलेर देशमै केही गर्नुपर्छ भनेर लागे । उनलाई शान्तिको साथ त छँदै थियो । उनीहरूले फलफूल खेती र अचार बनाउने सोच बनाए । घरभन्दा केही पर रहेको १४ कट्ठा बाँझो जमिनमा गिरी दम्पतीले उन्नत जातका फलफूलका बिरुवा रोपे । उनले बारीमा कागती, लिची र आँप रोपेका छन् ।

शान्तिले एक/दुई बट्टा अचार बनाएर छिमेकीहरूलाई बेच्न थालिन् । बिस्तारै अचारको माग बढ्न थाल्यो । त्यसपछि यसलाई बिस्तार गर्ने सोच आएको शान्ति बताउँछिन् ।

फलफूलबाट मात्रै राम्रो आम्दानी नहुने देखेर ती फलफूलको अचार बनाउन सुरु गरेको बताउँछिन् शान्ति । उनी अहिले आँप, लिची, कागती, तामा, अकबरे खुर्सानीको अचार बनाउँछिन् । पाँच वर्षदेखि यो व्यवसाय गर्दै आएको उनी बताउँछिन् । श्री शान्ति बाटीका फलफूल उद्योग दर्ता गरेर आफ्नो बारीको उत्पादनबाट व्यवसायिक रूपमै अचार व्यवसायमा उनीहरू अघि बढिरहेका छन् ।

उनीहरूले बनाएको ‘आनन्दी’ ब्राण्डको अचार अहिले धनगढीलगायत सुदूरपश्चिमका विभिन्न जिल्लाहरूमा पुग्ने गरेको छ । बाहिरबाट फलफूल मगाएर पनि उनीहरूले अचार बनाइरहेका छन् । आफ्नो बारीबाट उत्पादित कागती र लिची चाहिएजति प्रशोधन उद्योगमै प्रयोग गर्छन् भने बाँकी बिक्री गर्छन् ।

अचारलगायत बनाउन आवश्यक पर्ने अरु फलफूलहरू भने बाहिरबाट मगाइरहेको शान्तिले बताइन् । उद्योगमा अहिले अचारसँगै चुक, लेमन स्पाइसलगायतका अन्य चिजहरू पनि उत्पादन भइरहेका छन् ।

गत वर्षदेखि फलफूलका बिरुवाको कलमी पनि बनाउँदै आएको उनले बताइन् । बिरुवाहरू पनि बारीबाटै बिक्री भइरहेको शान्तिले सुनाइन् । आगामी दिनमा क्याफे खोल्ने योजनामा छिन् उनी ।

कुनै सयम वैदेशिक रोजगारीका लागि जाने योजना बनाएका शान्तिका श्रीमान् रामचन्द्र पनि अचार उद्योगबाट सन्तुष्ट छन् । यसबाटै नै महिनाको ३ लाखसम्म कमाइ हुने शान्ति बताउँछिन् । ‘वार्षिक ३६ लाखसम्म कमाइ हुन्छ,’ उनले भनिन् । आफ्नै देशमा बसेर राम्रै आम्दनी भइरहेको उनले सुनाइन् ।

पछिल्लो समय कोरोना महामारीले गर्दा भने व्यवसायमा केही असर परेको शान्ति बताउँछिन् । ‘अहिले हाट बजार पनि बन्द छन्, त्यसकारणले पनि अहिले बजारको समस्या झेल्नु परेको अवस्था छ,' उनले भनिन् ।

नयाँ रणनिति बनाएर छिट्टै नै बजारमा अचार पुर्‍याउने योजना रहेको उनले बताइन् । सीटीईभीटीबाट अचार बनाउने तालिम सिकेर करिब १ लाखबाट सुरु गरेको यो व्यवसायबाट अहिले गिरी दम्पतीले वार्षिक ३६ लाख रुपैयाँ आम्दानी गरिरहेका छन् । घरपरिवारको राम्रै साथ मिलेकाले अचार व्यवसाय निकै राम्रो फष्टाएको उनको भनाइ छ ।

यही व्यवसायबाटै छोराछोरीलाई उचित शिक्षा दिन र घरव्यवाहार चलाउन पुगिरहेकै छ । ‘मेहनत गर्ने हो भने अचार व्यवसायबाट पनि राम्रैसँग जीवन निर्वाह गर्न सकिन्छ,’ उनले भनिन् । व्यवसाय गर्न आत्मबल चाहिने र आफ्नै देशमा पनि राम्रै कमाइ गर्न सकिने गिरी दम्पतिको अनुभव छ ।

तस्वीरहरू : सुनिता बिक/शिलापत्र

प्रकाशित मिति: आइतबार, भदौ ६, २०७८ ०८:३८