विमला वली एमालेकै सांसद रहेको प्रदेश सभाबाटै पुष्टि

A+ A A-

लुम्बिनी प्रदेश सभाकी सांसद विमला वली सर्वोच्चको फैसला पछि पनि एमालेमा रहेको पुष्टि प्रदेश सभाले गरेको प्रमाण फेला परेको छ ।

लुम्बिनी प्रदेश सभाको प्रमुख प्रतिपक्ष दल एमालेले दल त्याग गरेर माओवादी केन्द्र रोजेकी विमला वलीलाई कारबाहीको माग गरिरहेका बेला प्रदेश सभा सचिवालयले वली एमालेमै रहेको पुष्टि गरेको प्रमाण फेला पारेको हो ।

प्रदेश सभा सचिवालयले ५ चैत ०७७ मा नेकपा एमालेलाई सांसदको विवरण उपलब्ध गराउन पत्र काटेको थियो । पत्र संख्या ०७७/७८ को चलानी ५३३ मा सचिवालयले एमालेलाई २३ फागुन ०७७ को सर्वोच्चको फैसला पछि माओवादी केन्द्र र एमाले अलगअलग भएकाले एकीकरण हुनु अघिको साबिककै अवस्थामा कायम रहेको व्योहोरा जानाकारी दिन भनेको थियो ।

त्यही पत्रका आधारमा एमालेले १५ चैत ०७७ मा एमालेबाट संलग्‍न भएका सांसदहरुको विवरण प्रदेश सभा सचिवालयलाई पठाएको थियो । प्रदेश सभा सचिवालयलाई सम्बोधन गरी १५ चैत ०७७ मा एमाले प्रमुख सचेतक भुमिश्वर ढकालले ४३ जना सांसदको विवरण सचिवालयमा पठाएकोमा ४३ नम्बरमा विमला वलीको नाम रहेको छ ।

दाङ क्षेत्र नं. ३ (ख) बाट निर्वाचित वली एमालेमै रहेको विवरण सचिवालयमा पठाएमोमा उक्त विवरणलाई पुष्टि गरी प्रदेश सभा सचिवालयले छाप लगाएको छ ।

एमाले प्रमुख सचेतक भुमिश्वर ढकालले विमला एमालेमै रहेको विवरणमा प्रदेश सभा सचिवालयले प्रमाणित चैतमा गरिसकेकाले दल रोज्ने अधिकार वलीमा नभएको बताउँदै आएका छन् । वलीले १९ बैशाखमा दल रोज्न पाउने अधिकार अनुसार माओवादी केन्द्र रोजेको पत्रकार सम्मेलन गरेर बताएकी थिइन् । तर एमालेले त्यसभन्दा अघि एमाले संसदीय दलको बैठकमा पनि विमला वली सहभागी भएको बताउँदै आएको छ ।

एमाले प्रमुख सचेतक भुमिश्वर ढकालले प्रदेश सभा सचिवालयले विवरण माग गरे अनुसार आफूहरुले सांसदहरुको नाम दिएको र त्यसलाई सचिवालयले पुष्टि गरेको बताए । ‘त्यो बेला विमला वलीको नाम समेत विवरणमा समावेश थियो । सचिवालयले सदर पनि गरेको प्रमाण छ । तर पछि वलीले माओवादी रोज्दा कसरी सुरुमा माओवादी रोजेको भयो’, उनले भने ।

वलीले माओवादी रोज्नु अघि पनि एमालेका कार्यक्रममा समेत उपस्थित भएकाले पनि उनी दल रोज्दा सुरुमा एमाले भएको बताए । ‘एमाले भइसकेपछि माओवादी बन्नुभयो । त्यसपछि हामीले स्पष्टिकरण सोध्यौं । चित्तबुज्दो जवाफ नआएपछि पार्टीले पदमुक्त गर्‍यो । त्यो पत्र सभामुखलाई बुझाएका छौं । त्यहीकारण वली पदमुक्त भएको सूचना सभामुखले भन्नुपर्छ । हाम्रो माग नै त्यही हो’, उनले भने ।

उनले अजय शाही पनि स"र्य चिन्हबाट निर्वाचित भएपछि स्वतन्त्र भन्‍नु कानुन विपरीत भएकाले पदमुक्तका लागि निर्णय गरिएको दाबी गरे ।

प्रकाशित मिति: शनिबार, भदौ ५, २०७८ १९:१९